Պաշտպանները կդիմեն Վճռաբեկ դատարան՝ պահանջելով վերանայել Քոչարյանի խափանման միջոցի գործով նոյեմբերի 15-ի որոշումը

ՀՀ երկրորդ նախագահ Ռոբերտ Քոչարյանի պաշտպանները ՍԴ վերջին որոշումը ստանալուց հետո հանարովոր է դիմեն Վճռաբեկ դատարան՝ պահանջելով վերանայել Քոչարյանի խափանման միջոցի գործով Վճռաբեկ դատարանի նոյեմբերի 15-ի որոշումը։ Այս մասին այսօր՝ մայիսի 8–ին NEWS.am–ին հայտնեց Ռոբերտ Քոչարյանի փաստաբանական թիմի անդամ Հովհաննես Խուդոյանը։

«Սահմանադարական դատարանի որոշման եզրափակիչ մասում ուղղակիորեն նշված է, որ որոշումը հիմք է հանդիսանում նոր հանգամանքի ուժով բողոք ներկայանցլու համար»,–ասաց նա՝ նշելով, որ պաշտպանական թիմը որոշումը ստանալուց հետո կքննարկի բողոք ներկայացնելու հարցը։

Հիշեցնենք, որ երեկ՝ մայիսի 7–ին ՀՀ Սահմանադրական դատարանը քննության առնելով ՀՀ երկրորդ նախագահ՝ Ռոբերտ Քոչարյանի դիմումը ՀՀ քրեական դատավարության օրենսգրքի 419-րդ հոդվածի 2-րդ մասի վերաբերյալ, որոշեց, որ ՀՀ վճռաբեկ դատարանը գործն ըստ էության չլուծող դատական ակտերի վերաբերյալ կայացնում է վերջնական դատական ակտ և հենց այդ մեկնաբանությամբ նորմը համապատասխանում է ՀՀ Սահմանադրության պահանջներին:

Սահմանադրական դատարանի այս դիրքորոշումը նշանակում է, որ գործն ըստ էության չլուծող դատական ակտերի, այդ թվում՝ կալանքը որպես խափանման միջոց ընտրելու մասին որոշումների բողոքարկման դեպքում Վճռաբեկ դատարանը չի կարող գործը ուղարկել նոր քննության, այլ ինքը պետք է կայացնի վերջնական որոշում:

Սահմանադրական դատարանը նաև նշել է, որ հաշվի առնելով այն հանգամանքը, որ օրենքը Ռոբերտ Քոչարյանի նկատմամբ Վճռաբեկ դատարանի կողմից կիրառվել է այլ՝ Սահմանադրական դատարանի մեկնաբանությունից տարբերվող մեկնաբանությամբ, Ռոբերտ Քոչարյանի նկատմամբ կայացված դատական ակտը նոր հանգամանքի ի հայտ գալու հիմքով ենթակա է վերանայման՝ օրենքով սահմանված կարգով:

Հիշեցնենք որ 2018 թվականի նոյեմբերի 15-ին Վճռաբեկ դատարանը, քննելով Քոչարյանի խափանմ,ան միջոցի վերաբերյալ դատախազի և պաշտպանական կողմի բողոքները, որոշել էր գործն ուղարկել Վերաքննիչ դատարան՝ նոր քննության: Արդյունքում Քոչարյանին նորից կալանավորելու որոշում էր կայացվել: