Փաշինյանի անլրջության եւ պոպուլիզմի ծանր հետեւանքները

Եւ այսպես, ըստ պաշտոնական վիճակագրության, վերջին մեկ օրում Հայաստանում նոր կորոնավիրուսով վարակվելու 697 նոր դեպք է գրանցվել: Ընդհանուր առմամբ՝ հունիսի 4-ին հաստատվել է կորոնավիրուսի 11221 դեպք: Մեկ օրում, նույն պաշտոնական վիճակագրության համաձայն, արձանագրվել է մահվան 9 դեպք: Ցավոք, համավարակից մահացել է 176 մարդ:

Ի դեպ, վերջին մեկ օրում համավարակի օջախ Չինաստանում հայտնաբերվել է ընդամենը մեկ վարակակիր: Ավելին, համավարակի ամբողջ ընթացքում Չինաստանում վարակվել է 85 հազարից ավելի քիչ մարդ: 

Հասկանալու համար, թե Հայաստանում իրավիճակը որքան խայտառակ է մի քանի համեմատություն: Չինաստանում ապրում է յոթ հարյուր անգամ ավելի շատ մարդ քան Հայաստանում: Չինաստանում համավարակի ամբողջ ընթացքում վարակվել է 85 հազար մարդ, վերջին մեկ օրում հայտնաբերվել է ընդամենը մեկ վարակակիր, իսկ Հայաստանում մեկ օրում վարակվել է 697 մարդ, իսկ ամբողջ ընթացքում՝ 11 հազար 221:

Ի՞նչ կկատարվեր Չինաստանում, եթե այսօր այնտեղ վարակվեր ոչ թե մեկ, այլ 488 հազար մարդ, եթե այնտեղ ամբողջ ընթացքում վարակված լիներ ոչ թե 85 հազար, այլ 7,8 միլիոն մարդ:

Ավելի պարզ հասկանալու համար, թե Հայաստանում կառավարության անլրջության հետեւանքով ինչ իրավիճակ է եւս մի քանի օրինակ: Եթե Իտալիայում, Իրանում, Գերմանիայում, Ռուսաստանում եւ Վրաստանում լիներ նույն վիճակը, ինչ Հայաստանում, ապա այնտեղ այսօր վարակված կլինեին համապատասխանաբար 21 հազար, 28 հազար, 27 հազար, 49 հազար եւ հազար մարդ:

Պատկերացնո"ւմ եք ինչ կլիներ այդ երկրներում: Իհարկե, կառավարություններն ամբողջ կազմով հրաժարական կտային: Պետության ներկայացուցիչները ներողություն կխնդրեին, եւ ոչ թե մեղքը կբարդեին անկարգապահ մարդկանց, քաղաքացիների վրա:

Իսկ ինչով է զբաղված Փաշինյան Նիկոլը վերջին օրերին: Նա մեղքn իր վրայից, կառավարության վրայից բարդում է ժողովրդի վրա: Նա հպարտ եւ դուխով քաղաքացիներին դարձրեց փնթի, անկարգապահ ժողովուրդ: Ստացվում է, որ մեր ժողովուրդը անկարգապահ է ոչ միայն գերմանացիներից եւ իտալացիներից, այլ նաեւ վրացիներից, հարեւան իրանցիներից, չինացիներից, չեռնոգորացիներից, բուլղարներից, բոլորից: Նա ժողովրդին ստիպում է անգամ բաց տարածքում դիմակ կրել, ինչը միայն նպաստում է հիվանդությունների առաջացմանն ու խորացմանը: 

Իրավիճակը շտկելու փոխարեն նա ժամեր է անցկացնում ֆեյսբուքում եւ ոչինչ չտվող ճեպազրույցների մասնակցում, անում ոչ միայն դատարկ, այլ նաեւ վտանգավոր հայտարարություններ:

Նա կրկին ոտնատակ տվեց, ոտքերը սրբեց պետական ինստիտուտների վրա, հայտարարելով, թե առկա իրավիճակի պատճառների մասին պետական մարմինների զեկույցներն իրեն չեն բավարարում եւ այդ իսկ պատճառով դիմել է իրեն համար ամենավստահելի մեթոդներից մեկին՝ դիմել է հանրությանը:

Սա շատ վտանգավոր հայտարարություն է: Սրանով Փաշինյանն ասում է, որ ես որեւէ մեկին չեմ վստահում, ես վստահում եմ միայն ինքս ինձ: Նա ասում է, որ պետական ինստիտուտներ չկան կամ կան էլ իրեն դրանք պետք չեն: Նա դիմում է մի հանրությանը, որին մեղադրում է անկարգ լինելու մեջ: Պատահական չէ, որ այսօր կորոնավիրուսային համավարակի ցուցանիշներչով մենք աշխարհում ամենավերջին տեղում ենք:

Եւ մեկ դիտարկում եւս. նույնիսկ այս աղետալի վիաճկում նա բաց չի թողնում պոպուլիզմը: Հիշում եք, ավելի քան մեկ տարի առաջ նա ազդարարեց համաժողովրդական տնտեսական հեղափոխության սկզբի մասին, թե ինչ եղավ՝ տեսանք բոլորս: Հիմա էլ նա ազդարարում է, թե մեկնարկում է զանգվածային հակահամաճարակային շարժում: Պարզ է չէ, թե ինչ է սպասվում երկրին, եթե մեր հույսը հերթական պոպուլիստական շարժումն է լինելու:

Փաշինյանը չի լրջանում եւ նման ցանկություն, ինչպես տեսնում եք չունի: Մնում է լրջանա հանրությունը, որին Փաշինյանը մեղադրեց ամենաանկարգապահ ժողովուրդը լինելու մեջ:

Գեղամ Նազարյան

Top-News.am