Ես կադրերի հարցում կոմպլեքս չունեմ, ինձ հետ քայլել են, թե չեն քայլել. Եթե պետք լինի՝ կազատեմ. Փաշինյան
Ես կադրերի հարցում կոմպլեքս չունեմ, ինձ հետ քայլել են, թե չեն քայլել: Այս մասին այսօր՝ մայիսի 8-ին, իր մեծ ասուլիսում հայտարարեց ՀՀ վարչապետ Նիկոլ Փաշինյանը:
Մասնավորապես, լրագրողը դիմելով վարչապետին սկսեց թվարկել կառավարության կադրային քաղաքականության թերությունները՝ նշելով, որ մասնավորապես, դեսպանների պաշտոններում շարունակում են մնալ մարդիկ, որոնք քքաղաքական գործիչներ են եղել, դիվանագետներ չեն (Գեղամ Ղարիբջանյան, Ռուբեն Սադոյան, Արտաշես Թումանյան): «Դուք նշում ենք, որ ԵՊՀ ռեկտորը պետք է հեռանա, բայց նրանից ավելի տարեց ռեկտոր, Պոլիտեխնիկի 73-ամյա ռեկտորի եւ ձեր միջեւ ջերմ հարաբերություն տեսանք: Որոշ պաշտոնյաներ աղմկոտ պատմությունների մեջ են հայտնվում՝ Արարատի մարզպետը, Քաղավիացիայի պետ Ռեւազյան, որը իր աշխատողների հետ լատինատառ հայերենով է շփվում: Արաբկիրի թաղապետի դեմ ողջ կոլեկտիվը ըմբոստանում է, բայց դուք չեք ուզում վերանայել ձեր կադրային քաղաքականությունը»,-նշեց «Հրապարակ» թերթի լրագրողը:
Ի պատասխան Նիկոլ Փաշինյանն ասաց. «Հայաստանի կեսը մյուս կեսի հետ լատինատառ է շփվում: Մենք պաշտոնական նամակագրության մեջ ենք, ինքը ոչ մի անգամ ինձ լատինատառ նամակ չի գրել: Եթե տեղյակ եք, ինձ ցույց տվեք լատինատառ նամակը, ես կհասկանամ, թե ինչ է: Այո, մարդը կարող է ինչ-որ թվի չտիրապետի, եւ ի՞նչ: Ասում եք՝ պաշտոն եք տալիս ինձ հետ քայլողներին: Հիմա Գեղամ Ղարիբջանյանն ինձ հետ քայլե՞լ է:
Ես ձեր ասածից հասկանում եմ, որ պետք է գործից ազատեմ նրանց, ովքեր ինձ հետ քայլել են, նրանց, որոնք չեն քայլել, գործից ազատեմ նրանց, որոնք երիտասարդ են եւ ազատեմ նրանց, որոնք տարիքով են:
Ես կգնահատեմ եւ երբ կտեսնեմ, որ աշխատանքի արդյունավետությունը բարձրացնելու միջոցները սպառված են, այնտեղ, որտեղ պետք է ազատեմ աշխատանքից, կազատեմ: Բայց շատ հաճախ մեծ աղմուկ կա, բայց երբ ուզում ես հասկանաս, թե տակն ինչ կա, պարզվում է, ոչ մի բան չկա»:
Փաշինյանը վստահեցրեց, որ կադրային հարցում կոմպլեքս չունի, թե ով է իր հետ քայլել, ոչ չի քայլել. «Մյուս դեպքում էլ ասում են՝ ոնց կլինի, Դավիթ Սանասարյանն այդքան քայլել է, գործ եք հարուցել: Մի դեպքում ասում եք՝ քայլել է, գործից չեք ազատում, մի դեպքում էլ ասում եք՝ էդ երիտասարդին ինչի՞ եք այդ գործին նշանակել: Կամ ասում եք՝ 73 տարեկան է, ինչու գործից չեք ազատում: Դիվանագետների մասով ես ասել եմ, որ նոր նշանակումները եղել են մեր նշած չափանիշին համապատասխան»: