Չենք պատրաստվում աշխարհաքաղաքական խաղերի մեջ մտնել. Ն. Փաշինյան
Չկա ուղղվածություն դեպի ԵՄ, Հայաստանը մնում է այնտեղ, որտեղ գտնվում է: Եվրամիության հետ մենք համագործակցում ենք ներքին բարեփոխումների հարցում, և ԵՄ-ն շահագրգռված է նրանով, որ հարաբերությունները Ռուսաստանի հետ բարելավվեն:
Այս մասին այսօր Սանկտ Պետերբուրգում տնտեսական համաժողովի ժամանակ ասաց ՀՀ վարչապետ Նիկոլ Փաշինյանը՝ պատասխանելով հարցին, թե Հայաստանն այս տարի ստանձնել է ԵԱՏՄ նախագահությունը, բացի այդ, ԵՄ-ի հետ համագործակցության համաձայնագիր է ստորագրել, և եթե երկիրը շարունակի ընթանալ ԵՄ-ի ուղղությամբ, չե՞ք վախենում, որ Բրյուսելը կպահանջի լքել ԵԱՏՄ-ն:
«Կարծում եմ, որ ԵՄ երկու առաջնորդների ներկայությունն այստեղ ապացուցում է դա:Ես շփվում եմ եվրոպացի առաջնորդների հետ և ուզում եմ ասել, որ նրանք բոլորն աջակցում են Հայաստանին իր ՌԴ-ի հետ հարաբերությունները զարգացնելու ձգտման հարցում: Սա շատ կարևոր պահ է, և ԵՄ-ի հետ հարաբերությունների հարցում մենք թափանցիկ ենք մեր ռուս գործընկերների առաջ, և Ռուսաստանի հետ հարաբերությունների հարցում մենք թափանցիկ ենք մեր եվրոպացի գործընկերների առաջ:
Իհարկե, բացի մի քանի նրբություններից, որոնք վերաբերում են անվտանգության հարցերին: Կարծում եմ՝ շատերն այսօր հասկացել են, որ աշխարհաքաղաքական խաղերը ոչ ոքի օգուտ չեն բերում, հատկապես այն երկրներին, որոնք վերածվում են ասպարեզի աշխարհաքաղաքական հարցերի համար: Այդ պատճառով Հայաստանի դիրքորոշումը շատ պարզ է: Մենք չենք պատրաստվում աշխարհաքաղաքական խաղերի մեջ մտնել: Մենք պատրաստվում ենք նորմալ հարաբերություններ զարգացնել ՌԴ-ի հետ, մասնակցում ենք Եվրասիական տնտեսական միությանը, ներկա պահին նախագահող երկիր ենք հանդիսանում: Վերջերս ես այցելել եմ Չինաստան և իմ ելույթում ասել եմ, որ ուրախ եմ, որ Չինաստանի հետ շատ լավ հարաբերություններ ունենք, կարծում եմ՝ և՛ Չինաստանը, և՛ Եվրամիությունը, և՛ ՌԴ-ն շահագրգռված են համաշխարհային կայունության և անվտանգության հարցում: Եվ մենք՝ որպես ԵԱՏՄ անդամ երկիր, գիտակցում ենք մեր դերը և կնպաստենք, որ մեր գործընկերների միջև հարաբերություններն ավելի լավը դառնան», - ասել է Փաշինյանը:
Վարչապետը, պատասխանելով Հայաստանի կատարած ընտրության մասին հարցին, հավելել է. «ԵԱՏՄ-ն միակ ինտեգրացիոն գործընթացն է, որին Հայաստանը ներկա պահին մասնակցում է, սակայն դա չի նշանակում, որ մեր երկիրը չի համագործակցելու Չինաստանի հետ: Բացի այդ, մենք նպաստելու ենք Չինաստանի և Եվրասիական տնտեսական միության միջև հարաբերությունների զարգացմանը: Ինչ վերաբերում է Եվրամիությանը, մենք համագործակցում ենք, օրինակ, ինչպես ասել եմ, իրավական բարեփոխումների հարցում: Մեզ համար կարևոր է ստեղծել եվրոպական չափանիշներին համապատասխան դատական համակարգ, որը կլինի անկախ, չկոռումպացված և անկախ քաղաքականությունից»,- ասել է Փաշինյանը՝ շեշտելով, որ Հայաստանը կարող է կամուրջ դառնալ Ռուսաստանի, Իրանի և Չինաստանի միջև:


















































Կրկեսը՝ մանկության երազանքից մինչև մարզային բեմեր
82-ամյա Մայքլ Դուգլասը հանրության առաջ է ներկայացել Քեթրին Զետա-Ջոնսի հետ ամուսնությունից ծնված իր ե...
Հեռուստահաղորդավարուհուն գտել են արյան մեջ՝ իր ննջասենյակում. ամուսինը ձերբակալվել է սպանության կասկ...
Առավոտյան բողոքել է ինքնազգացողությունից. Գալյանը՝ Արսեն Գևորգյանի մահվան մասին
ԿԳՄՍ նախարարի շնորհավորական ուղերձը Գիտության համաշխարհային օրվա առթիվ
Հայտնաբերվել է 351 ոչ սթափ վարորդ․ պարեկների անցած շաբաթվա ծառայության արդյունքները (տեսանյութ)
Ծաղկունքում կասեցվել է հացաբուլկեղենի արտադրամասի գործունեությունը
Արարատ Միրզոյանը բարձր է գնահատել Էստոնիայի աջակցությունը Հայաստան-ԵՄ գործընկերության խորացմանը (տե...
Բարսելոնային անհրաժեշտ է մատչելի վարձակալություն կամ շահավետ տրանսֆերային գործարք
Մարզերից ավտոմեքենաների մուտքը Երևան սահմանափակելու հարց օրակարգում չկա