Ասպիրինի երկարատեւ ընդունումը նվազեցնում է քաղցկեղի ռիսկը

Ասպիրինի երկարատեւ եւ պարբերաբար ընդունումն իսկապես նպաստում է կերակրափողի, ստամոքսի, աղիների, ենթաստամոքսային գեղձի եւ լյարդի քաղցկեղի առաջացման ռիսկի նվազեցմանը։ Այդ մասին ասվում է Annals of Oncology-ում հրապարակված խոշոր մետավերլուծության մեջ։

Մետավերլուծությունը ներառում է 100 հետազոտություն այս թեմայով։ Այն ցույց է տվել, որ երկար տարիներ շարունակ շաբաթական ասպիրինի մեկ-երկու հաբի ընդունումը կարող է նվազեցնել քաղցկեղի առաջացման ռիսկը․

ենթաստամոքսային գեղձի քաղցկեղ՝ 22 տոկոսով;
կոլոռեկտալ քաղցկեղ՝ 27 տոկոսով;
կերակրափողի տափակաբջջային քաղցկեղ՝ 33 տոկոսով;
ստամոքսի քաղցկեղ՝ 36 տոկոսով;
լյարդի քաղցկեղ (հեպատոբիլյար)՝ 38 տոկոսով;
կարդիայի (ստամոքսի վերին հատված) եւ կերակրափողի ադենոկարցինոմայի քաղցկեղ՝ 39 տոկոսով։
Նշենք, որ կոլոռեկտալ քաղցկեղի վերաբերյալ ենթադրությունները հիմնված են 156 000 դիտարկումների վրա 50 հետազոտությունների շրջանակում։ Այդ դեպքում ասպիրինի արդյունքը, ինչպես պարզ է դարձել, կախված էր չափաբաժնից․ որքան շատ ասպիրին, այնքան փոքր քաղցկեղի հավանականություն։

«75-100 մգ չափաբաժնով ասպիրինի օրական օգտագործումը կապված է քաղցկեղի զարգացման ռիսկի 10 տոկոսով նվազեցման հետ՝ ի տարբերություն այն մարդկանց, որոնք չեն ընդունել ասպիրին․ օրական 325 մգ օգտագործելու արդյունքում քաղցկեղի ռիսկը նվազում է 35 տոկոսով, իսկ 500 մգ-ի դեպքում՝ 50 տոկոսով»,-ասել է Միլանի Մարիո Նեգրի ինստիտուտից Կրիստինա Բոսեթին։

Սակայն հարկ է նշել, որ, ինչպես պնդում է Նյու Յորքի Մեմորիալ Սլոան Քաղցկեղի կենտրոնից Էմանուել Պապուն, ասպիրինը պետք է ընդունել առնվազն 10 տարի ցանկալի արդյունքն ստանալու համար, ընդ որում՝ որքան բարձր դոզայով, այնքան լավ։ Սակայն ինտերվենցիոն հետազոտությունների մեծ մասը (երբ գիտնականները հատուկ են նշանակում դեղամիջոցներ գիտափորձի մասնակիցներին ժամանակի ընթացքում դրանց արդյունավետությունը գնահատելու համար) ցույց չի տվել ասպիրինի պաշտպանիչ արդյունքը, ընդգծել է մասնագետը։

Այս թեմայով Ավստրալուհու ամբողջ մարմինը բծերով և կապտուկներով է պատվել AstraZeneca-ով պատվաստվելուց հետո (լուսանկարներ) Քթի հատուկ սփրեյը կարող է վերացնել սոցիալական հեռավորության անհրաժեշտությունը Վաղուց հայտնի հակաբիոտիկը կարող է արդյունավետ հակաքաղցկեղային զենք լինել Ինչու է բարձրանում շաքարն արյան մեջ Սպիտակուցային համեղ ըմպելիքներ, որոնք կօգնեն նիհարել