Օրական ես 40-50 խնդրի եմ առնչվում և գիտեմ՝ ինչպես արդար կլիներ լուծել դրանք, բայց օրենքն ինձ խանգարում է. Հայկ Մարության
Երևանի ավագանու հերթական նիստին քննարկվում է նախագիծ, որով նախատեսվում է Երևան համայնքի սեփականություն հանդիսացող Տիգրան Մեծի հ.53 հասցեում գտնվող 199.1քմ մակերեսով տարածքն անհատույց օգտագործման իրավունքով 10 տարի ժամկետով տրամադրել «ՀԱՅ ՄԱՅՐԵՐ» բարեգործական հասարակական կազմակերպությանը: Տարածքը հանդիսանում է Երևան համայնքի սեփականությունը։ «ՀԱՅ ՄԱՅՐԵՐ» կազմակերպության նպատակն է աջակցել մանկական ուղեղային կաթված ախտորոշում ունեցող երեխաներին և նրանց ընտանիքներին։
Ավագանու «Բարգավաճ Հայաստան» խմբակցության անդամ Մարկոս Հարությունյանը բարձրացրեց իրեն դիմած Տելյան Սիրանուշի հարցը և նշեց, որ ամեն նիստին հույս է ունենում, որ նրանց անհատույց գույք տրամադրելու հարցը կփորձեն քննարկել: «Ես կողմնակից չեմ նվիրատվություն տալուն, այլ անհատույց կամ շատ փոքր վարձով տալուն»,-ասաց նա և նշեց, որ չի ցանկանում այնպիսի նախագծեր ներկայացնել, որ դեմ քվեարկեն, և մարդկանց ցույց տան, թե ինչ լավն են:
Անշարժ գույքի կառավարման վարչության պետ Արսեն Ամյանը նշեց, որ հանդիպել են տիկին Սիրանուշի հետ և կոչ արեց ներկայացնել նախագիծը:
Մարկոս Հարությունյանը նշեց. «Ինձ համար զավեշտը նրանումն է, որ Երևանի քաղաքապետարանը այդ գույքի տեղը չի իմացել, և դրա տեղը ցույց է տվել տիկին Սիրանուշը»: Մարկոս Հարությունյանը նշեց, որ այլևս մարդիկ չեն դիմի, այլ հարևանները կմտնեն և կապրեն այդպիսի տներում:
«Ես նախաձեռնությամբ հանդես կգամ, բայց կխնդրեմ դա որպես սաբոտաժ չդիտարկել: Ես ասացի, որ սկզբից չեմ ցանկացել նախագիծը ներկայացնեմ, որ կողքից տպավորություն չլինի, որ ես ամենասուրբն եմ, ամենալավն եմ ցանկանում»,-ասաց ավագանու անդամը:
Երևանի քաղաքապետ Հայկ Մարությանը նշեց, որ այստեղ ավագանու բոլոր անդամները բացի լավից, դրական էմոցիաներից, քաղաքին օգտակար լինելուց որևէ այլ բան չեն ուզում:
«Օրական ես 40-50 խնդրի եմ առնչվում, որ գիտեմ, թե արդար կլիներ այսպես լուծել, բայց օրենքը ինձ խանգարում է»,-ասաց նա և նշեց, որ քաղաքապետարանը մշակում է նոր օրենքներ: Հայկ Մարությանը նշեց, որ բոլոր անհատույց տրամադրված տարածքների նկատմամբ շատ խիստ հսկողություն է:
Տեղեկացնենք, «ՀԱՅ ՄԱՅՐԵՐ» բարեգործական հասարակական կազմակերպությունը քննարկվող տարածքը նախատեսում է օգտագործել որպես մանկական ներառական զարգացման կենտրոն, որտեղ կկարողանան հաճախել 2-6 տարեկան ինչպես հաշմանդամություն ունեցող, այնպես էլ չունեցող երեխաներ, իսկ կենտրոնի աշխատակիցների մեծ մասը լինելու են հաշմանդամություն ունեցող երեխաների ծնողները: Կազմակերպությունը նպատակ է հետապնդում նաև մանկական ուղեղային կաթված ունեցող երեխաներին տրամադրել վերականգնողական բուժում ներառական ծրագրով և ստեղծել երեխաների զարգացման նոր մոդել:
Հարկ է նշել, որ կազմակերպությունը պարտավորվել է անհատույց օգտագործման իրավունքը գրանցելուց և անհրաժեշտության դեպքում շինարարության թույլատվություն ստանալուց հետո առնվազն 4-6 ամսվա ընթացքում սկսել շինարարությունը և ավարտել ոչ ուշ, քան այն սկսելուց հետո 18 ամսվա ընթացքում, յուրաքանչյուր 6 ամիսը մեկ ներկայացնել հաշվետվություն գործունեության և կատարված աշխատանքների վերաբերյալ, ինչպես նաև աշխատանքներն ավարտելուց հետո տարածքն օգտագործել բացառապես որպես մանկական ներառական զարգացման կենտրոն: