Ադրբեջանի բոլոր սպառնալիքները դատարկություն են՝ ուղղված բացառապես ներքին լսարանին. 3 պատճառ, թե ինչու Ալիեւը չի հարվածի Մեծամորի ԱԷԿ-ին. Լապշին

Ռուս և իսրայելցի հայտնի բլոգեր Ալեքսանդր Լապշինն անդրադարձել է Մեծամորի ատոմակայանի ուղղությամբ հարված հասցնելու մասին ադրբեջանական կողմի հնչեցրած սպառնալիքներին՝ նշելով, որ այդ հարցին ուշադրություն են դարձրել ոչ միայն հայկական և ադրբեջանական ԶԼՄ-ները, այլև ռուսական, եվրոպական և անգամ իսրայելական ԶԼՄ-ը:

«Եթե հարցնեք իմ կարծիքը, ապա վստահությամբ կպատասխանեմ, որ դրանք դատարկ խոսքեր են, և ադրբեջանցիները երբեք չեն գնա այդ քայլին: Ոչ այն պատճառով, որ չեն կարող: Հարվածել, իհարկե, նրանք կարող են, քանի որ հրթիռային սպառազինումը դա թույլ է տալիս: Տեխնիկապես նրանք կարող են հարվածել ոչ միայն Բաքվից, այլև Նախիջևանի կողմից, որից 70 կմ հեռավորությամբ գտնվում է Երևանը: Սակայն Ալիևը երբեք նման հրաման չի տա երեք պատճառով.

1. Բռնապետ Ալիևին պետք է ոչ թե լիամասշտաբ պատերազմ Հայաստանի հետ, այլ մի շարք սահմանային սադրանքներ, որպեսզի շեղի շարունակաբար աղքատացող ադրբեջանցիների ուշադրությունն իրական խնդիրներից: Մի երկիր, որի եկամուտների 80 տոկոսը կազմվում է նավթի վաճառքից, այսօր ողջ աշխարհում նավթի գների անկման հետևանքով հայտնվել է կոտրված տաշտակի առաջ: Ի դեպ, իշխող տոհմի ախորժակը չի պակասել: Սրան ավելացնենք Ադրբեջանում կորոնավիրուսի տարածումը վերահսկելու տապալումը, 4 ամիս շարունակվող կարանտինը և հասարակ քաղաքացիների աճող վրդովմունքը: Նկատել ե՞ք, որ բազմահազար ամբոխ հավաքելով՝ «դաս տալ հայերին» կարգախոսի ներքո, Ալիևը հանկարծ կորցրել է դեպքերի վերահսկողությունը, և ոստիկանությունը ստիպված է եղել մահակների և ջրցանների օգնությամբ ցրել մարդկանց, այլապես կատաղած և հուսահատ մարդիկ գրոհով կվերցնեին Ադրբեջանի խորհրդարանը: Եթե Ալիևը երկիրը ներքաշի լիամասշտաբ պատերազմի մեջ և պարտվի, ստիպված կլինի փախչել երկրից այն նույն անձնական ինքնաթիռով, որով 2017 թվականի փետրվարին ինձ Բաքու էր տեղափոխել՝ ձգտելով ցույց տալ իր ժողովրդին, թե որքան հզոր է, որ կարողացել է բռնել բլոգերին:

2. Մեծամորի ատոմակայանը, թեև պաշտոնապես հայկական է, գործնականում կառավարվում է ռուսական հսկաների կողմից, առաջին հերթին՝ «Ռոսատոմի»: Կայանում աշխատում են մեծ թվով ռուս ինժեներներ և տեխնիկներ: Ցանկացած հարված կայանի ուղղությամբ կհանգեցնի տասնյակ և հարյուրավոր ՌԴ քաղաքացիների մահվան, որոնք այնտեղ աշխատում են: Հիշեցնեմ, որ 102-րդ ռուսական ստորաբաժանումը, որը տեղաբաշխված է Գյումրիում, Երևանում և Մեղրիում, պատասխանատու է այդ թվում և Մեծամորի ԱԷԿ-ի անվտանգության ապահովման համար: Ռուս զինվորականներն ունեն բոլոր անհրաժեշտ միջոցները, որ թույլ չտան ադրբեջանցիներին հարվածել. С-300В զենիթահրթիռային համակարգեր, ՄիԳ-29 կործանիչներ, Մի-24Պ և Մի-8ՄՏ ուղղաթիռներ: Եթե ինչ-որ մեկը կարծում է, որ Ռուսաստանն այդեն «այն չէ», ապա ենթադրում եմ, որ ադրբեջանցիների փորձը հարվածել ատոմակայանին կհիշեցնի, որ ռուսական արջը ընդունակ է ցավոտ պատասխան հարված տալ: Բնականաբար, վերոնշյալը հասկանում են նաև Ադրբեջանի իշխանությունները: Գաղտնիք չէ, որ Ալիևը կցանկանար Ռուսաստանին ներքաշել ղարաբաղյան հակամարտության մեջ, որպեսզի Էրդողանի հետ միասին, որը դժգոհ է Գյումրիում ռուսական բազայից, մեղադրեր Պուտինին Բաքվի դեմ ագրեսիայի մեջ: Սակայն այս դեպքում Մեծամորի կայանի պաշտպանության հարցում այդ ծրագիրը չի աշխատի:

3 Եթե տեսականորեն ենթադրենք, որ Ալիևին հաջողվել է ճեղքել հայկական և ռուսական պաշտպանությունը և հարվածել Մեծամորի ԱԷԿ-ին, ապա հիշեցնեմ, որ կայանից մինչև Թուրքիայի հետ սահմանն ընդամենը 20 կմ է: Իսկ մինչև խոշոր թուրքական Իգդիր քաղաքը՝ 40 կմ: Ավելին, խիտ բնակեցված Արարատյան դաշտավայրը Թուրքիայի կողմից հարում է հայկական սահմանին: Խոսքն այն մասին է, որ եթե ողբերգություն տեղի ունենա, և ադրբեջանցիները հանգեցնեն աղետի, ինչպիսին Չեռնոբիլի դեպքում էր, ապա առաջին հերթին հարվածի տակ կհայտնվի Թուրքիայի հյուսիսարևելյան շրջանը: Միլիոնավոր թուրքեր ստիպված կլինեն թողնել իրենց տները և փախչել, ինչը սոցիալական պայթյուն կառաջացնի առանց այն էլ դժգոհությունից եռացող երկրում: Էրդողանը հաստատ դրա համար շնորհակալություն չի հայտնի Ալիևին:

Այնպես, որ ընկերներ, հանգստացեք: Ադրբեջանի բոլոր սպառնալիքները դատարկություն են՝ ուղղված բացառապես ներքին լսարանին: Բարձրագոչ հայտարարություններն ու բռունցքով թափահարելը հայերի ուղղությամբ մի գրոշ անգամ չարժեն»,- գրել է բլոգերը:

Այս թեմայով Ադրբեջանցիները պարբերաբար այցելում են Կապան՝ գնումներ կատարելու. Լապշին Ալիևն ունի մոտ 7 000 սպանված, կորցրել է զրահատեխնիկայի 80%-ը, ավիացիայի 90%-ը, բայց չի կարողացել հաղթել Արցախին. Լապշին Լապշինը՝ Հադրութից, Մարտունիից եւ Ջեբրայիլից ադրբեջանցիների ֆեյք տեսանյութերի մասին Լապշինն անդրադարձել է Արայիկ Հարությունյանի դեմ Ադրբեջանի ղեկավարության կողմից 15 հոդվածով քրեական գործ հարուցելու մասին ադրբեջանական կայքերից մեկի հոդվածին Իսրայելում ադրբեջանական համայնքում Թել-Ավիվ Յաֆֆայի հայկական եկեղեցու դեմ ծրագրված սադրանքի հրավերներ են տարածվում. Ալեքսանդր Լապշին (լուսանկար)