Ի՞նչ կպարզի Ապրիլյան պատերազմի հանգամանքներն ուսումնասիրող քննիչ հանձնաժողովը

«Ժամանակը» գրում է. «Ապրիլյան պատերազմի հանգամանքների ուսումնասիրման քննիչ խորհրդարանական հանձնաժողովը նիստերը կանցկացնի դռնփակ, հայտարարել է խորհրդարանի «Իմ քայլը» խմբակցության ղեկավար Լիլիթ Մակունցը: Հանձնաժողովի քննության ենթակա հարցերի շրջանակը լինելու է շատ լայն, այդ թվում, օրինակ, հակառակորդի գործողությունների կանխման ուղղությամբ ԶՈՒ հրամանատարների որոշումների օպերատիվությունը:

Անկասկած է, որ խորհրդարանական քննիչ հանձնաժողովի իրավասության տակ է մի հարց, որն իր նշանակությամբ ոչ միայն զուտ ներքին չէ, այլ նույնիսկ ավելին է, քան ռեգիոնալը: Մենք Ապրիլյան պատերազմի ռազմաքաղաքական շերտերի մասին գրել ենք պարբերաբար, ամենատարբեր դիտանկյունների և վարկածների ուսումնասիրմամբ, և այստեղ, անշուշտ, դաշտը չափազանց լայն է, և միաժամանակ, իհարկե, չափազանց պատասխանատու՝ ընդհուպ ազգային անվտանգության տեսանկյունից:

Եվ անկասկած է, որ հանձնաժողովը պետք է առաջնորդվի չվնասելու սկզբունքով, որպեսզի իր գործունեությամբ ոչ թե վտանգի, այլ բարձրացնի Հայաստանի ազգային անվտանգությունը: Այստեղ, բնականաբար, շատ բան կախված է այն հանգամանքից, թե հանձնաժողովի հետ ինչպես են գործակցելու այն բարձրաստիճան պաշտոնյաները, որոնք Ապրիլյան պատերազմի օրերին եղել են պետության կառավարման ղեկին, զբաղեցրել բարձրաստիճան քաղաքական և ռազմական պաշտոններ: Այդ իմաստով, օրինակ, բացի հասկանալիորեն Սերժ Սարգսյանից՝ Գերագույն գլխավոր հրամանատարից, հույժ կարևոր է նաև պաշտպանության նախկին նախարար Սեյրան Օհանյանի պատրաստակամությունը:

Ինչ խոսք, կարևոր պաշտոնյաները չեն սահմանափակվում Սերժ Սարգսյանով կամ Սեյրան Օհանյանով, սակայն այստեղ առանձնահատուկ է մի հանգամանք, որի մասին Սեյրան Օհանյանը խոսել էր ավելի վաղ, կարծես թե դեռ մինչև թավշյա հեղափոխությունն իր տված հարցազրույցներից մեկում: Նա հայտարարել էր, որ ինքը Ապրիլյան քառօրյա պատերազմից հետո համաձայն չի եղել պատասխանատվությունը ամբողջությամբ կամ հիմնականում բանակի, զինված ուժերի վրա դնելու մոտեցմանը: Այդ մոտեցումը փաստացի կիրառում էր Սերժ Սարգսյանը, որը պատերազմից հետո պաշտոնանկ արեց մի շարք բարձրաստիճան զինվորականների, այդ թվում, ի դեպ, հետախուզության պետ Արշակ Կարապետյանին, ամիսներ անց, իհարկե, նրան նշանակելով Ռուսաստանում Հայաստանի ռազմական կցորդ:

Թավշյա հեղափոխությունից հետո Նիկոլ Փաշինյանը նրան վերադարձրեց Հայաստան և նշանակեց իր խորհրդական՝ հայտարարելով, որ ծանոթ է Ապրիլյանի մասին գաղտնի տեղեկությունների հարյուրավոր էջերի, որտեղ որևէ բան չկա հետախուզության թերացման մասին»,-գրում է թերթը:

Մանրամասները՝ թերթի այսօրվա համարում: