Ե՞րբ և ու՞մ փողով է կառուցվելու Երևանի մետրոյի նոր կայարանը
«Թումոյի» այգու մերձակայքում մետրոյի նոր կայարան ունենալու ու ընդհանրապես մայրաքաղաքի տրանսպորտային հարցը կարգավորելու մասին այսօր ավագանու նիստից հետո խոսել է Երևանի քաղաղքապետ Հայկ Մարությանը: Նա ասել է, որ շատ հետաքրքիր առաջարկներ կան:
Մի տարբերակն այն է, որ նոր կայարանի հարցը կարելի է լուծել համայնքի ուժերով, որպեսզի սա պետության վրա բեռ չլինի։ Երկրորդ տարբերակն այն է, որ տնտեսվարողը ներդրումներ անի, շրջակայքում հին շենքերի փոխարեն նոր շենքեր կառուցվեն, և մետրոյի կայարան ունենալու արդյունքում տնտեսվարողը կարողանա բնակարաններն առավել թանկ գնով վաճառել։
«Այս առաջարկը կոնկրետ տնտեսվարող է արել, համատեղ հետագա գործողությունների պլան ենք մշակում։ Աշխատում ենք նաև ճոպանուղի ունենալու ուղղությամբ։ Ես շատ եմ ուզում, որ ունենանք։ Տրանսպորտի համակարգի հետ կապված կարող եմ ասել, որ իմ առաջին տեղակալը մեկ շաբաթով երեկ մեկնել է Պրահա՝ ամբողջությամբ ուսումնասիրելու համակարգը։ Նաև նոր հանձնաժողով է ստեղծվում, այսինքն՝ այս ուղղությամբ սկսվում են կոնկրետ քննարկումներ»: