Ուժի անհաջող ցուցադրման ծանր հետեւանքները

Ասֆալտին փռելով, պատերին ծեփելով բերման ենթարկելով Նարեկ Մալյանին, Արթուր Դանիելյանին, Կոնստանտին Տեր-Նակալյանին, Գրիգոր Մինասյանին, Ազատ Ադամյանին եւ  Նարեկ Սամսոնյանին կառավարության ղեկավարությունը փորձեց ուժի ցուցադրմամբ վախեցնել հենց բերման ենթարկվածներին, միաժամանակ նաեւ վախի մթնոլորտ ստեղծելու եւս մեկ փորձ անել:

Դժվար է ասել, թե երկրում կգտնվի գոնե մեկ մարդ, որը հավատաց, որ այս ամենը կատարվել է առանց Նիկոլ Փաշինյանի գիտության եւ հրահանգի, բայց այստեղ կարեւորը ոչ այնքան այս է, այլ այն հետեւանքները, որ պետության համար ունենալու է այս մասկի շոուի իրականացումը:

Համաշխարհային փորձը ցույց է տալիս, որ նման գործողություններին հաջորդում է իրավապահ մարմինների կամայական գործողությունները բոլորովին այլ, քաղաքականությունից հեռու ոլորտներում եւ մակարդակներում, առաջացնելով բնակչության լայն շերտերի դժգոհությունը:

Բանն այն է, որ կառավարությանը ծառայության մատուցած կառույցները ստանում են ազատ եւ անպատիժ գործելու հնարավորություն: 

Բացի այդ, այս գործողությունը ցույց տվեց գործող կառավարության վախերը եւ բոլոր թուլությունները, ինչը նրանց խոցելի դարձրեց ոչ այնքան ընդդիմադիր գործիչների, այլ այն շերտի համար, որոնք մշտապես գտնում են կառավարությունից օգուտներ քաղելու ձեւերը՝ ապօրինաբար ընդլայնելով բիզնես-գործունեության դաշտերն ու տարածքները, հաջողությամբ չեզոքացնելով բիզնես-մրցակիցներին եւ աստիճանաբար նվազեցնելով մուծվող հարկերը, միաժամանակ էլ կառավարման ոլորտ խցկելով իրենց դրածոներին:

Այս ամենը բերելու է կառավարող ուժի ծանր պարտությանը: Նրանց պարտությունը մոտեցնելու է նաեւ կառավարող ուժի անդամների լուռ կամ ոչ այնքան լուռ համաձայնությունը ուժային կառույցների խայտառակ գործողություններին: 

Որքան էլ տարօրինակ հնչի, բայց լճացած իշխանությունների դեմ պայքարի ելած ուժը սպրիներային արագությամբ դեգրադացվեց, լճացավ եւ շեշտակի արագությամբ մոտեցնում է իր վախճանը:

Վարդան Մխիթարյան

Top-News.am