Շոկոլադ ենք գնել․ Փաշինյանի դուստրը՝ բրյուսելյան այցի ու ծախսերի մասին

ՀՀ վարչապետի ավագ դուստրը կառավարական պատվիրակության հետ Բրյուսել մեկնել է ոչ թե իր խնդրանքով, այլ ծնողների առաջարկով։ Այս մասին մարտի 18-ին Ազատություն ռադիոկայանի ֆեյսբուքյան ասուլիսին ասել է Մարիամ Փաշինյանը՝ պատասխանելով հարցին, թե ինչու են ընտանիքով գնում պաշտոնական այցերի:

«Այնպես չի եղել, որ ասել եմ՝ խնդրում եմ ինձ Բրյուսել տարեք կամ ուզում եմ Բրյուսել գալ, ինձ համար իսկապես տարբերություն չկա, որովհետեւ այս շրջանում մեր կյանքում այնպիսի իրավիճակ է, որ ամեն ինչ քաոսային է, այսինքն՝ ինձ համար տարբերություն չկա՝ ինչով կգնամ, ուր կգնամ, ինչպես կգնամ։ Բրյուսել գնացել եմ իմ ծնողների առաջարկությամբ, քանի որ մեր ընտանիքում այսօր կա իրար տեսնելու, իրար հետ շփվելու, նորմալ ժամանակ անցկացնելու խնդիր։ Տանը չենք կարողանում նորմալ շփվել իրար հետ, քանի որ անընդհատ աշխատում են ծնողներս, ես էլ եմ աշխատում, այսինքն՝ շատ մասնատված ենք հիմնականում լինում։ Նույն պատճառներն են, որոնց մասին մայրս արդեն խոսել է»,- ասել է Մարիամ Փաշինյանը։

Նա նաեւ նշել է, թե սուտ են տեղեկությունները, թե «թանկանոց գնումներ են արել», ասել է շոկոլադ ենք գնել եւ Ստարբաքսի սուրճ խմել․ «այսինքն՝ ոչ մի այդպիսի գնում չենք արել, նույնիսկ մայրս ինձ հետ երկար չզբոսնեց, եւ ես շատ դժգոհ էի այցից հետո»։

Լրագրողի հարցին, թե արդյոք մտավախություն չի ունեցել, որ այդ այցը կքննադատվի, պատասխանել է․ «Այո, մտավախություններ ունեի, մտածում էի, ճիշտ է՝ գնալը թե ոչ, բայց նաեւ հասկանում էի, որ քննադատոթյունը միշտ կլինի։ Կարծում եմ՝ էլ երբեք ծնողներիս հետ ոչ մի տեղ չեմ գնա, քանի որ պաշտոնական միջավայրը ինձ շատ ճնշում է, նախընտրում եմ մենակ ճամփորդել»։