Կառավարությունը արտոնություն տրվեց ևս 4 ընկերության. կստեղծվի 97 նոր աշխատատեղ

Կառավարությունն այսօրվա նիստում մաքսային արտոնություններ տվեց 4՝ «Այ Պլաստ», «Ոսկե կար», «Արտ Գլոբալ», «Ին-Վի» ընկերություններին:

Հիմնական զեկուցող էկոնոմիկայի նախարար Տիգրան Խաչատրյանը հերթով ներկայացրեց՝ որ ընկերությանը որքան արտոնություն է տրվելու, ինչ գործունեություն են ծավալում ընկերությունները:

Եվ այսպես՝ «Այ պլաստ» ընկերության կողմից ներմուծվող ապրանքներն օգտագործվելու են բժշկական կպչուն սպեղանիի արտադրության մեջ։

«Նախատեսվում է ծրագրի շրջանակում իրականացնել 23 մլն 825 հազար դրամի ներդրում` նոր սարքավորումների ձեռքբերման համար: Ներկայում առկա է 6 աշխատատեղ, նախատեսվում է ներդրումային ծրագրի շրջանակում ստեղծել ևս 3 նոր աշխատատեղ՝ 120,000 դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կազմելու է 15 մլն դրամ, որից 10 մլն դրամի արտադրանքը կիրացվի ՀՀ տարածքում, 5 մլն դրամի արտադրանքը` ԵԱՏՄ այլ անդամ երկրների տարածքում:

Արտոնություն ստանալու համար ներկայացված ապրանքների արժեքը կազմում է 130 մլն դրամ: Մաքսատուրքի ազատման արտոնությունը կազմում է 8 մլն դրամ:

Հաջորդը «Ոսկե Կար» ընկերությունն է: Խաչատրյանը նշեց, որ այն գործում է հագուստի արտադրության բնագավառում, նախատեսվում է իրականացնել 2 մլն դրամի ներդրումներ:

Ընկերությունն ունի 151 աշխատակից, նախատեսվում է ստեղծել ևս 60 նոր աշխատատեղ՝ 110 հազար դրամը գերազանցող աշխատավարձով:

Նախատեսված արտադրանքի ընդհանուր ծավալը այս ծրագրային բաղադրիչի իրականացման արդյունքնում կկազմի 3 մլրդ 750 մլն դրամի չափ, որից 3 մլրդի արտադրանքը կիրացվի ՀՀ տարածքում, իսկ մնացածը մասը՝ ՌԴ-ում:

Արտոնություն ստանալու համար ներկրված ապրանքների դիմաց մաքսատուրքից ազատման գումարը գնահատվում է մոտ 158 մլն դրամ, որից ՀՀ բյուջեի եկամուտների նվազումը 1 մլն 930 հազար դրամ է: 2018 թվականի ընթացքում ընկերությունը վճարել է 158 մլն դրամի հարկ:

Հաջորդը, Տիգրան Խաչատրյանի ներկայացմամբ, մաքսային արտոնություն տրվեց «Արտ Գլոբալ» ընկերությանը:

Խաչատրյանը նշեց, որ ընկերության կողմից ներմուծվող հումքն օգտագործվելու է թղթե և ստվարաթղթե արտադրատեսակների արտադրության մեջ։

Ծրագրի շրջանակներում նախատեսվում է իրականացնել 250 մլն ՀՀ դրամի ներդրում և ստեղծել 20 նոր աշխատատեղ՝ 150, 000 դրամ միջին աշխատավարձով։

Արտադրանքի նախատեսված ծավալները ծրագրի ընթացքում կազմելու են մոտ 1 մլրդ դրամ, որից մոտ 700 մլն դրամը կիրացվի ՀՀ տարածքում, մոտ 250 մլն դրամը՝ ԵԱՏՄ այլ անդամ երկրներում և մոտ 50 մլն դրամը՝ երրորդ երկրների տարածքում։

Արտոնություն ստանալու համար ներկայացված ապրանքների արժեքը կազմում է 246 մլն 780 հազար դրամ: Մաքսատուրքի ազատման արտոնությունը կազմում է 12 մլն 339 հազար դրամ:

«Ին-Վի» ընկերության կողմից ներմուծվող ապրանքներն օգտագործվելու են մալուխների և հաղորդալարերի արտադրության մեջ։

Խաչատրյանն ասաց, որ արդեն իսկ իրականացվել է 387 մլն ՀՀ դրամի ներդրում` կապիտալ և շրջանառու միջոցների համալրման համար:

Ծրագրի շրջանակում նախատեսվում է իրականացնել ավելի քան մեկ մլրդ դրամի ներդրում` կապիտալ և շրջանառու միջոցների համալրման համար:

«Ներկայումս առկա է 65 աշխատատեղ, ներդրումային ծրագրի շրջանակում կստեղծվի ևս 10 նոր աշխատատեղ՝ 155,000 դրամ միջին աշխատավարձով։ Ծրագրով նախատեսված արտադրանքի ընդհանուր ծավալը կազմելու է 5 մլրդ դրամ, որն ամբողջությամբ իրացվելու է ՀՀ տարածքում: Արտոնություն ստանալու համար ներկայացված ապրանքների արժեքը կազմում է 1 մլրդ 80 մլն ՀՀ դրամ: Մաքսատուրքի ազատման արտոնությունը կազմում է 70 մլն 200 հազար դրամ»,- նշեց նա:

Ավելի վաղ կառավարությունը մաքսային արտոնություն էր տվել «Նաիրիան» ընկերությանը: