«Հյուսիս-Հարավ»-ի ենթակապալառու ընկերությունների ներկայացուցիչները կառավարության հետ համաձայնել են վերջնաժամկետներ չդնել և փողոցներ չփակել

Մայիսի 31-ին փոխվարչապետ Տիգրան Ավինյանի գրասենյակի ղեկավար Սերժ Վարագ Սիսեռյանն ընդունել է «Հյուսիս-Հարավ» ճանապարհի Տրանշ 2-ի շինարարական աշխատանքներն իրականացնող ենթակապալառու ընկերությունների ներկայացուցիչներին: Այս մասին հայտնում են փոխվարչապետի գրասենյակից:

Քննարկման առանցքում է եղել կապալառու ընկերության՝ իսպանական «Կորսան Կորվիամ»-ի, կողմից ենթակապալառու ընկերությունների հանդեպ չիրականացված պարտավորությունների հետ կապված իրավիճակը:

Փոխվարչապետի գրասենյակի ղեկավարը շեշտել է, որ հարցը առաջնային տեղ է զբաղեցնում «Կորսան Կորվիամ»-ի հետ Կառավարության վարած բանակցությունների օրակարգում:

Ձեռք է բերվել համաձայնություն հետևյալի մասին՝

1. Ենթակապալառու ընկերությունները կառավարության հետ երկխոսությունում խուսափելու են վերջնաժամկետների առաջ քաշումից և փողոցներ փակելու գործելաոճից,

2. Կառավարության կողմից 1.5 ամսվա ընթացքում ուսումնասիրվելու են խնդրի լուծման տարբերակները, և աշխատանքներ են իրականացվելու ստեղծված իրավիճակի հանգուցալուծման նպատակով:

Հիշեցնենք, որ շինարարությունն իրականացնողները փակել էին «Հյուսիս-Հարավ» ճանապարհի Ուջան բնակավայրի հատվածը: Նրանք դժգոհում էին, որ արդեն տասը ամիս է՝ աշխատավարձ չեն ստացել։