Խուլիգանության մեջ մեղադրվող Նորատուսցի Արան արդարացում է պահանջում
Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ այսօր՝ ապրիլի 16–ին մեկնարկեց հանրության շրջանում Նորատուսցի Արա անունով հայտնի քրեական հեղինակություն Արա Բանդուրյանի մասնակցությամբ տեղի ունեցած խուլիգանության գործով առաջին դատական նիստը։
Ըստ մեղադրանքի՝ Արա Բանդուրյանը քննությամբ չպարզված անձից ապօրինի ձեռք բերած և կրած 9մմ տրամաչափի հրազեն հանդիսացող ատրճանակով 2018թ․ հոկտեմբերի 13-ին Երևան քաղաքի Հյուսիսային պողոտայում գործող «Հուկաման» ակումբում, այնտեղ գտնվող անձանց նկատմամբ բռնություն գործադրելու սպառնալիքով կատարել է խուլիգանություն։ Բանդուրյանին մեղադրանք է առաջադրվել Քրեական օրենսգրքի 258–րդ հոդվածի 4-րդ մասի և 235-րդ հոդվածի 1-ին մասի հատկանիշներով: Այսօրվա դատական նիստին չէր ներկայացել մեղադրող դատախազը. այդ հիմքով էլ այսօրվա դատակն նիստը հետաձգվեց և նշանակվեց մայիսի 23–ին։ NEWS.am–ի հետ զրույցում Արա Բանդուրյանը հայտնեց, որ չի պատրաստվում միջնորդել, որպեսզի գործը քննվի արագացված դատական կարգով։ Նա նշեց, որ չի ընդունում առաջադրված մեղադրանքը և այս գործով արդարացում է պահանջում։
Հիշեցնենք, որ հոկտեմբերի 16–ին Երևանի ընդհանուր իրավասության դատարանի որոշմամբ Արա Բանդուրյանը երկու ամսով կալանավորվել էր, սակայն մեկ ամիս անց 2 մլն դրամ գրավի կիրառմամբ ազատ արձակել կալանքից։
Նրա եղբայրը՝ Նորատուսցի Ալիկ անունով հայտնի Ալիկ Բանդուրյանը, որը մեղադրվում էր միջին ծանրության մարմնական վնասվածք հասցնելուն օժանդակելու համար, Երեւանի ընդհանուր իրավասության դատարանի դատավոր Նելլի Բաղդասարյանի 2018թ. դեկտեմբերի 18-ի դատավճռով՝ արդարացվեց, անմեղ հայտարարվեց եւ ազատ արձակվեց դատական նիստերի դահլիճից։