Երևանի 30 դպրոցներում պիլոտային ծրագրով մուտքը կդառնա անցաքարտերով

Երևանի 30 դպրոցներում պիլոտային ծրագրով մուտքը կդառնա անցաքարտերով: Այս տեղեկությունը SHANTNEWS.am-ի հետ զրույցում հաստատեց քաղաքապետ Հայկ Մարությանի մամուլի քարտուղար Հակոբ Կարապետյանը:

Ծրագիրը փորձարկվելու է առաջին անգամ, և նպատակը երեխաների անվտանգության ապահովումն է և օտար անձանց մուտքը դպրոց սահմանափակելը։ Յուրաքանչյուր երեխա ունենալու է անհատական անցաքարտ։

Մեր այն հարցին, թե ինչ սկզբունքով են ընտրվել 30 դպրոցները՝ Հակոբ Կարապետյանը պատասխանեց, որ ընտրվել են առավել շատ աշակերտներ ունեցող դպրոցները:

Հատկանշական է, որ ծառայությունը գործելու է անվճար հիմունքներով, բացառությամբ այն լրացուցիչ ծառայությունների, որոնց համար ծնողը պետք է վճարի:

Լրացուցիչ ծառայությունների գներն այս պահին դեռ վերջնական որոշված չեն, սակայն դրանք կլինեն այնպիսի ծառայություններ, ինչպես օրինակ, ծնողին հաղորդագրություն ուղարկելը, երբ երեխան կմտնի դպրոց, կամ դպրոցից դուրս կգա:

«Ծնողը կարող է հավատացած լինել, որ երեխան դպրոցում է: Եթե ծրագիրը արդարացնի սպասելիքները, կներդրվի նաև այլ դպրոցներում»,- ասաց Հակոբ Կարապետյանը:

Անցաքարտերը աշակերտներին կբաժանվեն մինչ նոր ուսումնական տարվա մեկնարկը:

Քաղաքապետարանը ծրագիրն իրականացնելու է մասնավոր կազմակերպության հետ, իսկ անցաքարտերը միացվելու են հատուկ ազդանշանային համակարգին և հարկ եղած դեպքում կարող են անջատվել: