Ռոբերտ Քոչարյանը ժամ առաջ պետք է լինի ազատության մեջ

Հայաստանի երկրորդ նախագահ Ռոբերտ Քոչարյանը ժամ առաջ պետք է լինի ազատության մեջ, եւ ոչ թե կորոնավիրուսային համավարակի, այլ առաջին հերթին այն պարզ պատճառով, որ նրան կալանքի տակ պահելու որեւէ հիմք գոյություն չունի: Ռոբերտ Քոչարյանը պետք է լինի ազատության մեջ, քանի որ նրա կալանավորումը բացառապես ուրախություն է պատճառում մեր երկրի հակառակորդներին:

Փաստաբանները, անկախ իրավաբանները բազմաթիվ հիմնավորումներով ոչ միայն ապացուցել են, որ ՀՀ երկրորդ նախագահին կալանքի տակ պահելու որեւէ պատճառ չկա, այլ նաեւ որ հարուցված քրեական գործը, որի շրջանակներում էլ Ռոբերտ Քոչարյանը զրկվել է ազատությունից՝ ծայրից ծայր «կարված» է:

ՀՀ երկրորդ նախագահը վաղուց պետք է լիներ ազատության մեջ, որովհետեւ նրա խափանման միջոցը փոխելու համար երաշխավորել էին Արցախի ներկա եւ նախկին նախագահները: Հիմա էլ խափանման միջոցը փոխելու համար անձնական երաշխավորությամբ են պատրաստ հանդես գալ ՀՀ նախկին վարչապետեր Վազգեն Մանուկյանը, Կարեն Կարապետյանը, Խոսրով Հարությունյանը, Արցախի նախկին վարչապետ Անուշավան Դանիելյանը:

Դատարանը Ռոբերտ Քոչարյանին կալանքի տակ պահելու, կարծես թե, որեւէ հիմնավորում չունի: Գուցե հենց սա է պատճառը, որ դատական նիստերն անվերջ հետաձգվում են: Գուցե ճիշտ են լուրերը, որ Աննա Դանիբեկյանը համառորեն ցանկանում է հրաժարվել այս գործից, քանի որ ՀՀ երկրորդ նախագահին կալանքի տակ պահելու որեւէ հիմնավորում չի տեսնում եւ չի ցանկանում ակնհայտ ապօրինի որոշում կայացնել:

Իսկ որ Ռոբերտ Քոչարյանին ամեն գնով կալանքի տակ պահելու հստակ հրահանգ կա, կարելի է կռահել Ամենայն հայոց կաթողիկոս Գարեգին 2-րդի կոչից հետո վարչապետի մամուլի խոսնակի ջղաձիգ հայտարարությունից եւ իմքայլականների մեկնաբանություններից ու գնահատականներից:

Հիշեցնենք, որ Հայ Առաքելական Եկեղեցու առաջնորդն ընդամենը ասել էր. «Հաղորդ լինելով ՀՀ երկրորդ նախագահ Ռոբերտ Քոչարյանի առողջության առնչությամբ բժիշկների մասնագիտական կարծիքներին, կարևոր ենք համարում, որ արդարադատության իրագործման հետ մեկտեղ ձեռնարկվեն բոլոր կանխարգելիչ միջոցներն ու միջոցառումները, այդ թվում՝ խափանման միջոցի փոփոխություն՝ համավարակի այս շրջանում ապահովագրելու նրան առողջական վիճակի հետագա բարդացումներից»:

Մի փոքր ուշադիր լինելու դեպքում հաստատ կնկատեք, որ Կաթողիկոսը աշխարհիկ գործերին միջամտելու, քաղաքականության մեջ խառնվելու որեւէ հավակնություն չի ցուցաբերում: Ավելին, հատուկ շեշտում է, որ արդարադատության իրագործման հետ մեկտեղ կարելի է փոխել խափանման միջոցը: Այլ կերպ ասած, Կաթողիկոսն արել է այն, ինչ պետք է աներ:

Ցավոք, այս կոչից հետո հիշեցին Տեր Վահրամ Մելիքյանի երաշխավորության, տասը տարի առաջ բացված քրեական գործի մասին, որտեղ շոշափվում էր Արարատյան թեմի առաջնորդի անունը: Հիշեցին, որ «հազարավոր» մարդիկ Կաթողիկոսի հրաժարականն են պահանջում, իսկ ոմանք էլ ասացին, թե ո՞ւր էր Գարեգին 2-րդը 2008-ի մարտի մեկին:

Հատուկ հենց նրանց համար մեկ անգամ եւս հիշեցնենք, որ 2008-ի մարտի 1-ին, երբ դեռ արյուն չէր թափվել, երբ դեռ հնարավոր էր խուսափել զոհերից եւ վիրավորներից, Գարեգին 2-րդը գնացել էր ՀՀ առաջին նախագահ Լեւոն Տեր-Պետորսյանի տուն, բայց այդպես էլ ընդունելության չէր արժանացել: Հիմա հիշեցի՞ք, թե որտեղ էր Կաթողիկոսը:

Իսկ Ռոբերտ Քոչարյանը պետք է լինի ազատության մեջ նաեւ մեր պետության շահերից ելնելով: Հայաստանյան դատարանների ապօրինի որոշումների վերաբերյալ ՄԻԵԴ-ը շուտով բազմաթիվ որոշումներ է կայացնելու ընդդեմ Հայաստանի Հանրապետության: Այնտեղ հաստատ չեն առաջնորդվելու հայաստանյան ինչ-որ հասցեից տրվող հրահանգներով:

Գեղամ Նազարյան

Top-News.am