Ուկրաինայում անվտանգության գեներալ է ձերբակալվել

Ուկրաինայի Ազգային հակակոռուպցիոն բյուրոյի (NABU) աշխատակիցները ձերբակալել են Ուկրաինայի անվտանգության ծառայության գեներալ Սերգեյ Դուկային։ Ձերբակալությունը տեղի է ունեցել «Կարթագեն» գործի շրջանակում իրականացվող քննության ընթացքում, որը վերաբերում է իրավապահ համակարգի բարձրաստիճան պաշտոնյաների կողմից խարդախության մեջ ներգրավված զանգերի կենտրոններին հովանավորելուն։

BBC-ի տեղեկություններով՝ Մասնագիտացված հակակոռուպցիոն դատախազությունը մտադիր է վաղը դատարան ներկայացնել Դուկայի նկատմամբ խափանման միջոց կիրառելու միջնորդություն։

Սերգեյ Դուկան զբաղեցրել է Ուկրաինայի անվտանգության ծառայության՝ ազգային պետականության պաշտպանության դեպարտամենտի ղեկավարի առաջին տեղակալի պաշտոնը։ Նրան համարել են նաև անցած տարվա ամռանը Հակակոռուպցիոն բյուրոյի դեմ իրականացված գործողությունների կազմակերպիչներից մեկը։

Հրապարակված նյութերի համաձայն՝ Ուկրաինայում մի քանի տարի շարունակ գործել է հանցավոր կազմակերպություն, որը վերահսկել է ոչ միայն խարդախության զանգերի կենտրոնների գործունեությունը, այլև թմրանյութերի ապօրինի շրջանառությունը։ Կազմակերպության անդամները զբաղվել են նաև ծեծով, խոշտանգումներով և շորթմամբ։

Քննության տվյալներով՝ իրավապահ մարմինները ոչ միայն չեն պայքարել այդ հանցավոր խմբավորման դեմ, այլև դրա անդամներից պարբերաբար խոշոր կաշառքներ են ստացել՝ ընդհուպ մինչև բարձրաստիճան պաշտոնյաների մակարդակով։

Քննիչների պնդմամբ՝ Սերգեյ Դուկան, որը NABU-ի հրապարակած նյութերում հիշատակվում է «Ակիմ» ծածկանվամբ, տեղյակ է եղել կազմակերպության գործունեությանը և աջակցել է նրան խնդիրները լուծելու հարցում։ Նրա ազդեցությունը, ըստ քննության, տարածվել է ոչ միայն Ուկրաինայի անվտանգության ծառայության, այլև Գլխավոր դատախազության և Ազգային ոստիկանության վրա։

NABU-ի նոր լայնածավալ գործողության մասին հայտնի էր դարձել չորեքշաբթի առավոտյան։ Բյուրոն սոցիալական ցանցերում հայտնել էր, որ Ուկրաինայի անվտանգության ծառայության բարձրաստիճան պաշտոնյան զենքով սպառնացել է դատարանի թույլտվությամբ խուզարկություն իրականացնելու ժամանած քննիչներին և թույլ չի տվել նրանց մուտք գործել տարածք։

«Բացի այդ, խուզարկության վայր են ժամանել Ուկրաինայի անվտանգության ծառայության հատուկ նշանակության ստորաբաժանման աշխատակիցները»,- ասվում էր գերատեսչության հայտարարության մեջ։

Նոյեմբերի 4-ի երեկոյան Ուկրաինայի անվտանգության ծառայության ղեկավարի պաշտոնակատար Ալեքսանդր Պոկլադը հայտարարել է, որ պաշտոններից ազատել է հատուկ ծառայության երկու բարձրաստիճան պաշտոնյայի, որոնք հայտնվել են NABU-ի քննության շրջանակում։ Սակայն նրանց անունները նա չի հրապարակել։

Մինչ այս պահը Ուկրաինայի ազգային ոստիկանությունը և Գլխավոր դատախազությունը, որոնց բարձրաստիճան ներկայացուցիչները նույնպես հիշատակվում են հակակոռուպցիոն բյուրոյի հրապարակած նյութերում, պաշտոնական մեկնաբանություններ չեն ներկայացրել։