1207 ֆիլմ՝ սահմանելով Գինեսի համաշխարհային ռեկորդ

ԱՄՆ Փենսիլվանիա նահանգի 60-ամյա բնակիչ Գլենվուդ Հոսկին կրտսերը մեկ տարվա ընթացքում կինոթատրոնում դիտել է 1207 ֆիլմ՝ սահմանելով Գինեսի համաշխարհային ռեկորդ։ 2024 թվականի ապրիլից մինչև 2025 թվականի ապրիլը նա օրական միջինը 3-4 ֆիլմ է դիտել՝ գերազանցելով նախորդ ռեկորդը, որը կազմում էր 777 ֆիլմ։

Ռեկորդակիրն իր ազատ ժամանակի մեծ մասն անցկացրել է Փենսիլվանիայի Յորք Հեյվեն քաղաքի Regal կինոթատրոնում։ Գլենվուդի խոսքով՝ ամեն օր նախապես ուսումնասիրել է ցուցադրությունների ժամանակացույցը՝ փորձելով հնարավորինս շատ ֆիլմեր դիտել՝ առավոտից մինչև կեսգիշեր։ Նա խոստովանել է, որ կինոթատրոն հաճախելն իր համար ոչ միայն հաճույք է եղել, այլև հետաքրքիր մարտահրավեր։ 

Նրա ամենասիրելի ժանրը մուլտֆիլմերն են եղել, սակայն հաճույքով դիտել է նաև կատակերգություններ։ Ռեկորդակիրն առանձնացրել է «Վայրի ռոբոտը» և «Դեդփուլն ու Վուլվերինը» ֆիլմերը։ Հետաքրքիր է, որ ռեկորդը սահմանելու համար մեծ գումարներ ծախսելու կարիք չի եղել։

Գլենվուդն օգտվել է Regal Unlimited ամսական բաժանորդագրությունից, որն արժեցել է մոտ 28 դոլար և թույլ տվել անսահմանափակ թվով ֆիլմեր դիտել։ Ծախսերը նվազեցնելու համար նա տնից սնունդ է բերել, իսկ ցուցադրությունների միջև զբոսնել կինոթատրոնի տարածքում։

radar armenia