ՀՀ իրավապահները չեն մեկնաբանում հայաստանցիների հանցակցությունը Մերձմոսկովյան սպանությանը

ՀՀ իրավապահները չեն մեկնաբանում Մերձմոսկովյան աղմկալի սպանությանը ՀՀ քաղաքացիների հանցակցության հարցը։

Մասնավորապես, NEWS.am-ի թղթակցի հարցմանը Հայաստանի ոստիկանության մամուլի ծառայությունում ասել են, որ այս փուլում մեկնաբանել լիազորված է միայն նախաքննության մարմինը։ Այնինչ, ՌԴ Քննչական կոմիտեում նույնպես հրաժարվել են մեկնաբանություններից. «Չենք մեկնաբանում։ Քննիչներն ակտիվորեն աշխատում են»։

Սպանությանը հայաստանցիների հնարավոր հանցակցության մասին ասել է տուժողի հայրը։ «Ես այսօր շփվել եմ Քննչական կոմիտեի ներկայացուցիչների հետ, որոնք աշխատել են տեղում։ Նրանք ինձ ասացին, որ բոլոր կասկածյալները ճշտված են, մեկը կալանվել է, նրա հետ հիմա աշխատում է քննությունը։ Մասնակիցներից շատերը մեկնել են Հայաստան։ Ինձ ասացին, որ Հայաստանն այդ գործով կհանձնի բոլորին, դա գրեթե ճշգրիտ է»,- ՌԲԿ-ին ասել է զոհվածի հայրը։

Նիկիտա Բելյանկինը մահացել է Մերձմոսկովյան Կրասնոգորսկի շրջանի Պուտիլկովո գյուղում հունիսի 2-ի գիշերը։ Նա միջամտել է «Բիր հաուս» բարի մոտ տեղի ունեցող ծեծկռտուքին, որտեղ տասը մարդ ծեծում էր երկուսին։ Հատուկջոկատային նախկին մարտիկը հանել է օդամուղ ատրճանակն ու նախազգուշական կրակոց արձակել, որպեսզի շեղի ուշադրությունն իր վրա։ Դրանից հետո Բելյանկինին գցել են գետնին եւ սկսել ծեծել, պատմել է հայրը։ Նախկին հատուկջոկատայինին հաջողվել է պոկվել նրանց ձեռքից եւ էլի մի քանի անգամ կրակել, ինչից հետո հարձակվողներից մեկը դանակով հարվածել է նրան։ Հարձակվողները փախուստի են դիմել, շտապօգնությունը դեպքի վայր է եկել Բելյանկինի մահվանից մի քանի րոպե անց ։ Քննչական կոմիտեն քրեական գործ է հարուցել սպանության (Քր.օր. 105 հոդված, մաս 1) եւ միտումնավոր առողջությանը ծանր վնաս հասցնելու (Քր.օր. հոդված 111, մաս 1) հոդվածներով։ Բելյանկինի սպանության գործը քննում է ՔԿ կենտրոնական ապարատը։

ՌԵՆ ՏՎ-ի տվյալներով՝ կասկածվողներից մեկը տեղի բարի սեփականատեր Գրիգոր Օհանյանն է։ Նա հեռացել է Ռուսաստանից հունիսի 2-ին, առավոտյան չվերթով եւ, ըստ որոշ տվյալների, թռել է Երեւան, տեղեկացնում է հեռուստաալիքը։