Հայաստանում կիրականացվի Ֆիզիկական արհեստական բանականության 7-ամյա ծրագիր
Հայաստանում նախատեսվում է իրականացնել Ֆիզիկական արհեստական բանականության զարգացման յոթնամյա ծրագիր, որի շրջանակում կձևավորվեն գիտահետազոտական և կրթական նոր հնարավորություններ, կզարգացվեն ռոբոտաշինության ոլորտի մասնագիտական կարողությունները և կխթանվի նոր տեխնոլոգիական լուծումների մշակումը։ Ծրագրի ընդհանուր արժեքը շուրջ 4.8 միլիարդ դրամ է։ Այն նախատեսվում է իրականացնել պետություն-մասնավոր հատված համագործակցությամբ՝ երեք բուհերի մասնակցությամբ։
Ծրագրում ընդգրկված են Երևանի պետական համալսարանը, Հայաստանի ազգային պոլիտեխնիկական համալսարանը և Հայաստանի ամերիկյան համալսարանը։ Նախաձեռնության նպատակն է Հայաստանում ձևավորել ֆիզիկական արհեստական բանականության ոլորտում միջազգային մրցունակ գիտակրթական և տեխնոլոգիական միջավայր։
Ֆիզիկական արհեստական բանականությունը (Physical AI) արհեստական բանականության և ռոբոտաշինության հատման ոլորտն է։ Այն վերաբերում է այնպիսի համակարգերին, որոնք ոչ միայն մշակում են տեղեկատվությունը, այլև կարողանում են ընկալել ֆիզիկական միջավայրը, որոշումներ կայացնել և գործողություններ իրականացնել իրական աշխարհում։ Դրանց թվում են ինքնավար ռոբոտները, արտադրական խելացի համակարգերը և տարբեր միջավայրերում ինքնուրույն գործելու ունակ սարքերը։
Ըստ ԵՊՀ Մաթեմատիկական և կիրառական հետազոտությունների կենտրոնի մեքենայական ուսուցման լաբորատորիայի խմբի ղեկավար Հրանտ Խաչատրյանի, ռոբոտաշինությամբ անմիջականորեն զբաղվող ընկերությունների թիվը սահմանափակ է, սեփական ռոբոտաշինական արտադրանք մշակող կազմակերպությունները քիչ են, իսկ բուհերում ռոբոտաշինության ուղղությամբ սովորող ուսանողների թիվը չի գերազանցում 100-ը։ Նշվում է նաև գիտահետազոտական ներուժի մասնատվածության և կրթության, գիտության ու մասնավոր հատվածի միջև համագործակցության ոչ բավարար մակարդակի մասին։
Յոթնամյա ծրագրի ընդհանուր ֆինանսավորումը նախատեսվում է շուրջ 4.8 միլիարդ դրամի չափով։ Առաջին տարվա պետական ֆինանսավորումը կկազմի 168.4 միլիոն դրամ։ Ծրագրի շրջանակում նախատեսվում է նաև շուրջ 484.2 միլիոն դրամի կապիտալ ներդրում՝ լաբորատոր ենթակառուցվածքների զարգացման համար։ Այս մասին նշվում է ասուլիսի ժամանակ։
Ակնկալվում է նաև, որ ծրագրի արդյունքում կստեղծվի առնվազն հինգ ստարտափ կամ նոր տեխնոլոգիական ընկերություն։ Ծրագրի կարևոր բաղադրիչներից մեկը մասնագետների պատրաստումն է։ Նախատեսվում է կրթական տարբեր մակարդակներում ձևավորել համապատասխան մասնագիտական ուղղություններ՝ ապահովելով գիտական հետազոտությունների և կիրառական տեխնոլոգիաների մշակման հնարավորություններ։ Միաժամանակ, ծրագրի արդյունավետությունը կախված կլինի ոչ միայն մասնագետների պատրաստումից, այլև նրանց գիտելիքները գործնականում կիրառելու պայմանների ստեղծումից։
ARCS.ai ռոբոտաշինության և արհեստական բանականության հետազոտական կենտրոնի ծրագրերի ղեկավար Անիկ Մարգարյանի անդրադարձով՝ առանձնահատուկ նշանակություն ունի նաև մասնավոր հատվածի ներգրավումը։ Ռոբոտաշինության ոլորտի զարգացումը պահանջում է ոչ միայն գիտական հետազոտություններ և կրթական ծրագրեր, այլև այնպիսի միջավայր, որտեղ մշակված լուծումները կարող են կիրառվել արտադրության մեջ, վերածվել տեխնոլոգիական արտադրանքի և դուրս գալ միջազգային շուկա։
Ծրագրի ավարտին դրա արդյունավետությունը գնահատվելու է ոչ միայն պատրաստված մասնագետների, գիտական հրապարակումների կամ արտոնագրերի թվով, այլև այն հանգամանքով, թե որքանով կհաջողվի գիտահետազոտական ներուժը վերածել կիրառական տեխնոլոգիական լուծումների և Հայաստանում ձևավորել մրցունակ ռոբոտաշինական էկոհամակարգ։


















































Հեռուստահաղորդավարուհուն գտել են արյան մեջ՝ իր ննջասենյակում. ամուսինը ձերբակալվել է սպանության կասկ...
ԿԳՄՍ նախարարի շնորհավորական ուղերձը Գիտության համաշխարհային օրվա առթիվ
Բարսելոնային անհրաժեշտ է մատչելի վարձակալություն կամ շահավետ տրանսֆերային գործարք
Իրազեկում․ Այվազովսկու փողոցում տեղադրվել է տեսանկարահանող տեխնիկական միջոց
Ջամալ Մուսիալան կարող է ժամանակից շուտ ավարտել պրոֆեսիոնալ կարիերան
Գևորգ Ղազարյանը հատուկ տեսաուղերձով դիմել է ֆուտբոլային հանրությանն ու հանդես եկել հայտարարությամբ (...
Անչափահասին ուղեվարձը չվճարելու պատճառաբանությամբ ավտոբուսից իջեցնելու դեպքի հանգամանքները կուսումնա...
Գերմանիան արգելել է չինական մեքենաների մուտքը ռազմական օբյեկտներ
Ընդդիմադիր ուժերի համախմբումը և քաղաքական սերնդափոխության անհրաժեշտությունը
Ընթանում է ՀՀ վարչապետի և Ֆրանսիայի նախագահի հանդիպումը