Մերկելը «նախատել» է Մերցին՝ միգրացիայի հարցի վերաբերյալ նրա մեկնաբանությունների համար․ Bild

Գերմանիայի նախկին կանցլեր Անգելա Մերկելը «նախատել» է ներկայիս վարչապետ Ֆրիդրիխ Մերցին՝ միգրացիայի հարցի վերաբերյալ նրա հակասական հայտարարությունների համար, գրում է Bild թերթը։

Հոկտեմբերի 27-ին Մերկելը Բոննում անցկացրել է իր «Ազատություն» (Freiheit) հուշերի հրապարակային ընթերցումները։ Ըստ պարբերականի՝ թեև նա ուղղակիորեն չի հիշատակել Մերցին, նրա արտահայտությունները որպես մեկնաբանություն են հնչել արդի հանրային բանավեճերի համար։

Մասնավորապես, նախկին կանցլերը կոչ է արել 2015-2016 թվականների միգրացիոն ճգնաժամը չանվանել «միգրանտների ներհոսք», ընդգծելով, որ նման իրավիճակներում բազմաթիվ մարդկանց մեջ միշտ պետք է տեսնել առանձին անհատների։ Ըստ նրա՝ դա հատկապես վերաբերում է քաղաքական գործիչներին, ովքեր պետք է «այս հարցում լինեն բարեխիղճ և զուսպ՝ [արտահայտությունների] տոնայնության մեջ»։

Հոկտեմբերի 14-ին Գերմանիայի կանցլերը հայտարարել է, որ Գերմանիայի իշխանությունները շտկում են նախորդ սխալները միգրացիոն քաղաքականության մեջ և «հեռու են գնացել միգրացիայի [խնդրի լուծման] մեջ»։ Սակայն, ըստ նրա, «Գերմանիայի քաղաքներում այդ խնդիրը դեռևս առկա է»։ Ավելի ուշ նա հրաժարվել է պատասխանել այն հարցին, թե կոնկրետ ինչ նկատի ուներ, սակայն հետաքրքրվողներին խորհուրդ է տվել, դիմել իր դուստրերին, որպեսզի ստանան, ինչպես նա պնդում էր, «բավականին հստակ և պարզ պատասխան»։ Մերցի այս արտահայտությունները դատապարտում և քննադատություն են առաջացրել ինչպես քաղաքական գործիչների, այնպես էլ հանրության կողմից, շատերը դրանք համարել են «ռասիստական և խտրական»։

Միևնույն ժամանակ, հարցումները ցույց են տալիս, որ Գերմանիայի բնակիչների մեծամասնությունը կիսում է Մերցի դիրքորոշումը այդ հարցի շուրջ։ ZDF հեռուստաալիքի պատվերով հոկտեմբերի 21-23-ը Wahlen հետազոտական խմբի կողմից անցկացված հարցման ժամանակ հարցվածների 63%-ը համաձայնել է նման կարծիքի հետ։ Ընդ որում, մինչև 35 տարեկան հարցվածները զգալիորեն ավելի քիչ են հակված եղել նման պատասխան տալուն, ինչը կազմել է մոտ 42%, սակայն 60 տարեկանից բարձր հարցման մասնակիցների մոտ այն կազմել է 66%։