Կապ չունի՝ ես կլինեմ պետական, թե ոչ պետական ծառայող, ես այս ոլորտից կլինեմ անբաժան․ ՊԵԿ նախագահը՝ հրաժարականի մասին

«Ես չեմ հավակնում ասել, որ համահարթ հարկման տարբերակն ամենալավն է, բայց հանրությանը պետք է նաև շատ կարևոր բան ասենք, որ անձի պրոգրեսիվ հարկման տեսլականը պետք է նայեք եկամուտների և գույքի միասնական հարկման տեսանկյունից: Նեգատիվ էֆեկտը կամ համահարթեցման հետ կապված սոցիալական անարդարության էֆեկտը հարթվում է գույքային հարկի պրոգրեսիվ համակարգի ներմուծմամբ»։ Այս մասին ԱԺ-ում լրագրողների հետ զրույցում ասաց ՊԵԿ նախագահ Դավիթ Անանյանն՝ անդրադառնալով Tert.am-ի հարցին, թե ինչ տեսակետ ունի համահարթ հարկման մեխանիզմի ներդրման դեմ բողոքի ակցիաների վերաբերյալ։

«Որպես ՊԵԿ նախագահ՝ ես ձեռնպահ կմնամ համահարթ տոկոսադրույքի վերաբերյալ ինչ-որ բան հայտնելուց, ճիշտ զրուցակից չեմ։ Պեկ-ը իրականացնում է հարկային վարչարարություն այն գործիքով, որը կտրամադրվի իրեն: Համահարթ տոկոսադրույքի վերաբերյալ ես կարող եմ միայն որպես տնտեսագետ իմ կարծիքը հայտնել։ Դժգոհությունները կայանում են նրան, որ հարկման, այսպես ասած, հավասարաչափ սկզբունքը չի պահպանվում, այսինքն՝ ավելի մեծ եկամուտ ստացողը և ավելի նվազ եկամուտ ստացող նույն դրույքաչափով են հարկվում:

Այդտեղ կա սոցիալական անարդարություն՝ կիսում եմ այդ տեսակետը, բայց ամբողջ աշխարհում կա 3 տեսակ: Երբ որ դու սահմանում ես համահարթ 1 տոկոս, ոչ թե սանդղակ, սահմանում ես նաև չհարկվող շեմ և ըստ էության, պահում ես փոքր եկամուտ ստացողին ավելի քիչ հարկելու գաղափարը: Կա, որ շեմ չկա, կա ուղղակի սանդղակ, ինչը էսօր մենք ունենք: Մյուսը՝ սանդղակի հետ միասին կա նաև շեմ։ Երեք տարբերակներից բոլորը քննարկվել են կառավարությունում, քննարկումների արդյունքում ընդունվել է այն տարբերակը, որը ներկայացվել է ԱԺ-ին»,-ընդգծեց նա։

Անդրադառնալով հարցին՝ համահարթեցման արդյունքում առաջացող բյուջեի պակասուրդը ինչպե՞ս են լրացնելու, Դավիթ Անանյանն արձագանքեց․ «17-19 մլրդ է գնահատված պակասելու չափը: Այդ տարբեր տարբերակներից ընտրվել է այն, որն ավելի նվազ ազդեցություն ունի պետական բյուջեի համար»։

Անանյանն ընդգծեց, որ գույքային հարկով հնարավոր չի լինի լրացնել պակասուրդը, պետք է խնդրի լուծումը պետական աջակցության համատեքստում դիտարկել. պակասուրդը կատարվելի է լինելու, ուղղակի հարկման բեռի ավելացմամբ չեզոքացվելու է մի մասը։

Անդրադառնալով Tert.am-ի հարցին՝ արդյո՞ք ֆինասների նախարարի հետ հարկային փոփոխությունների շուրջ հակասությունների արդյունքում է իր եղբայրը՝ Մհեր Անանյանը կորցրել աշխատանքը, ով զբաղեցնում էր ֆինանսների նախարարության Գնումների բողոքարկման խորհրդի ղեկավարի պաշտոնը, Դավիթ Անանյանն ասաց․ «Հակասություն բառը չէի օգտագործի: Կա ՊԵԿ-ի և ֆինանսների նախարարության միջև մշտնջենական պայքարը, ինչը նորմալ է: Իմ եղբայրը աշխատանքը չի կորցրել, էն անձնավորությունը չի, որ ինչ-որ բան կորցնի: Իմ եղբայրը կունենա աշխատանք՝ իրեն ավելի վայել կամ արժանավայել»։

Անդրադառնալով իր հրաժարականի մասին հրապարկումներին, ՊԵԿ նախագահն ասաց, որ այդ լուրերն առաջին անգամ լրագրողներից է լսում:

«Դա այս պետական շինարարության ամբողջ գործընթացի մեջ ամենաոչէական հարցն է, որ տալիս եք։ Մի բան կարող եմ ձեզ վստահեցնել՝ իմ մասնագիտությունը չեմ կորցնի։ Կապ չունի՝ ես կլինեմ պետական, թե ոչ պետական ծառայող, ես այս ոլորտից կլինեմ անբաժան, ձեր հարցը շատ անէական է»,-եզրափակեց նա։