Նրանք կգնան հանուն ՀՀԿ-ի, բայց ոչ Գյումրիի

Գյումրեցիները, որոնք արդեն իսկ սկսել են կարեւորել առաջիկա խորհրդարանական ընտրությունները զարմանքով հետեւում են ընթացող գործընթացներին, որոնք շատ դժվար է քաղաքական անվանել:

Գյումրեցին զարմանքով նայում է, թե ինչպես է նախկին ԲՀԿ-ականը, որը պայքարում ՀՀԿ-ի դեմ այժմ դարձել ՀՀԿ-ական: Նայում են եւ հետեւում, թե էլ ով է պատրաստ հանուն մանդատի կանգնել Սերժ Սարգսյանի կողքին, որի վարկանիշը Գյումրիում, մեղմ ասած, բարձր չէ:

Նախկին ԲՀԿ-ական, այժմ անկուսակցական ԱԺ պատգամավոր Մարտուն Գրիգորյանը, առաջիկա խորհրդարանական ընտրություններին Շիրակի մարզում առաջադրվելու է ՀՀԿ-ի ռեյտինգային ցուցակով: Նա արդեն իսկ այս մասին հայտնել է ֆեյսբուքյան իր էջում: 

Մարտուն Գրիգորյանը, մեղմ ասած, զարմանք է արտահայտել, թե ինչպես կարող է Գագիկ Ծառուկյանի կողքին հայտնվել արդեն նախկին ՀՀԿ-ական, Գյումրու նախկին քաղաքապետ Վարդան Ղուկասյանը:

Ի դեպ, գյումրեցիները չեն ողջունում Մարտուն Գրիգորյանի ՀՀԿ ճամբարում հայտնվելը, անկախ նրանից, թե ինչպես են վերաբերում նախկին քաղաքապետին: Գյումրեցիները չեն մոռացել, որ Մարտուն Գրիգորյանը սահմանադրական հանրաքվեի ժամանակ «Այո»-ի ջատագով էր, իսկ Գյումրու ավագանու ընտրություններում աջակցում էր ՀՀԿ-ական «Բալասանյան դաշինք»-ին: Մի խոսքով, Մարտուն Գրիգորյանը կորցրել է այն վարկանիշը, որն ուներ ԲՀԿ-ում եղած տարիներին:

Հանրապետականը Գյումրիում ոչ միայն ազդել է Մարտուն Գրիգորյանի, այլեւ մյուս անկուսակցական թեկնածուների հեղինակության վրա, ովքեր առաջադրվելու են այս կուսակցության ցուցակով:

Նախկինում բավականին լուրջ հեղինակություն եւ հարգանք ունեցող Ֆելիքս Ցոլակյանը եւս բացառություն չի կազմում: Գյումրեցիներն այլեւս նրա հետ հույսեր չեն կապում: Ցոլակյանը Շիրակի մարզպետ լինելու տարիներին բավական լուրջ քայլեր էր կատարել, որոնցով ձեռք էր բերել շիրակցիների վստահությունը, սակայն նրա ՀՀԿ ցուցակ մտնելուց հետո այդ վստահությունը արդեն մարում է:

ՀՀԿ-ի ռեյտինգային ցուցակով ԱԺ ընտրություններին մասնակցելու երկմտանքի առջեւ է կանգնած նաեւ Բալասանյանների ընտանիքը: Գյումրու քաղաքապետը չի կողմնորոշվում՝ թույլ տալ որդուն՝ Խաչատուր Բալասանյանին մասնակցել ընտրություններին, թե՞ ոչ: Պատճառը՝ որդու ճանաչված չլինելն ու կատարած աշխատանք չունենալն է:

Սերժ Սարգսյանի հույսը ընդդիմադիր Գյումրիում եւ Շիրակի մարզում անկուսակցական թեկնածուներն են, ովքեր սակայն լուրջ հեղինակազրկվել են՝ ՀՀԿ-ի ցուցակ մտնելով: Հետաքրքրականը այն է, որ ՀՀԿ վերնախավը գիտակցում է, որ ՀՀԿ-ի պիտակով անձինք հեղինակություն չունեն: Այսպես ասած, ստաժավոր հանրապետականներին այս ընտրությունների ժամանակ լուրջ դերեր բաժին չեն հասել: Մասնավորապես, Սուքիաս Ավետիսյանը գտնվելու է ռեյտինգային ցուցակի 5-րդ հորիզոնականում, ներկայում պատգամավոր Աշոտ Աղաբաբյանը ցուցակում ընդհանրապես չի լինելու: ՀՀԿ-ի Շիրակի մարզի ղեկավար Սահակ Մինասյանին, որը չի թաքցնում ընտրություններին մասնակցելու իր մեծ ցանկությունը, եւս չեն թույլատրել առաջադրվել որպես թեկնածու: Կարելի է ասել, որ ՀՀԿ-ն մարդկային ռեսուրսների լուրջ խնդրի առջեւ է կանգնած:

Դավիթ Կարապետյան

Այս թեմայով Վարդան Ղուկասյանը երկու ամսով կալանավորվեց Գյումրիի քաղաքապետարանը քաղաքացիներին հորդորում է չտրվել սադրանքների Կարմիր ու սեւ բերետավորները բիրտ ուժի կիրառմամբ բերման են ենթարկում քաղաքացիներին. լսվում են հայհոյանքներ (տեսանյութ) Գյումորւ քաղաքապետ Վարդան Ղուկասյանին տեղափոխում են Երևան՝ Հակակոռուպցիոն կոմիտե Ինչպես են կարմիր բերետավորները մուտք գործում Գյումրիի քաղաքապետարանի շենք (տեսանյութ)