Եթե վարչապետը որևիցե վայրկյան չվստահի ինձ, ես անձեռնմխելի չեմ, այդ վայրկյանից ինձ կազատի իմ զբաղեցրած պաշտոնից․ Դավիթ Սանասարյան
Պետական վերահսկողական ծառայությունը ավարտել է 2՝ Արմավիրի և Էջմիածին ջրօգտագործողների մոտ իրականացվող ուսումնասիրությունը, և երկուսի մոտ էլ հայտնաբերվել է ավելի քան 1 միլիարդ դրամի խախտումներ: Այս մասին Կառավարությունում լրագրողների հետ զրույցում ասաց ՊՎԾ պետ Դավիթ Սանասարյանը:
«Ուսումնասիրությունները 2014-2018 թվականների վերաբերյալ է, և երկուսի մասով վերականգնման է ենթակա ավելի քան 2 միլիարդ դրամի գումար»,- ասաց նա:
Դավիթ Սանասարյանը խոսեց նաև քրեական գործի մասին, որի հետ առնչություն ինքն էլ ունի: «Քրեական գործի մանրամասների վերաբերյալ չեմ կարող խոսել, որովհետև նման պարտավորություն ունեմ, բայց դա չի ենթադրում, որ պետք է ինֆորմացիայի արտահոսք լինի, և ես չկարողանամ համապատասխան տեղեկատվություն տալ, որպեսզի չկարողանան որևիցե ձևով իմ բարի համբավի վրա բիծ անեն: Դա ձեռք է բերվել տասնյակ տարիների պայքարի արդյունքում, դա ձեռք է բերվել սկզբունքային և ազնիվ ապրելու արդյունքում և չեն կարող, ինչ նախաքննական մարմին ուզում է լինի, ինչ ցուցմունք տվող ուզում է լինի, չեն կարող դրա վրա խազ քաշել»,- ասաց նա:
Նա նշեց, որ ինքը համաձայն չէ քրեական գործի հետ, և ինքը վիճարկելու է համապատասխան իրավական ընթացակարգերով:
Քրեական գործում իր կարգավիճակի մասի, ըստ Դավիթ Սանասարյանի, հարցեր պետք է տալ ԱԱԾ-ին, քանի որ դա նախաքննական գաղտնիք է: «Ես արդեն հարցաքննվել եմ, առերեսվել եմ: Ասել եմ՝ ինչ ինձ հայտնի է»,- ասաց նա:
Դավիթ Սանասարյանի խոսքով ՝որևիցե մեկը, որևիցե կառույց չի կարող իրեն որևիցե կոռուպցիոն երևույթի հետ կապել: «Ես ինքս մերժում եմ կոռուպցիոն ցանկացած երևույթ, և ինչպես ասել եմ մեկ անգամ էլ, հատկապես հեգնողներին ասեմ, որ գերեզմանում էլ լինում՝ իմ անունը պայքարելու է կոռուպցիայի դեմ»,- ասաց նա:
Փորձ են անում ստեղծել մի իրավիճակ, որի արդյունքում էմոցիոնալ իրավիճակում պետք է դուրս գա վարչապետի դեմ: «Այդպիսի բան չի կարող լինել: Ես վարչապետին վստահում եմ, դրա համար եմ այստեղ,- ասաց նա՝ ապա հավելեց, որ ՊՎԾ ունի ֆունկցիաներ, որ օրենքի շրջանակում կարող է շատերի «ոտքերը տրորի»,-շատերը չեն ցանկանում, որ սկզբունքային, մաքուր մարդ լինի, երբևիցե որևիցե գործարարների մեջ չմտած մարդ լինի: Բայց դա իրենց գործն է: Ես չեմ ուզում իմ կասկածների մասին հնչեցնել: Երբ կտեսնեմ, որ դա համակարգային բնույթ ունի, ես չեմ վախենա գործողություններ անելուց: Ինքս իմ քայլերի համար հայտնվել եմ քրեակատարողական հիմնարկում: Հիմա էլ չեմ վախենում: Ես բացառում եմ, որ ես կարող եմ կոռուպցիայի մեջ լինել»:
Հեմոդիալիզների թեմայի հետ կապված էլ ՊՎԾ պետը նշեց, որ ամփոփ տեղեկատվությունը ներկայացվել է դատախազությանը: «Դատախազությունն այս պահին նյութեր է հավաքում հետագա իրավական գնահատական տալու հետ կապված: Վստահ եմ, որ այդ գործողությունը հենց այդ էությամբ էլ շարունակվելու է, որովհետև այնտեղ ակնհայտ են խախտումները: Այստեղ կոնկրետ շրջանակներ կան, որոնց ոտքերի կոշտուկները տրորվում են»,- ասաց նա:
Անդրադառնալով վարչապետ Փաշինյանի հետ իր հարաբերություններ մասին, թե արդյոք նշյալ քրեական գործը ազդել է դրանց վրա՝ Դավիթ Սանասարյանը նշեց, որ ինքը խոսել է վարչապետի հետ, ներկայացրել իր մտահոգությունները:
«Վարչապետը չպետք է խառնվի նախաքննական մարմիններին, սա օրենքի պահանջ է: Նա պետք է հետևի գործընթացներին: Եթե զգա, որ այլ ուղղությամբ է գնում, նա իր համապատասխան դիրքորոշումը կհայտնի: Եթե վարչապետը որևիցե վայրկյան չվստահի ինձ, ես անձեռնմխելի չեմ, այդ վայրկյանից ինձ կազատի իմ զբաղեցրած պաշտոնից: Եթե ես ինքս չվստահեմ վարչապետին, ինքս դիմում կգրեմ, կազատվեմ աշխատանքից: Բայց վստահության խնդիր չկա: Ընթանում է իրավական պրոցես, հետևում ենք դրան»,- ասաց նա: