Նոր սերնդի ՀԴՄ-ները ում համար կարժենա 60 հազար դրամ եւ ում համար՝ 160 հազար դրամ. ՊԵԿ-ից պարզաբանում են
Նոր սերնդի ՀԴՄ-ների տրամադրման գործընթացը ընթանում է բնականոն հունով: Այս մասին հաղորդագրություն է տարածել ՊԵԿ-ը՝ մեղեկացնելով, թե հատկապես ում է այդ ՀԴՄ-ն տրամադրվելու 60 հազար դրամով եւ ում՝ 160 հազար դրամով:
ՊԵԿ-ի հաղորդագրությունում ասվում է. «Հայաստանի պետական եկամուտների կոմիտեի նախագահի 2019 թվականի փետրվարի 5-ի հսկիչ-դրամարկղային մեքենայի իրացման գին սահմանելու վերաբերյալ հրամանը տարբեր հարկ վճարողների մոտ առաջացրել է տարընթերցումներ, ինչի առնչությամբ, անհրաժեշտ ենք համարում պարզաբանել, որ հսկիչ-դրամարկղային մեքենայի իրացման գինը սահմանվել է 60000 դրամ` ներքոհիշյալ տնտեսվարողների համար.
ա. կազմակերպություններ, անհատ ձեռնարկատերեր եւ նոտարներ, որոնց համար օրենսգրքի համաձայն հսկիչ դրամարկղային մեքենաների կիրառումը պարտադիր էր 2019 թվականի հունվարի 1-ից,
բ. 2019 թվականի հունվարի 1-ից ընտանեկան ձեռնարկատիրության սուբյեկտ համարվող կազմակերպություններ եւ անհատ ձեռնարկատերեր,
գ. 2019 թվականի ընթացքում «Ինքնազբաղված անձանց հարկային արտոնությունների մասին» ՀՀ օրենքի համաձայն հարկերից ազատման արտոնագիր ստացած անհատ ձեռնարկատերեր:
Հարկ ենք համարում ընդգծել, որ նոր սերնդի ՀԴՄ-ները 60000 դրամով կարող են ձեռք բերել նաեւ 2019 թվականի հունվարի 1-ից շրջանառության հարկ վճարող համարվող կազմակերպությունները, անհատ ձեռնարկատերերը եւ նոտարները, ինչպես նաեւ 2019 թվականի հունվարի 1-ից բացառապես արտոնագրային հարկ վճարողները:
Նախկինում գործող` 160000 դրամը կպահպանվի վերը չնշված կազմակերպությունների, անհատ ձեռնարկատերերի եւ նոտարների համար (բացառությամբ բացառապես արտոնագրային հարկ վճարողների):
Ի դեպ, տեղեկացնենք, որ 2019թ. փետրվարի 13-ի դրությամբ` նախկինում ՀԴՄ ձեռք բերելու դիմում ներկայացրած շուրջ 1500 տնտեսվարողի համար արդեն իսկ վերահաշվարկ է կատարվել եւ գործընթացն ավարտին հասցնելու ակտիվ աշխատանքներ են կատարվում, իսկ եւս 1000 հայտ բավարարվել է, այսինքն` ներկայանալու դեպքում նրանք եւս ՀԴՄ-ները կստանան 60000 դրամով:
Մեկ անգամ եւս հիշեցնենք, որ վերահաշվարկ կատարելու համար հարկ վճարողները պետք է ներկայացնեն հսկիչ-դրամարկղային մեքենայի ձեռք բերման նոր հայտ` էլեկտրոնային հասցեին: Դիմումի ձեւերին եւ անհրաժեշտ փաստաթղթերի ցանկին կարող եք ծանոթանալ ՊԵԿ պաշտոնական կայքէջում` էլեկտրոնային հասցեով»: