Ինչու չեն ամաչում ՀՀԿ-ականները

Զրուցում են երկու մանկավարժ: Զայրացած են: Զրույցից պարզ է դառնում, որ նրանց պարտադրել են մասնակցել ՀՀԿ-ականների հետ հանդիպմանը: «Տականքներ, ձեզ թվում է, որ տարաք հանդիպման ձեզ ենք ընտրելո՞ւ»,- զայրացած ասում է նրանցից մեկը: «Ես ընդհանրապես չեմ գնալու»,- պատասխանում է մյուսը:

Չեմ կարողանում չմիջամտել զրույցին: Հարցնում եմ, թե ինչու են գնացել ՀՀԿ-ի հետ հանդիպմանը, եթե նման ցանկություն չեն ունեցել: «Մի գնացեք, եթե նման ցանկություն չունեք»,- խորհուրդ եմ նտալիս մանկավարժներին:

Նրանցից մեկը տխուր ժպիտով նայում է ինձ եւ ասում. «Աղջիկ ջան, կարող է աշխատանքից չհեռացնեն, գիտեմ, բայց առանց այն էլ ամոթալի աշխատավարձ ենք ստանում, հազիվ 60 հազար, որ ժամերը կրճատեն, տակը ոչինչ չի մնա: Ստիպված գնում ենք հանդիպման, բայց ստիպված չենք ընտրելու»:

Իսկ մյուս ուսուցչուհին ծիծաղելով ասում է, թե ինչպես կարող ենք չմասնակցել հանդիպմանը, երբ դուռը փակում են, ժամերով պահում, իսկ հետո կալանավորի նման լցնում ավտոբուսը:

Տխուր նայում եմ կիրթ այս կանանց ու սարսափում, թե ինչ երկրում ենք մենք ապրում: Ուզում եմ հրաժեշտ տամ նրանց եւ հեռանալ, բայց նրանք շարունակում են բողոքել, ցածր աշխատավարձից, տնօրենների պահվածքից: պարզվեց, որ նրանք տարբեր դպրոցներում են աշխատում: 

Երբ եկա տուն,պարզվեց, որ որդուս դասղեկը նրան եւ դասընկերներին շատ խիստ տոնով ասել է, ով ծնողների հետ չներկայանա ՀՀԿ-ի հետ հանդիպմանը խնդիրներ կունենա: «Տնօրենը շատ խիստ հրահանգել է, որ բոլորս պետք է մի մարդու նման այնտեղ լինենք»,- ասել է դասղեկը: 

Հիմա որդիս սպասում է, թե ինքը ինչ խնդիրներ է ունենալու, քանի որ չի ներկայացել հանդիպմանը,ավելին, մենք եւս չենք ներկայացել հանդիպմանը: Հետո ինձ հետ կապվեցին որդուս դասարանի ծնողկոմիտեի անդամները եւ տագնապած ձայնով հետաքրքրվեցին, թե ինչու չենք ներկայացել հանդիպմանը: «Ախր երեխաները, մեր երեխաների դասղեկը կարող են խնդիրներ ունենալ, «պադերժկայի» պահ կար,պետք է գայիր»,- ինձ նկատողություն արեցին ծնողկոմիտեի անդամները:

Ես ժպտում էի, անգամ փորձում հասկանալ տնօրենին, այն ուսուցչուհիներին, որոնց հանդիպեցի կանգառում, որդուս դասղեկին, անգամ ծնողկոմիտեի անդամներին, բայց որդիս տխուր էր, շատ տխուր էր, 15-ամյա որդուս աչքերում անգամ արցունքներ հայտնաբերեցի: Նա ինձ հարցրեց՝ փաստորեն ճի՞շտ են նրանք, ովքեր ասում են, թե այս երկիրն ապագա չունի, եւ որ մենք միշտ այսպես ենք ապրելու: Հիմա ես սարսափով մտածում եմ, որ որդիս եւս որոշել է արտագաղթել, քանի որ դասղեկը, տնօրենը, իր դասընկերների մայրերը նրա աչքից ընկել են:

Եւ մի հարց ՀՀԿ-ի այն առաջնորդներին, որոնք կազմակերպում են այս ամենը՝ դուք իրոք չեք ամաչո՞ւմ, դուք իրոք հպարտանո՞ւմ եք ձեր կազմակերպած հանդիպումներով եւ գիշերներն էլ մուշ-մուշ քնում եք:

Եւ վերջացնեմ մանկավարժներից մեկի խոսքերով. «Թաղապետն իրեն դրել էր գերմարդու տեղ, մատը թափ տվեց եւ ասաց, թե ինքը ինչ ուզի, այն էլ կանի, ինչ որոշում կայացնի, այն կկատարվի»:

Աննա Բաղդասարյան 

Այս թեմայով Շարմազանովն այդպես էլ չհասկացավ, թե ինչ էր ասում դեսպանը Դուք փողը տվեք եւ մի կողմ քաշվեք, իսկ մենք ինչ կուզենք, այն էլ կանենք Ինչու ՀՀԿ-ում լարվածություն չկա ՀՀԿ-ի երազած Հայաստանն այսպիսին է (Տեսանյութ) ՀՀԿ-ում սուր պայքար է. նույն պաշտոնին երեք մարդ է հավակնում, այդ թվում Միհրան Պողոսյանը