Ford-ը «մարտահրավեր է նետել» Tesla-ի էլեկտրապիկապին. Իլոն Մասկն իր համաձայնությունը տվել է (տեսանյութ)

Ամերիկյան Ford ընկերության նոր բիզնես մոդելների ստեղծմամբ զբաղվող Ford X ստորաբաժանման ղեկավար Սանդիփ Մանդրան «մենամարտի» է հրավիրել Tesla ընկերության հիմնադիր Իլոն Մասկին: Այս մասին Twitter-ում գրել է Մանդրան:

Ford-ը որոշել է Tesla-ին «մարտահրավեր նետել» Մասկի Twitter-յան էջում հրապարակված տեսանյութից հետո, որտեղ նոր Cybertruck ֆուտուրիստական էլեկտրապիկապը ճոպանի ձգմամբ մրցում է F-150 պիկապի հետ և հաղթում:

Սանդիփ Մադրան առաջարկել է Իլոն Մասկին տրանսպորտային միջոցների օբյեկտիվ համեմատություն անցկացնել:

Նշենք, որ տեսանյութը, որում Cybertruck-ը հեշտությամբ քաշում է Ford F-150-ին, համացանցում շատ վեճերի առիթ է տվել: Օգտատերերն այդ «մարտն» այնքան էլ արդար չեն համարել` հաշվի առնելով որոշ տեխնիկական մանրուքներ:

Ի դեպ, Մասկը համաձայնել է պիկապների միջև մենամարտ անցկացնելուն: Սակայն ավելի ուշ պարզ է դարձել, որ Ford-ի թոփ մենեջերը պարզապես կատակել է, և իրենք չեն պատրաստվում որևէ մեկին որևէ բան ապացուցել:

Հիշեցնենք, որ ամերիկյան Tesla ընկերությունը, որն աշխարհում էլեկտրամեքենաների խոշորագույն արտադրողներից է, իր նոր արտադրանքը՝ Cybertruck էլեկտրական պիկապը, ներկայացրել է օրեր առաջ։

Tesla ընկերության գլխավոր տնօրեն Իլոն Մասկը հայտարարել է, որ նոր պիկապը ֆունկցիոնալ հատկանիշներով նման է լինելու Ford F-150 բենզինային մոդելին: Ավտոմեքենան նախագծելիս Մասկը ոգեշնչվել է Blade Runner գիտաֆանտաստիկ ֆիլմից, որի գործողությունները տեղի են ունենում 2019-ի նոյեմբերին:

Մեքենան արտադրվելու է երեք տարբերակով՝ մեկ լիցքով 400, 480 ու 800 կիլոմետր ընթացքով։ Տարբերակները տարբերվում են նաև շարժիչների քանակով՝ մեկից երեք։

Պիկապի արժեքը սկսվում է 39 900 դոլարից։ Ամենաթանկ մոդելի գինը կսկսվի 69 990 դոլարից: 

Cybertruck pulls F-150 uphill pic.twitter.com/OfaqUkrDI3

— Elon Musk (@elonmusk) November 24, 2019