3․600 բնակիչ ու ընդամենը մեկ միկրոավտոբուս

Լոռու մարզի Դսեղ, Դեբեդ ու Եղեգնուտ գյուղերը զրկվել են մարզկենտրոնին կապող միակ ավտոբուսից։ Այն անսարք է, իսկ 3․000-ից ավելի բնակչություն ունեցող համայնքներին սպասարկում է ընդամենը մեկ միկրոավտոբուս։ «Ռադիոլուր»-ին ահազանգած բնակիչները ասում են, որ չեն կարողանում ժամանակին հասնել Վանաձոր, իսկ տաքսիներից օգտվելը թանկ հաճույք է։ Երթուղին սպասարկող կազմակերպությունը վստահեցրել է, որ ավտոբուսը կնորոգեն, և այն նորից կշահագործվի։

3․600 բնակիչ ու ընդամենը մեկ միկրոավտոբուս․ Լոռու մարզի երեք գյուղ՝ Դսեղը, Դեբեդն ու Եղեգնուտը, մնացել են այդ մեկ փոքր փոխադրամիջոցի հույսին։ Դսեղը 2․000 բնակիչ ունի, Դեբեդում ու Եղեգնուտում էլ միասին 1․500 բնակիչ կա, իսկ սպասարկող միակ ավտոբուսը կրկին անսարք է․ 

«Մի քանի գյուղի միացյալ մեկ ավտոբուս է տրամադրվում, այն էլ հաճախակի փչանում է։ Ընդամենը մի «Գազել» է տրամադրվում, այն էլ՝ ոչ բոլորն են կարողանում տեղավորվել։ Գյուղացիները չեն կարողանում օգտվել ու չգիտեն՝ ինչպես հասնեն Վանաձոր»։

Ավտոբուսն այս երթուղին սպասարկում է չորս տարի։ Բնակիչներն ասում են, որ առաջին անգամը չէ, որ այն տեխնիկական խնդիրներ է ունենում անգամ ընթացքի ժամանակ։ Երթուղին սպասարկող ընկերությունը «Փամբակ կոմունալ»-ն է։ Կազմակերպության տնօրեն Սարգիս Հակոբյանը վստահեցնում է, որ անսարք ավտոբուսն անմիջապես փոխարինվել է պահուստային մեքենայով․

«Վաղը կամ մյուս օրը ավտոբուսն արդեն դուրս կգա, իր բնականոն հունով կաշխատի։ Նոր մեքենա է, ռուսական։ Մի քիչ, չգիտեմ, իր դիմացկունությունը չի լավ, թե ինչ։ Եղել են դեպքեր, երբ հաճախակի ինքը փչացել է։ Այս պահին էլ ինքը փչացել է, բայց վերանորոգման ընթացքի մեջ է»։

Մինչև այդ՝ մարդիկ դժվարությամբ տեղավորվում են միկրոավտոբուսում։ Այն առավոտյան Դսեղից գնում է Դեբեդ, Եղեգնուտ, անցնում է Վահագնաձորով, Փամբակով և այլ բնակավայրերով։ Այդ գյուղերից ամեն օր ուսուցիչներ, ուսանողներ են գնում հարևան գյուղեր կամ Վանաձոր․

«Ես անհրաժեշտության դեպքում տաքսի ծառայությունից եմ օգտվում, որը 3000 դրամ է մի կողմը։ Լոռվա մարզպետին կխնդրեի մի հարմար ավտոբուս տրամադրեր մեր գյուղերի համար»։

Չինական 45 ավտոբուսներ շուտով կհասնեն Լոռու մարզ։ Բայց դրանք նախատսված են Վանաձորի համար։ Այս լուրը վանաձորցիներին հայտնել էր Լոռու մարզպետ Արեն Մկրտչյանը․

«Չորս միլիոն 700 հազար դոլար ներդրմամբ համայնքային միջոցներով ձեռք են բերվում այս ավտոբուսները, և այս ձեռքբերումը հնարավոր դարձավ այն պատճառով, որ կառավարությունը Վանաձորի դոտացիան 2018-2026 թթ․՝ 8 տարում ավելացրել է մոտ 2,5 մլրդ դրամով»։

Արդյոք նոր ավտոբուսներից գոնե մեկը կտրամադրվի շրջակա գյուղերին՝ դժվար է ասել, ուստի մարդիկ անհամբերությամբ սպասում են իրենց հնամաշ փոխադրամիջոցին։

armradio.am