Դուք փողը տվեք եւ մի կողմ քաշվեք, իսկ մենք ինչ կուզենք, այն էլ կանենք

Կառավարող ՀՀԿ-ի  խոսնակ Էդուարդ Շարմազանովը հորդորում է Եվրամիության դեսպանին՝ պահպանել քաղաքական կոռեկտությունը եւ չմիջամտել երկրի ներքին օրակարգային խնդիրներին։ Ավելին, Շարմազանովը Պյոտր Սվիտալսկուն նաեւ հիշեցնում է՝ Հայաստանը ինքնիշխան երկիր է։

ԵՄ դեսպանի մեղմ քննադատությունը հունից հանել է ՀՀԿ վերնախավին: Ապրիլի 2-ի ազգային խայտառակությունից հետո ՀՀԿ-ն ցանկանում է վայելել պյուռոսյան հաղթանակը, եւ երբ գտնվում են մարդիկ, որոնք համարձակվում են խախտել իրենց անդորրը, բնականաբար, հունից դուրս են գալիս:

Շարմազանովը մեծահոգաբար ասում է, թե ՀՀԿ-ն ընդունում է, որ Հայաստանի Եվրամիության գործընկերները կարող են առաջարկություններ անել, գնահատականներ հնչեցնել, բայց շատ ավելի ճիշտ կլինի, երբ որ այդ առաջարկություններն արվում են ավելի կոռեկտ, ավելի դիվանագիտական բառապաշարով։ «Երբեմն մարդիկ, միգուցե մոռանում են, որ Հայաստանն ինքնիշխան երկիր է, եւ նույնիսկ նույն Կենտրոնական ընտրական հանձնաժողովի անդամների խնդիրը, նույն ռեյտինգային խնդիրը, ընտրությունները բացառապես Հայաստանի Հանրապետության քաղաքական ուժերի եւ պառլամենտում ընդգրկված քաղաքական ուժերի մենաշնորհն է»,- ասել է Շարմազանովը։

ՀՀԿ-ի խոսնակը մոռանում է, որ Հայաստանի ինիշխանության մասին գրեթե ամեն օր հենց ինքը եւ իր կուսակիցներն են մոռանում, եւ որ ամենակարեւորն է, ԿԸՀ-ի խնդիրը, ռեյտինգային խայտառակ ընտրակարգի խնդիրը ոչ թե քաղաքական ուժերի եւ հատկապես կասկածելի ճանապարհով խորհրդարան անցած ուժերի, այլ ժողովրդի մենաշնորհն է:

Զավեշտն այն է, որ Շարմազանովն իրեն այնպես է պահում, կարծես տեղյակ չէ, որ իրոք հանրությունը չի վստահում Կենտրոնական ընտրական հանձնաժողովին, իրավապահ մարմիններին: Այն, ինչ ասել է Շարմազանովն «Ազատություն» ռադիոկայանին, իսկական անեկդոտ է. «Մի բան կարող եմ ասել, որ այս ընտրություններն, ի գիտություն պարոն Սվիտալսկու, ցույց տվեցին, որ համեմատության մեջ՝ եւ՛ Կենտրոնական ընտրական հանձնաժողովի վստահելիության մակարդակն է ավելանում, եւ՛ իրավապահ մարմինների»։

Այստեղ են ասել՝ մեկնաբանություններն ավելորդ են: Ընդամենն արձագանքենք, որ Հայաստանը թեւակոխել է բրեժնեւյան փուլ, դրանից բխող բոլոր բացասական հետեւանքներով: Առաջ շարժվելու փոխարեն Հայաստանը հայտնվել է 1970-ականների վերջում եւ 1980-ականների սկզբում: Ամենուր իշխում է սուտը եւ կեղծիքը: Ինքը՝ Շարմազանովը քաջատեղյակ է, հրաշալի գիտի, թե ինչ է մտածում ժողովուրդը ԿԸՀ-ի եւ իրավապահ մարմինների մասին, բայց ասում է այն, ինչը ձեռնտու է ապահով կյանք վայելելու համար:

Ճիշտ այսպես էր Բրեժնեւի կառավարման շրջանում. բոլորը գիտեին, թեիրականում ինչ խայտառակ վիճակ է, բայց պաշտոնական ելույթների ժամանակ վստահ էին, որ կոմունիզմ են կառուցում, չմոռանալով արտերկրին կոչ անել չմիջամտել երկրի ներքին գործերին:  

Հիմա Շարմազանովն ասում է, թե դեսպան, մի միջամտեք Հայաստանի գործերին, բայց նույն այդ Եվրամիությունը միլիոնավոր դոլարներ է հատկացրել, որ ավելի ազատ, արդար եւ վստահելի ընտրություններ անցկացվեն։

ՀՀԿ խոսնակը, կարծես ասում է՝ դուք փողը տվեք եւ մի կողմ քաշվեք, մնացածը մենք գիտենք, թե ոնց կանենք: Երբ կասկածելի ազնվությամբ դիտորդները գովերգում են խայտառակ ընտրությունները, ասում, թե ամեն ինչ շատ լավ է, Շարմազանովը եւ նրա ընկերները կոչ չեն անում չմիջամտել Հայաստանի ներքին գործերին, իսկ երբ հնչում է անգամ մեղմ քննադատություն, հիշում են Հայաստանի ինքնիշխանության մասին:

Մի խոսքով, տխուր եւ ճահճոտ ժամանակներ են, եւ մեր բազմաչարչար երկիրը սպասում է, թե երբ ենք սթափվելու:

Հակոբ Ասատրյան

Այս թեմայով Շարմազանովն այդպես էլ չհասկացավ, թե ինչ էր ասում դեսպանը Ինչու ՀՀԿ-ում լարվածություն չկա ՀՀԿ-ի երազած Հայաստանն այսպիսին է (Տեսանյութ) ՀՀԿ-ում սուր պայքար է. նույն պաշտոնին երեք մարդ է հավակնում, այդ թվում Միհրան Պողոսյանը ՀՀԿ-ում սկանդալ է հասունանում. խառնվել է նաեւ թաղային խուժանը