Արմեն Սարգսյանը «քաղաքական ինքնասպանություն գործեց». կարծիքներ՝ նախագահի կողմից Վահե Գրիգորյանին ՍԴ դատավորի թեկնածու առաջադրելու մասին

ՀՀ նախագահ Արմեն Սարգսյանի կողմից ՍԴ դատավորի պաշտոնում Վահե Գրիգորյանի առաջադրումը տարբեր քաղաքական գործիչների մոտ բացասական ազդեցություն է առաջացրել:

«Հանրապետական» կուսակցության փոխնախագահ Արմեն Աշոտյանը ֆեյսբուքյան իր էջում անդրադարձել է այդ առաջադրմանը՝ գրելով.

«Փաստորեն, Արմեն Սարգսյանը Նիկոլ Փաշինյանին ծննդյան առիթով նվեր մատուցեց:

Պետությունն, ավաղ, դարձել է մեկ դերասանի թատրոն, սահմանադրական բոլոր ինստիտուտները՝ պարզապես դեկորացիա:

Նախագահ, Ազգային Ժողով, իրավապահ մարմիններ՝ ընդամենը մի էժանագին ներկայացման ռեկվիզիտներ են:

Պետության քայքայումը հենց այդպես է լինում, երբ պետական պաշտոններ զբաղեցնող մարդկանցից շատերը իրենց տեղում չեն»:

«Ադեկվադ» ՀԿ-ի անդամ Նարեկ Սամսոնյանը, անդարդառնալով սրան, գրել է, որ նախագահ Արմեն Սարգսյանը «քաղաքական ինքնասպանություն գործեց»:
«Արմեն Սարգսյանի հետ քաղաքական հույսեր կապող մարդիկ` ողջույններս: Հուսով եմ էլ չեք փորձի ինձ հակառակը համոզել»,-գրել է նա:

Ըստ քաղաքագետ Հրանտ Մելիք-Շահնազարյանի՝ նախագահը նման կերպ քրեական պատասխանատվության տակ է մտնում:

«Նախագահ Արմեն Սարգսյանը կրկին Վահե Գրիգորյանին առաջարկեց որպես ՍԴ դատավորի թեկնածու ու ինքը թռավ արձակուրդ։

Էն որ նախագահն անսկզբունք, սեփական շահն ու «բարի» համբավը պաշտող մարդ է, բազմիցս ենք տեսել ու համոզվել։ Բայց որ այդ ամենի համար պատրաստ է նաև քրեական պատասխանատվության տակ մտնել, նորություն էր։ Ստեղ են ասել, թե՝ փորձառու աղվեսը երկու ոտքով է թակարդն ընկնում»,-գրել է նա։

ԱԺ «Լուսավոր Հայաստան» խմբակցության պատգամավոր Տարոն Սիմոնյանն էլ լրագրողների հետ զրույցում ասաց, որ օրենքը թույլ չի տալիս միևնույն թեկնածուին 2-րդ անգամ ներկայացնել իրավասու նույն մարմինը:

Հիշեցնենք, որ 5 անգամ Ազգային ժողովը չի ընտրել ՍԴ դատավոր։ Արմեն Սարգսյանի կողմից առաջադրված վերջին թեկնածուն Արթուր Վաղարշյանն էր, սակայն նրա թեկնածության օգտին քվեարկեց 30, դեմ՝ 53 պատգամավոր: Խորհրդարանը դեռ նախորդ տարվա մայիսից չի կարողանում ՍԴ անդամի թափուր տեղը լրացնել:

Հիշեցնենք նաև, որ Ազգային ժողովն ապրիլի 16-ին կայացած նիստում 24 կողմ, 47 դեմ հարաբերակցությամբ չէր ընտրել ՀՀ նախագահի կողմից առաջադրված թեկնածու, իրավաբանական գիտությունների դոկտոր Գոռ Հովհաննիսյանին։

Նշենք նաև, որ նախագահ Արմեն Սարգսյանը նախկինում չէր առաջադրել Վահե Գրիգորյանի թեկնածությունը Ազգային ժողովին, բացի այդ՝ Ազգային ժողովը Վահե Գրիգորյանին չի ընտրել Սահմանադրական դատարանի դատավոր: