Քաղաքաշինության կոմիտեում քննարկել են Երեւանի կառուցապատման հարցում միասնական մոտեցումները

Աշխարհի բոլոր քաղաքներում առաջնահերթ խնդիր է տրանսպորտի երթեւեկության կազմակերպման, ինչպես նաեւ ավտոմեքենաների կայանման հարցը: Խնդիրը չի շրջանցել նաեւ մեր մայրաքաղաքը` այն սուր է հատկապես Երեւանի կենտրոնում. բակերում, անթույլատրելի վայրերում, մայթեզրերին՝ փողոցների երկարությամբ կայանած ավտոմեքենաները ոչ միայն նվազեցնում են փողոցի թողունակությունը, այլեւ անցանկալի հետք թողնում քաղաքի դիմագծի վրա:

Մայրաքաղաքին առնչվող այս եւ մի շարք այլ հարցեր են քննարկվել քաղաքաշինության ոլորտի գերատեսչությունում:
Քաղաքաշինության կոմիտե են այցելել փոխվարչապետի խորհրդական Ավետիք Էլոյանը, Երեւանի գլխավոր ճարտարապետ Արթուր Մեսչյանը, քաղաքապետի խորհրդական Կամո Արեյանը, «Երեւաննախագիծ» ՓԲԸ տնօրեն Սիրեկան Օհանյանը, քաղաքապետարանի համապատասխան ստորաբաժանումների ներկայացուցիչներ:
Քննարկվել են Երեւան քաղաքի գլխավոր հատակագծով սահմանված գոտեւորմամբ նախատեսված՝ բազմաբնակարան շենքերի հարկայնության սահմանափակման վերանայման հնարավորության, ստորգետնյա եւ վերգետնյա ավտոկայանատեղերի կառուցման, ինչպես նաեւ Մոնթե Մելքոնյան պողոտայից Ծովակալ Իսակովի պողոտա տանող ճանապարհի ձախակողմյան հատվածում միասնական կառուցապատման ծրագրեր իրականացնելու հնարավորության հարցերը:

Քաղաքաշինության կոմիտեի նախագահի պարտականությունները կատարող Արմեն Ղուլարյանը նշել է, որ երկու կառույցների ներկայացուցիչների հանդիպումները պարբերական բնույթ են կրելու, ինչը թույլ կտա փոխըմբռնման մթնոլորտում միասնական լուծումներ առաջարկել մայրաքաղաքի տարբեր հատվածների կառուցապատման, հրատապ այլ խնդիրների վերաբերյալ: