Musashi Seimitsu Industry ընկերությունը մտադիր է 33 գործարաններում մարդկանց ռոբոտներով փոխարինել

Honda Group-ի համար պահեստամասեր արտադրող Musashi Seimitsu Industry-ը մի քանի տարի մտածում է մարդկանց ռոբոտներով փոխարինելու մասին, սակայն կորոնավիրուսի համավարակը եւ սոցիալական հեռավորության նոր միջոցառումները կտրուկ արագացրել են ավտոմատացումը: Ըստ Reuters-ի, ռոբոտները մի քանի ձեռնարկություններում արդեն պատասխանատու են որակի վերահսկման համար եւ ոչնչով չեն զիջում մասնագետներին՝ մի պահեստամասը ստուգելու համար ընդամենը մի քանի վայրկյան է պահանջվում:

Musashi Seimitsu Industry-ն օգտագործում է SixAI եւ Nano-X ստարտափների հիմնադիր Ռան Պոլյակինի կողմից մշակված լուծումները: Իսրայելի եւ Ճապոնիայի ինժեներները միավորել են իրենց ուժերը՝ MusashiAI-ն զարգացնելու համար, ինչը հանգեցրել է տեսուչ-ռոբոտների ստեղծմանը, որոնք կարող են փոխարինել ընկերության աշխատակիցներին ոչ միայն գործողությունների ճշգրտությամբ, այլ նաեւ բաղադրիչների գնահատմամբ: Այսպիսով, Musashi-ի գործարանները 80%-ով կարողացել են անցնել ռոբոտների միջոցով առաջադրանքների կատարմանը, եւ գործընթացների միայն մնացած 20%-ի համար են դեռ պատասխանատու մարդիկ, հայտնում է HighTech +-ը:

Պոլյակինի թիմը օգտագործում է ԱԲ-ն եւ օպտիկական տեխնոլոգիաները, որոնք նախկինում օգտագործվել էին բժշկական նպատակներով՝ արտադրական գծերը արդիականացնելու համար: SixAI գաղափարը սովորեցնում է մեքենային տարբերակել «լավը» «վատից»՝ հիմնվելով 100 կատարյալ կամ գրեթե կատարյալ մասերի վրա: Պարզ ասած՝ ԱԲ-ն երբեւէ չի տեսել թերություններով պահեստամասեր, բայց գիտի, թե ինչ տեսք ունեն որակյալ մասերը եւ ընդունում է միայն դրանք:

MusashiAI համակարգը ներկայումս բետտա թեստավորման փուլում է: Փորձարկումներն ավարտելուց հետո Musashi Seimitsu-ը մտադիր է մինչեւ այս տարվա վերջը աշխարհի 33 ավտոպահեստամասերի գործարաններում մարդկանց փոխարինել ռոբոտներով: