Տնտեսական աճն իրատեսական է այնքան, որքան մնացած չկատարած խոստումները

Երեկ Ստեփանակերտի Վերածննդի հրապարակում համահայկական հանրահավաքի ժամանակ ՀՀ վարչապետ Նիկոլ Փաշինյանը ներկայացրեց մինչև 2050 թվականը իրականացվելիք ռազմավարական նպատակները:

Ըստ Փաշինյանի՝ մինչև 2050 թվականը պետք է Հայաստանի բնակչությունը հասցնել առնվազն 5 միլիոն մարդու, ստեղծել 1 միլիոն 500 հազար աշխատատեղ, լուծել 2․5 միլիոն մարդու զբաղվածության հարց, Հայաստան այցելող զբոսաշրջիկների թիվը հասցնել 15 միլիոնի, տասնհինգապատկել Հայաստանի համախառն ներքին արդյունքը, յոթնապատկել միջին աշխատավարձը:

ArmDaily.am-ի հետ զրույցում տնտեսագետ Անդրանիկ Թևանյանն ասաց, որ այդ խոսքերը հիմնավորված չեն.

«Այդ ամենն իրատեսական է այնքան, որքան մնացած բոլոր խոստումները, որոնք նախկինում տրվել են և չեն կատարվել: Երբ մարդը կարճաժամկետում ձախողվում է, փորձում է պոպուլիստական նպատակով երկարաժամկետով ինչ-որ թվեր հայտարարել, որպեսզի էմոցիոնալ էֆեկտներ ստանա: Եթե 2050 թվականին մեր բնակչությունը 5 մլն-ի պիտի հասնի, ապա մենք արդեն պիտի տեսնեինք դրա նախադրյալները, բայց այս կառավարության գործունեության ընթացքում արտագաղթի բացասական թվեր ունենք, բնակչությունը նվազել է, իսկ կառավարության ծրագրով ներկայացվել է, որ 2019 թվականին սպասվում է համախառն ներքին արդյունքի 5 % աճ: Ընդ որում, դա եղել է հեղափոխական էիֆորիային հաջորդող ժամանակահատվածում: Եթե նման տեմպերով ենք առաջ շարժվելու, ապա կարելի է պատկերացնել այդ թվերի իրատեսականությունը: Դրանք այնքան անհիմն են, որ անգամ մասնագիտական խոր վերլուծության կարիք չկա:

Հարցին, թե ինչ քայլեր են պետք ձեռնարկել նման աճի հասնելու համար, տնտեսագետը պատասխանեց.

«Բարձր ցուցանիշներ ունենալու համար երկրում պիտի տեղի ունենա տնտեսական և քաղաքական մթնոլորտի կտրուկ փոփոխություն: Պետք են ծրագրեր, դրանք իրականացնողներ և պրոֆեսիոնալների թիմ: Այդ ամենը մենք չենք տեսնում և Հայաստանի համար գոնե երևացող ապագայում լավագույն տարբերակն այն կլինի, որ այս փորձությունը, որը հիմա ապրում ենք, առանց կորուստների հաղթահարենք: Ես դա կհամարեմ հաղթանակ»: