Մենք պետք է հասկանանք, որ աշխարհն այլ լեզվով է խոսում. Արարատ Միրզոյան

Արցախի անկախությունն այսօր միանշանակ ավելի ամուր է, տարեցտարի ամրացվել են անկախության հիմքերն ու երաշխիքները: Այս մասին, այսօր՝ սեպտեմբերի 2-ին, Ստեփանակերտում լրագրողների հետ զրույցում նշեց Հայաստանի ԱԺ նախագահ Արարատ Միրզոյանը:

Նրա խոսքով, Արցախի ազատությունն ու անկախությունը բազմաթիվ սերունդների նվիրական երազանքն է եղել եւ այդ երազանքն այսօր իրականություն է. «Մենք պետք է բոլոր ջանքերը դնենք, որ փայփայենք ձեռք բերվածը, կարողանանք ամրապնդել այն, կարողանանք հասցնել իր տրամաբանական, վերջնական հանգրվանին»:

Դիտարկմանը, որ Հայաստանի ԱԺ-ում կան վեճեր, անհամաձայնություններ, իսկ Արցախում թե իշխանությունը, թե ընդդիմությունը կողք-կողքի կանգնած են՝ հաշտ համերաշխ, Արարատ Միրզոյանն արձագանքեց. «Ինչպե՞ս կարող էր այլ կերպ լինել, չէ որ մենք խոսում ենք այն հիմնարար արժեքների, հիմնարար նպատակների մասին, որի համար մեր ժողովուրդը հավաքվել ու պետականություն է ստեղծել: Այստեղ չի կարող ընդդիմություն, իշխանություն, այստեղ տարակարծություններ չեն կարող լինել»:

Նա եւս մեկ անգամ ընդգծեց, որ որեւէ մեկը չի կարող սեպ խրել Հայաստանի եւ Արցախի միջեւ՝ անկախ նրանից, թե որտեղ ինչ քաղաքական իշխանություն կա. «Սա ժամանակից եւ առանձին խմբերի քաղաքական նեղ շահերից վեր մի բանի մասին է խոսքը: Ուղղակի տեսականորեն այդ սեպը հնարավոր չէ»:

Հարցին, թե ի՞նչ քայլեր է պատրաստվում ձեռնարկել Հայաստանի ԱԺ-ն՝ Արցախի ինքնորոշման իրավունքը տարբեր ատյաններում ներկայացնելու համար, Արարատ Միրզոյանը պատասխանեց. «Նախ պետք է շարունակենք պաշտպանել, բոլոր հնարավոր հարթակներում շեշտել արցախցիների ինքնորոշման իրավունքը: Ի վերջո, դա հիմնարար իրավունքներից է եւ աշխարհն այսօր, ի ուրախություն մեզ, գնում է դեպի առաջադիմություն, իսկ այդ առաջադիմության հիմնարար սկզբունքներից մեկը հենց մարդու իրավունքներն են: Ինքնորոշման իրավունքը եւս այդ հիմնարար իրավունքների շրջանակում է տեղավորվում: Շատ ճիշտ է, որ հայկական դիվանագիտությունը, մասնավորապես նաեւ խորհրդարանական դիվանագիտությունը բոլոր հնարավոր հարթակներն օգտագործի, որպեսզի հենց այս կոնտեքստում, այս ասպեկտով ներկայացվի խնդիրը: Որովհետեւ ի վերջո, որքան էլ մեր սրտերին մոտ է պատմական արդարության վերականգնման մասին խոսակցությունները, պետք է հասկանանք, որ աշխարհն այլ լեզվով է խոսում, աշխարհն իրավունքների լեզվով է խոսում եւ իհարկե, չմոռանանք նաեւ այդ իրավունքները պաշտպանելու լեզվով է խոսում»: