Սա ավելին է, քան սովորական ահազանգը

Շատ կարճ ժամանակահատվածում, ՀՀ ԱԱԾ պետերը պաշտոնից հեռանալուց հետո հարկ են համարում հրապարակայնորեն բնորոշել գործող վարչապետ Նիկոլ Փաշինյանին:

Այսպես, Արթուր Վանեցյանը պաշտոնից հեռանալուց հետո 2019-ի սեպտեմբերին հայտարարեց, որ Նիկոլ Փաշինյանը տարերային որոշումներ է կայացնում, հախուռն գործողություններ է իրականացնում, առաջնայինը երկրորդայինից չի տարբերում, չի տարբերում անցողիկը մնայունից:

Անցավ մեկ տարի: Հիմա Նիկոլ Փաշինյանին ստիպված բնութագրում է Միքայել Համբարձումյանը: Նրա համոզմամբ Նիկոլ Փաշինյանը վատ կառավարիչ է, դյուրագրգիռ է, առանձին դեպքերում անարդար որոշումներ է կայացնում, չունի բավական ռազմական փորձ եւ գիտելիքներ, դիվանագիտության մեջ չունի անհրաժեշտ ճկունություն ու հեռատեսություն, ներում է յուրայինների սխալները, եթե դրանք անգամ ծանր հետեւանքներ են ունենում պետության համար, փոխարենը չխորանալով իրական պատճառների, հանգամանքների մեջ, կարող է խիստ միջոցներ ձեռնարկել իրեն տարակարծություն հայտնած կամ չնչին սխալներ թույլ տված, կառավարման համակարգում երկարամյա փորձ ունեցող, սակայն քաղաքական թիմի անդամ չհանդիսացող մարդկանց նկատմամբ, հրահանգում է թույլ եւ ոչ բավարար հիմքերով հարուցված քրեական գործերով ձերբակալել քաղաքական ընդդիմախոսներին:

Սա ահազա՞նգ է: Ոչ, սա ավելին է քան ահազանգը: Ընդ որում, թե Արթուր Վանեցյանը, թե Միքայել Համբարձումյանը նշանակվել են հենց Փաշինյանի կողմից:

Գեղամ Նազարյան

Top-News.am