Ինչու է «Hyatt» միջազգային ապրանքանիշը դուրս գալիս Ջերմուկից. Պատճառը «Լիդիան»-ի աշխատակիցների հեռացո՞ւմն է
2015 թվականին Ջերմուկում բացված «Հայաթ Փլեյս Ջերմուկ» (Hyatt Place Jermuk) բարձրակարգ հյուրանոցն այլեւս հյուրանոցների «Հայաթ» ցանցում չի գործելու:
նման որոշում կայացրել են «Հայաթ» միջազգային բարձրակարգ հյուրանոցային ապրանքանիշի ներկայացուցիչները՝ հետեւելով մոտ մեկ տարվա ունեցած եկամուտներին։ Հյուրանոցն այսուհետ կկոչվի Grand Resort Jermuk:
Հիշեցնենք, որ հյուրանոցը կառուցվել էր միջազգային բարձրակարգ հյուրանոցային ապրանքանիշի պահանջներին համապատասխան եւ բաղկացած է 92 տարբեր կարգի համարներից, SPA-կենտրոնից, ջրաբուժարանից, ռեստորանից, լողավազաններից, սպորտային դահլիճներից։ Հյուրանոցի կառուցումը սկսվել էր դեռեւս 2009թ: Սեփականատերն ԱԺ նախկին պատգամավոր Սամվել Սարգսյանն է։
Որոշ տեղեկությունների համաձայն, «Հայաթ»-ի հեռանալու պատճառ կարող է լինել այն, որ «Լիդիան ինթերնեշնլ» ընկերության բազմաթիվ աշխատակիցներ երկար ժամանակ բնակվել են հյուրանոցում, իսկ 2018-ի հուլիս-օգոստոսից այլեւս չեն օգտվում հյուրանոցի ծառայություններին:
Արդյոք «Լիդիան Ինթերնեշնլ» ընկերութան աշխատակիցների հեռացումը Ջերմուկից ազդեց Հայաթ բրենդի վրա. մանրամասնում է «Լիդիան Ինթերնեշնլի» մամուլի պատասխանատուն։
«2016թ–ի վերջից մինչեւ 2017թ–ի վերջը ամսական 60–70 հազար դոլար փող ենք փոխանցել «Հայաթ Փլեյս Ջերմուկ» հյուրանոցին։ «Լիդիան Ինթերնեշնլ» ընկերության աշխատակիցները հիմնականում՝ մշտական եւ ժամանակավոր, մնացել են այս հյուրանոցում»,– NEWS.am-ի հետ զրույցում ասաց «Լիդիան Ինթերնեշնլ» ընկերության մամուլի պատասխանատու Աննա Սաղաբալյանը՝ ոչ հերքելով, ոչ հաստատելով տեղեկությունը, թե արդյոք «Լիդիան Ինթերնեշնլի» աշխատակցիների հեռանալով է «Հայաթ» բրենդը հեռացել Ջերմուկից, քանի որ հյուրանոցի եկամուտը նվազել է։
Նա մանրամասնեց, որ ի սկզբանե աշխատակիցներն օգտվել են այս հյուրանոցից, հատկապես, երբ սկսվել է շինարարությունը, հյուրանոցում մշտապես բնակվել է 15–20 մարդ, բացի այդ երեւանյան գրասենյակի աշխատակիցները, ընկերության ղեկավարները, արտասահմանյան հյուրերը մնացել են «Հայաթ Փլեյս Ջերմուկ» հյուրանոցում։
«Մենք ամիսն ունեցել ենք 800–1000 գիշերակաց ամսական, իսկ «Լիդիանի» ճամբարը կառուցելուց հետո 200 գիշերակաց ամսական։ Ունեինք աշխատակիցներ, որոնք բնակվելով այլ հյուրանոցներում, օգտվել են հենց «Հայաթի» սպորտային առաջարկներից։ Ամիսը մեկ անգամ բարձրաստիճան հյուրեր ենք ունեցել, հանդիպումներ, կոնֆերենասներ. սրահն ենք վարձակալել։ Ճամբարի կառուցումից հետո, երկար ժամանակ լանչ ենք պատվիրել «Հայաթից», մինչեւ մեր սեփական խոհանոցն ենք ունեցել»,– ասաց Աննա Սաղաբալյանը։
Ըստ նրա, «Լիդիան Ինթերնեշնլ» ընկերության աշխատակիցները, գրեթե միշտ, կլոր տարին, մնացել են հյուրանոցում, սեզոնայնություն չի եղել։
«Որպեսզի տուրիզմի վրա բացասական ազդեցություն չունենանք, մենք մեր աշխատակիցներին տարբեր հյուրանոցներում ենք բաշխել, եւ միայն «Մոսկվա» հյուրանոցի հետ ամբողջական պայմանագիր ունեինք. Հիմա այնտեղ գրեթե ոչ ոք չի մնում։ Անցած տարվա հուլիս–օգոստոսից, երբ ճանապարհները փակվեցին, հյուրանոցներում գրեթե մարդ չունենք»,– ասաց նա։
Մեր տեղեկություններով, «Լիդիան Ինթերնեշնլ» ընկերության աշխատակիցների աշխատավարձերը չեն կարողացել Ջերմուկ քաղաքի բանկոմատներն ապահովել, այնտեղ բացվել են բանկերի մասնաճյուղեր, ավելացվել է տարբեր բանկերի բանկոմատների քանակը՝ աշխատավարձերի ստացումն ապահովելու համար, այժմ խնդիր է նաեւ այս բանկերի մասնաճյուղերի եւ բանկոմատների աշխատանքի նպատակահարմարությունը, քանի որ կրճատվել է Ջերմուկում աշխատավարձ ստացողների քանակը։
Մեր աղբյուրը չբացառեց, որ այս բանկերը եւս փակեն իրենց մասնաճյուղերը Ջերմուկում։
Հիշեցնենք, որ «Հայաթ Փլեյս Ջերմուկը» իր ֆեյսբուքյան էջին հայտարարություն էր հրապարակել, որ 4 տարի Ջերմուկում աշխատելուց հետո մարտի 31–ի դրությամբ դուրս են գալու Ջերմուկից։
Այսօր արդեն «Ջերմուկի զբոսաշրջության զարգացման կենտրոնը» հաղարդագրություն է տարածել, որտեղ նշվում է, որ ««Ջերմուկի զբոսաշրջության զարգացման կենտրոնը» հերքում է մամուլում տարածված այն տեղեկությունը, թե «Լիդիան Արմենիա» ընկերության՝ Ջերմուկից հեռանալու պատճառով քաղաքում գործող հյուրանոցները դադարեցրել են իրենց գործունեությունը:
«Ինչ վերաբերում է այն տեղեկությանը, թե «Հայաթ Փլեյս Ջերմուկ»-ի գործունեության դադարեցման համար պատճառ է հանդիսացել «Լիդիան Արմենիա» ընկերության հեռանալը, ապա հայտնում ենք, որ դա չի կարող համապատասխանել իրականությանը։
Ժամանակին, չնայած այն հանգամանքին, որ «Լիդիան Արմենիա»-ի աշխատակիցներն օգտվում էին «Հայաթ Փլեյս Ջերմուկ»-ում առաջարկվող ծառայություններից, «Հայաթ Փլեյս Ջերմուկ»-ը դեմ էր արտահայտվել Ջերմուկում հանքարդյունաբերության առկայությանը եւ միացել էր հյուրանոցների տարածած այն հայտարարությանը, որում ասվում էր, որ դեմ են հանքի շահագործմանը։
Այսպիսով, փաստվում է, որ «Լիդիան Արմենիա»-ի գործունեության դադարեցումը բխում է Ջերմուկում գործող հյուրանոցների շահերից եւ «Լիդիան Արմենիա»-ի գործունեության դադարեցումը չէր կարող հիմք հանդիսանալ հյուրանոցների փակմանը»,– նշվում է «Ջերմուկի զբոսաշրջության զարգացման կենտրոնի հայտարարության մեջ: