Երեք տարի, երեք մրցաշրջան

Չեմպիոնների լիգայի խաղարկության լիգայի փուլի 4-րդ տուրի շրջանակում Մադրիդի «Ռեալը» հյուրընկալվելիս կմրցի Աթենքի ԱԵԿ-ի հետ։ Հանդիպման նախօրեին «արքայական» ակումբի գլխավոր մարզիչ Ժոզե Մոուրինյուն ներկայացել է մամուլի ասուլիսի՝ անդրադառնալով առաջիկա մրցավեճի բարդությանը, Վինիսիուս Ժունիորի և Ֆեդերիկո Վալվերդեի դերակատարությանը, ինչպես նաև իր գլխավորությամբ մադրիդյան գրանդի հեռահար նպատակներին։

Պորտուգալացի մասնագետն առաջին հերթին շեշտել է, որ լավագույն ութնյակում տեղ ապահովելու համար թիմին չափազանց կարևոր միավորներ են հարկավոր, ուստի Հունաստանի գործող չեմպիոնի դեմ խաղին պետք է մոտենալ ամենայն լրջությամբ։

«Մենք մոտ ենք փլեյ-օֆֆի ուղեգիր նվաճելուն, սակայն լավագույն ութնյակում հայտնվելու համար դեռ շատ անելիքներ ունենք։ ԱԵԿ-ը սեփական հարկի տակ շատ վտանգավոր է։ Բավական է նշել, որ «Ռեալը» Աթենքում անցկացրած եվրագավաթային ութ հանդիպումներից միայն մեկում է հաղթանակ տոնել։ Պետք է ամբողջությամբ նվիրվենք խաղին և պահպանենք մեր որակական նշաձողը։

Հունաստանում խաղալը միշտ էլ բարդ է։ Թեև վաղուց այստեղ չեմ եղել իմ գլխավորած թիմերի հետ, քաջ գիտակցում եմ, թե որքան ծանր է հանդես գալ տեղի մթնոլորտում։ Տանտերերը միշտ կռիվ են տալիս ամեն միավորի համար, իսկ «Ռեալի» դեմ խաղալը նրանց կրկնակի մոտիվացիա է հաղորդում»,- նշել է Մոուրինյուն։

«Սերուցքայինների» գլխավոր մարզիչը հաստատել է, որ Վինիսիուս Ժունիորը խաղադաշտ դուրս կգա առաջին րոպեներից՝ միաժամանակ գոհունակություն հայտնելով հարձակման գծում առկա մրցակցությունից։ «Մենք օժտված ենք բարձրակարգ ֆուտբոլիստներով։ Որակյալ խաղացողների առատությունը երբեք խնդիր չէ մարզչի համար․ խնդիրն այն է, երբ ընտրության հնարավորություն չունես։ Դիոմանդեն և Բրահիմը կարող են գործել երկու եզրերում էլ, Էնդրիկը՝ հիմնականում աջից, բայց նաև ձախից։ Իսկ Վինիսիուսն ամենից լավ իրեն դրսևորում է ձախ եզրում»,- ասել է պորտուգալացին։

Անդրադառնալով կադրային խնդիրներին՝ Մոուրինյուն բացահայտել է, որ թեև թիմի կառուցվածքում Ֆեդերիկո Վալվերդեն դիտարկվում է որպես կենտրոնական կիսապաշտպան, ներկայիս իրավիճակում ուրուգվայցու ծառայություններն անհրաժեշտ են նաև պաշտպանության աջ եզրում։ «Վալվերդեն առանցքային ֆուտբոլիստ է մեզ համար։ «Ռեալի» ավագի թևկապը ստիպում է նրան այլ հայացքով նայել շուրջը։ Դա լրացուցիչ պատասխանատվություն է, որը պարտավորեցնում է խաղալ ցանկացած դիրքում, եթե դա է պահանջում թիմի ու խաղընկերների շահը։ Բացարձակապես կասկած չունեմ, որ նրա համար խնդիր չի լինի փակել այն գոտին, որտեղ իր կարիքն ամենաշատն է զգացվում»,- ընդգծել է մարզիչը։

Լրագրողների հարցին, թե որքան ժամանակ է պահանջվում ներկայիս «Ռեալին» իր խաղային գագաթնակետին հասցնելու համար, Մոուրինյուն կարճ ու հստակ է պատասխանել․ «Երեք տարի, երեք մրցաշրջան»։

Միևնույն ժամանակ, մասնագետը կտրուկ հրաժարվել է զուգահեռներ տանել ներկայիս թիմի և 2010–2013 թվականներին իր գլխավորած մադրիդյան կազմի միջև․ «Չեմ սիրում համեմատել տարբեր ժամանակաշրջանների թիմերն ու ֆուտբոլիստներին։ Շատ տարիներ են անցել։ Այս կազմն ահռելի ներուժ ունի, բայց դեռ ոչինչ չի հաղթել։ Տեսնենք, թե ինչ ցույց կտա ապագան․ ես կենտրոնացած եմ բացառապես այն խաղացողների վրա, որոնք հիմա իմ տրամադրության տակ են»։

Խոսելով Հռոմում «Ռոմայի» նկատմամբ տարած կամային հաղթանակի մասին՝ պորտուգալացին նկատել է, որ նման խաղերը հոգեբանական լիցք են տալիս, սակայն ինքը չի հավատում «բեկումնային պահեր» հասկացությանը․ «Պարտված թվացող խաղում հաղթանակ կորզելը հոգեբանական առումով դրական ազդակ է, բայց խաղային տեսանկյունից ես հավատում եմ ամենօրյա գործընթացին։ Մենք օրեցօր ավելի լավ ենք ճանաչում միմյանց։ Յուրաքանչյուր մարզում և հանդիպում աճելու հնարավորություն է․ հենց աշխատանքի ու փորձի կուտակումն է թիմերին դարձնում ավելի ուժեղ»։

Կարիերայի ընթացքում «Պորտուի» և «Ինտերի» գլխավորությամբ Չեմպիոնների լիգան նվաճած մարզիչը խոսել է նաև մադրիդյան ակումբի հետ եվրոպական գլխավոր տիտղոսին տիրանալու հնարավորության մասին․ ««Ռեալի» հետ այդ հաղթանակը բոլորովին այլ զգացողություն կպարգևեր։ Դա կլիներ Չեմպիոնների լիգայի իմ երրորդ գավաթը՝ երեք տարբեր ակումբների հետ, ընդ որում՝ նվաճված աշխարհի ամենամեծ ակումբի ղեկին։ Սակայն հիմա դրանք սոսկ ենթադրություններ են, իսկ ես նախընտրում եմ ապրել իրականությամբ։ Մենք վաստակել ենք 9 միավոր, որոնցից 6-ը՝ բարդ մրցակիցների դեմ խաղերում, բայց քանի դեռ պաշտոնապես չենք ապահովել մեր տեղը հաջորդ փուլում, 1/8 եզրափակիչի մասին խոսել չեմ ցանկանում»։

Ասուլիսի ավարտին Մոուրինյուն անդրադարձել է նաև «Տեներիֆեի» ֆուտբոլիստ Խեսուս դե Միգելի ողբերգական մահվանը՝ ցավակցություն հայտնելով նրա ընտանիքին և զորակցության խոսքեր ուղղելով միջադեպի մասնակից դարձած «Անդորրայի» դարպասապահ Խեսուս Օվոնոյին․ «Սա ցնցող հարված է ամբողջ աշխարհի և հատկապես ֆուտբոլային ընտանիքի համար։ Մեր բոլոր մտքերն ու զգացմունքները մահացած խաղացողի հարազատների ու ընկերների հետ են։ Միևնույն ժամանակ, սա չափազանց ծանր հոգեբանական փորձություն է նաև մյուս ֆուտբոլիստի համար, որը հայտնվել է այդ ողբերգական իրավիճակում»։

Հավելենք, որ Աթենքի ԱԵԿ-ի և Մադրիդի «Ռեալի» միջև Չեմպիոնների լիգայի լիգայի փուլի չորրորդ տուրի հանդիպումը կկայանա այսօր՝ նոյեմբերի 4-ին՝ Հունաստանի մայրաքաղաքի «Ալլվին Արենա» մարզադաշտում։ Մրցավեճը կմեկնարկի Երևանի ժամանակով 21:45-ին։

armsport.am