Վաճառքի է հանվել աշխարհի ամենաարագընթաց ավտոմեքենան

ԱՄՆ-ում Bring a Trailer աճուրդում վաճառքի է հանվել հրթիռի տեսքով կառուցված մեկ տեղանոց «սթրիմլայներ»: Ավտոմեքենան, որը արագության համաշխարհային մի քանի ռեկորդներ է սահմանել, կարելի է ձեռք բերել 19 000 դոլարով, հայտնում է Motor-ը:

Ռեկորդակիր մեքենայի թափքը պատրաստված է ալյումինից: Մոդելը հագեցած է կարբոնային արգելակային սկավառակներով եւ հատուկ պարաշյուտներով: Մեքենային շարժման մեջ է դնում Cadillac-ի «թուին-տուրբո» V8 շարժիչը: Բացի այդ, մեքենան հագեցած է ուժեղացված հետեւի կամրջակով:

Իր առաջին ռեկորդը մեքենան սահմանել է 2004 թվականին: Այնուհետեւ նրան կարողացել են վարել մինչեւ 497 կմ/ժ արագությամբ: Հաջորդ մրցումներում «հրթիռ-մեքենան» սլացել է մինչեւ 531 կմ/ժ արագությամբ: Այդ մրցումներին մասնակցել են 8,2 լիտրանոց շարժիչներով մոդելները: Եվ ընդամենը մեկ տարի անց, մեքենան սահմանել է հերթական ռեկորդը՝ սլանալով մինչեւ 560 կմ/ժ արագությամբ։