Toyota-ն ամբողջ աշխարհում ավելի քան 3 մլն ավտոմեքենա է հետ կանչում

Toyota ընկերությունը հայտարարել է բենզապոմպի թերությամբ 3,2 մլն ավտոմեքենա հետ կանչելու մասին, որոնք վաճառվել են տարբեր երկրներում: Ընդ որում՝ նախապես հաղորդվում էր միայն 696 հազար մեքենայի մասին, որոնք իրացվել էին ԱՄՆ շուկայում, հայտնում է «Մոտորը»:

Հայտնաբերված խնդիրը սպառնում է շարժիչի աշխատանքի կանգով կամ ոչ մեծ արագության դեպքում հզորության կորստով: Վերանորոգման կուղարկվեն Toyota 4Runner-ը, Camry-ն, Highlander-ը, Land Cruiser-ը, Sequoia-ն, Sienna-ն, Tacoma-ն, Avalon-ը եւ Corolla-ն, ինչպես նաեւ Lexus LS 500-ը, LC 500-ը, RC-ը, GS-ը, IS-ը, ES-ը, LX-ը, GX-ը, RX-ը եւ NX-ը: Հետ կանչված ավտոմեքենաների վրա կկատարվի վառելիքային պոմպի անվճար փոխարինում: Ընկերության հայտարարությունից հետեւում է, որ տրանսպորտային միջոցների բոլոր տերերը հետկանչի մասին կիրազեկվեն մայիսին:

Սա 2020 թվականին Toyota-ի նման մասշտաբի արդեն երկրորդ հետկանչն է: Ավտոարտադրողը հունվարին հետ էր կանչել 3,4 մլն մեքենա էլեկտրոնային խափանման պատճառով, որի պատճառով ճանապարհային պատահարի ժամանակ անվտանգության բարձիկները կարող էին չգործել: