Հայաստանում աճում է պատվաստումների հակառակորդների թիվը. փորձագետը 10 տարի հետո լուրջ հետեւանքներ է կանխատեսում
Հայաստանում աճում է պատվաստումների հակառակորդների թիվը: Ինչպես հայտնեց ՀՀ ԱՆ Իմունոպրոֆիլակտիկայի ազգային ծրագրի ղեկավար Գայանե Սահակյանը, այսօրվա դրությամբ բնակչության պատվաստման ցուցանիշը կազմում է 96 տոկոս:
2018 թվականին, ինչպես եւ 2017-ին, պատվաստման մակարդակը 2 տոկոսով նվազել է: Գուցե թվա, թե ընդհանուր 4 տոկոսը բարձր ցուցանիշ չէ, սակայն 8-10 տարի հետո դա կարող է լուրջ հետեւանքներով շրջվել: «Եթե նման միտումը պահպանվի, ապա 10 տարի հետո Հայաստանում կբնակվի անձանց պատկառելի թիվ, որոնց օրգանիզմը այս կամ այն ինֆեկցիայից պաշտպանված չէ: Արդյունքում՝ Հայաստանը կարող է բախվել նույնպիսի իրավիճակի, ինչպես Վրաստանում, որտեղ այսօրվա դրությամբ դիտվում է կարմրուկի բռնկում»,- մարտի 11-ին տեղի ունեցած մամուլի ասուլիսի ժամանակ նշեց Սահակյանը:
Հակապատվաստումային շարժումն ամբողջ աշխարհում լուրջ խնդիր է: Այս կամ այն պատվասատանյութի «վտանգավորության» մասին տեղեկություններն առավել հաճախ տարածվում են համացանցի միջոցով, ընդ որում՝ նման տեղեկությունների հետեւում հաճախ կանգնած են չիրազեկված մարդիկ: Պատահական չէ, որ Facebook-ը, YouTube-ը եւ Google-ը հայտարարել են հրապարակված կոնտենտի վերահսկումը խստացնելու մասին՝ նման կարգի ապատեղակատվության դեմ պայքարելու համար:
«Հարկավոր է հիշել, որ կարմրուկի դեմ պատվաստանյութի երկու դեղաչափը օրգանիզմն այդ վարակից պաշտպանում է ամբողջ կյանքում»,- շեշտեց Սահակյանը:
Փորձագետը չբացառեց այն հավանականությունը, որ հակապատվաստումային շարժման հետեւում կանգնած են խոշոր դեղագործական ընկերությունները, քանի որ բուժման ամբողջական կուրսի դեղերը պատվաստանյութից անհամեմատ ավելի թանկ արժեն:
Սահակյանն ընդունեց, որ եզակի չեն դեպքերը, երբ պատվաստման «վնասի» մասին խոսում են իրենք՝ բուժաշխատողները: «Ընդ որում՝ նրանք նեղ մասնագիտացում ունեն (սրտաբանություն, վիրաբուժություն եւ այլն) եւ իմունոլոգիայի ոլորտի փորձագետներ չեն, ուստի պատվաստմանը վերաբերող խորհուրդներ հրապարակել չեն կարող»,- ասաց նա:
Բուժաշխատողների իրազեկվածությունը մեծացնելու համար Հայաստանում ընթացիկ տարվա սեպտեմբերից բոլոր կլինիկական օրդինատորները իմունացման մեկշաբաթյա դասընթաց կանցնեն: