Ոչ թե առողջապահական, այլ ազգային անվտանգության խնդիր

Հունիսի 22-ին, երբ Ազգային ժողովը, իսկ ավելի ճիշտ կառավարող ուժը ներկայացնող խմբակցությունը միաձայն քվեարկում էր հակասահմանադրական ճանապարհով սահմանադրական փոփոխություններ իրականացնելու օգտին, ըստ մամուլի հրապարակումների, պատգամավորներից առնվազն երկուսն արդեն եղել են կորոնավիրուսով հիվանդ:

Նույն աղբյուրի համաձայն, այդ պատգամավորներն են Վիկտոր Ենգիբարյանը, որի մոտ ախտորոշվել է վարակը հունիսի 18-ին Նորք ինֆեկցիոն հիվանդանոցում եւ Հայկ Գեւորգյանը, որի մոտ վարակն ախտորոշվել է հունիսի 19-ին: 

Անշուշտ, պատգամավորներին մաղթում ենք առողջություն, շուտափույթ ապաքինում, բայց մյուս կողմից չենք կարող չարձանագրել, որ նրանք արել են նույնը, ինչ աբովյանցի այն հայտնի տաքսիստը, որն իմանալով, որ հիվանդ է, շարունակել է աշխատել:

Այս նիստից հետո, այս չարաբաստիկ նիստից հետո այլ պատգամավորներ եւս, ընդ որում այլ խմբակցություններից, եւս վարակվել են կորոնավիրուսով:

Սա արդեն ոչ թե առողջապահական, այլ ազգային անվտանգության խնդիր է: Իհարկե, պատգամավորները հակաօրինական արարք են թույլ տվել, բայց առավել կարեւոր է պարզել, գտնել, թե ով է եղել այն մարդը, այն ուժը, որը կորոնավիրուսով հիվանդ պատգամավորներին պարտադրել է մասնակցել նիստին եւ քվեարկել:

Անչափ կարեւոր է գտնել այդ մարդուն կամ այդ ուժին: Սա ազգային անվտանգության խնդիր է: Հիմա կամ պատգամավորները փաստարկված պետք  հրապարակեն մամուլի հրապարակումը, որ իրենք հիվանդ մասնակցել են նիստին, կամ պետք է գործընթաց սկսվի մեղավորներին պատժելու համար:

Եւ որ ոչ պակաս կարեւոր է տեղի ունեցած քվեարկությունը պետք է համարել առ ոչինչ, քանի որ պատգամավորներից առնվազն երկուսի քվեարկության անգամ մասնակցության վրա եղել է պարտադրանքի դրսեւորում:

Ի դեպ, հերքումը պետք է լինի ոչ թե ֆեյսբուքյան գրառմամբ կամ մամուլի խոսնակների միջոցով, ինչպես վարվեց Ռուստամ Բադասյանը, այլ փաստարկված եւ տեղեկանքներով:

Գեղամ Նազարյան

Top-News.am