Տաթևիկ Ռևազյանի եվրոպական ոչինչ չասող վոյաժները
«168 Ժամ»-ը գրում է․
«Հետաքրքիր մանրամասներ են ի հայտ գալիս ՀՀ Քաղաքացիական ավիացիայի պետական կոմիտեի երիտասարդ տնօրեն Տաթևիկ Ռևազյանի աշխատանքային գործունեության վերաբերյալ։
Այսպես, վերջինս ս/թ փետրվարի 12-14-ը՝ Բրյուսել (Բելգիա) և 2019 թվականի փետրվարի 15-16-ը՝ Դուբլին (Իռլանդիա) գործուղման է մեկնել Եվրոպայի աերոնավիգացիոն անվտանգության կազմակերպության («Եվրակոնտրոլ» կազմակերպություն)՝ Բրյուսել (Բելգիա) և «ՌյանԷյր» ավիաընկերության՝ Դուբլին (Իռլանդիա) հրավերով։
Որպես այցի նպատակ՝ Կառավարության կայքում նշվում է՝ հանդիպում «Եվրակոնտրոլ» կազմակերպության գլխավոր տնօրենի, ինչպես նաև մի շարք այլ բարձրաստիճան ներկայացուցիչների հետ՝ ՀՀ կողմից «Եվրակոնտրոլ» կազմակերպության մշտական հանձնաժողովի նախագահությունը ստանձնելու կապակցությամբ: Հանդիպում մշտական հանձնաժողովի քարտուղարի հետ, որի հետ քննարկվել են 2019թ. ընթացքում ՀՀ կողմից մշտական հանձնաժողովի նախագահության շրջանակներում աշխատանքների իրականացման ընթացակարգերը։ Հանդիպում Եվրահանձնաժողովի ներկայացուցիչներ Ֆիլիպ Կորնելիսի և Կլաուս Գեյլի հետ, որոնց հետ քննարկվել են Եվրոպական ընդհանուր ավիացիոն գոտու համաձայնագիրը։
Հանդիպում «ՌյանԷյր» ավիաընկերության ներկայացուցիչների հետ, որի ընթացքում քննարկվել են քաղաքացիական ավիացիայի և օդանավակայանների զարգացման ոլորտում Հայաստանի հետ համագործակցության հնարավորությունները։
Հիմա ամենահետաքրքիրը։ Ի՞նչ է քննարկվել։
Բրյուսել, Բելգիա՝
Քննարկվել են ՀՀ կողմից մշտական հանձնաժողովի նախագահության շրջանակներում աշխատանքների իրականացման ընթացակարգերը: Եվրոպական ընդհանուր ավիացիոն գոտու համաձայնագիրը: Քննարկվել է նաև Քաղաքացիական ավիացիայի կոմիտեի (այսուհետ՝ Կոմիտե) ինքնաֆինանսավորման հնարավորությունները: Քննարկումներ նոր ծրագրերի և համագործակցության ուղղությունների ընդլայնման վերաբերյալ։
Դուբլին, Իռլանդիա՝ Քննարկվել են քաղաքացիական ավիացիայի և օդանավակայանների զարգացման և ապագա համագործակցության հնարավորությունները։
Հանդիպման կամ հավաքի ժամանակ ընդունված որոշումները, պայմանավորվածությունները, ստորագրված փաստաթղթերը.
Բրյուսել, Բելգիա
Ձեռք է բերվել պայմանավորվածություն «Եվրակոնտրոլ» կազմակերպության կառավարման ոլորտի առաջատար մասնագետների կողմից Հայաստան այցի վերաբերյալ։ Այցի ընթացքում կուսումնասիրվեն Կոմիտեի հնարավոր ապագա կարգավիճակը. ինստիտուցիոն փոփոխություններ, ինչպես նաև Կոմիտեի ինքնաֆինանսավորման հնարավորությունները։ Նշված մասնագետների այցը հնարավորություն կընձեռնի ոլորտում առկա լավագույն փորձի ներդրմանը Հայաստանի Հանրապետությունում։
Դուբլին, Իռլանդիա
Ձեռք է բերվել պայմանավորվածություն «ՌյանԷյր» ավիաընկերությանը ներկայացնելու ՀՀ օդանավակայանների եղանակային պայմանների մասին տեղեկատվություն։ Միաժամանակ ձեռք է բերվել պայմանավորվածություն առաջիկա համագործակցության և հարցադրումների ապահովման վերաբերյալ։
Դատարկ հաշվետվություններ
Ոլորտը ներկայացնող մասնագետները, սակայն, մեղմ ասած, տարակուսելի ու ծիծաղելի են համարում հարցերի այն շրջանակը, որը Տաթևիկ Ռևազյանը քննարկել է ուղևորության ընթացքում։ Մասնավորապես, «Եվրակոնտրոլի» ղեկավար կազմի հետ հանդիպման ժամանակ քննարկվել են Կոմիտեի ինքնաֆինանսավորման հնարավորության, ինստիտուցիոնալ փոփոխությունների, կազմակերպչական այլ հարցեր։ Բանն այն է, որ վերոնշյալ կազմակերպությունը զբաղվում է Եվրոպայի օդանավակայանների անտանգության հարցերով, և նրա գործառույթների մեջ չեն մտնում ինստիտուցիոնալ փոփոխությունները կամ պետական կառավարման մարմինների կարգավիճակի ուսումնասիրությունները։
Մասնագետները հիշում են, որ, երբ վերջին անգամ՝ 2013թ., «Եվրակոնտրոլի» մասնագետների այց է եղել ՀՀ, ուսումնասիրվել են «Եվրակոնտրոլի» փաստաթղթերի մեր ներդրումները, և գերազանց գնահատական է ստացել հայկական կողմի իրավական և կազմակերպչական տեսակը՝ ի դեմս «Աէրոնավիգացիոն» ՓԲԸ-ի։ Զավեշտալի է, որ այժմ այդ կազմակերպությանը հրավիրում են ընդհանուր ավիացիոն զարգացման գործընթացներին մասնակցելու, ինչն անընդունելի է և առհասարակ որևէ առնչություն չունի «Եվրակոնտրոլի» կանոնադրական գործառույթների հետ։ Խոսքն ինքնաֆինանսավորման, ինստիտուցիոնալ փոփոխությունների ու ապագա կարգավիճակի խնդիրներին մասին է։ Քաղավիացիայի կոմիտեի ապագա կարգավիճակի խնդիրը, ըստ էության, Կառավարության որոշելիք հարցն է։
Ըստ հաշվետվության՝ հանդիպում է տեղի ունեցել նաև Եվրահանձաժողովի ներկայացուցիչների հետ, և քննարկվել է ընդհանուր ավիացիոն գոտու համաձայնագրի հետագա ընթացքը, բայց արդյունքների մասին ոչինչ չկա գրված։ Դա զարմանալի չի, քանի որ այդ քննարկումները եղել են դեռևս 2017թ. Կոմիտեի նախկին նախագահ Սերգեյ Ավետիսյանի օրոք, և եվրոպացիներն ընդամենը մեկ խնդիր են ունեցել այն ժամանակվա քննարկումների արդյունքներով, որն իրենք պետք է լուծեին, ոը համաձայնագիրը ստորագրվեր։ Փաստորեն, քննարկելու հարց չի եղել, որ արդյունք էլ լիներ, այնինչ հաշվետվության մեջ դա ներկայացված է՝ որպես նոր սկսվող գործընթաց։
Տաթևիկ Ռևազյանի հաշվետվության մեջ նշված մեկ այլ ձևակերպում ավիացիայի ոլորտի մասնագետներն անլուրջ ու ծիծաղելի են համարում։ Խոսքն այն մասին է, որ գրված է, թե ձեռք է բերվել պայմանավորվածություն «ՌյանԷյր» ավիաընկերությանը ներկայացնելու ՀՀ օդանավակայանների եղանակային պայմանների մասին տեղեկատվություն, քանի որ դա բաց տեղեկատվություն է, հրապարակվում է ամենօրյա, ամենժամյա ռեժիմով, տրամադրվում է անխտիր բոլոր սպառողներին, և բոլոր ավիաընկերությունները թե՛ «Զվարթնոց», և թե՛ Գյումրու «Շիրակ» օդանավակայանի եղանակային պայմաններին ծանոթանում են թե՛ օնլայն, թե՛ բրիֆինգների միջոցով, ուստի, թե ինչ պետք է ներկայացնեն «ՌյանԷյր» ավիաընկերությանը, խիստ անհասկանալի է։
Կոմիտեի նախագահի հաշվետվության մեջ նշված է նաև, որ ձեռք է բերվել պայմանավորվածություն առաջիկա համագործակցության և հարցադրումների ապահովման վերաբերյալ։ Անհասկանալի է, թե ինչ համագործակցության մասին է խոսքը, եթե ավիաընկերությունը՝ որպես ծառայություններ մատուցող բիզնես, շուկան ուսումնասիրում ու որոշում է կայացնում տվյալ երկիր չվերթեր իրականացնել-չիրականացնելու վերաբերյալ։ Եթե խոսքն այն մասին է, որ, ինչպես որոշ երկրներում ընդունված է, պետությունը սուբսիդավորի ավիաընկերությունների ծախսերի որոշ մասը, որ վերջինս էժան չվերթեր իրականացնի, ապա դա մեր երկրի բյուջետային հնարավորությունների դեպքում անհնար է, ուրեմն ի՞նչ առաջիկա համագործակցության ու հարցադրումների մասին է խոսքը։
Տաթևիկ Ռևազյանի ղեկավարած Կոմիտեում ևս մեկ «բարի» ավանդույթ է բարգավաճում, երկարաժամկետ վճարվող գործուղումների ավանդույթը։
Օրինակ՝ Կոմիտեի՝ օդանավակայանների սերտիֆիկացման և օդային երթևեկության կազմակերպման վարչության պետն ինչ-որ անհասկանալի պայմանագրի շրջանակում 6 ամսով գործուղվել է Բրյուսելում գտնվող «Եվրակոնտրոլ» կազմակերպություն՝ որպես ՀՀ ներկայացուցիչ, (և կարծես թե մեր ԱԳՆ-ն տեղյակ էլ չէ այդ մասին), ու այնտեղ վարձու բնակարանի, օրապահիկի գումարները ստանալուց զատ՝ այստեղ պահպանել է իր աշխատավարձը։
Սա եզակի դեպք չէ, որովհետև մեկը վերադառնում է, Կոմիտեի աշխատակիցներից մեկը նույն պայմաններով ու տևողությամբ կրկին մեկնում է Բրյուսել։
Հարց է առաջանում՝ այդ ի՞նչ կարևորության գործուղում է՝ աշխատանքի ու աշխատավարձի պահպանմամբ, որ պետք է տևի առնվազն 6 ամիս։
Կարծիք կա, որ Տաթևիկ Ռևազյան եվրոպական վոյաժների կազմակերպիչը հենց վերը նշված վարչության պետն է։
Կառավարությունում պետք է ուշադիր լինեն ու փոքր-ինչ լավ ուսումնասիրեն գործուղված պաշտոնյաների հաշվետվությունները, որովհետև այս օրինակը ցույց է տալիս, որ, ըստ ամենայնի, ոչինչ չասող ու իրենից ամբողջովին ֆիկցիա ներկայացնող, որևէ արդյունք չգրանցած գործուղման վրա վատնվում են ՀՀ հարկատուների գումարները։
Հ.Գ. Արդյո՞ք Կառավարությունում բավականին լավ են ուսումնասիրել Քաղավիացիայի պետական կոմիտեի նախագահ Տաթևիկ Ռևազյանի կենսագրությունը, գիտե՞ն, տեղեկացվա՞ծ են նրա իրական կրթական ու ինտելեկտուալ մակարդակի ու պրոֆեսիոնալ պատրաստվածության մասին, որ վերջինիս նշանակել են պետական հույժ կարևոր գաղտնիքի օգտատեր ու նրան են վստահել՝ այդ թվում՝ նաև թիվ 1 բորտի ուղեկցման ողջ աշխատանքները»։