Մնացականյանն, իհարկե, ոչնչում մեղավոր չէ, այլ մեղավորներ փնտրեք

BBC-ին տված հարցազրույցը ՀՀ ԱԳ նախարար Զոհրաբ Մնացականյանի կենսագրության լավագույն դրվագներից չէր։ Սա փաստ է, կարելի է ասել, գրեթե անհերքելի փաստ։ Այսուհանդերձ, լինենք մինչեւ վերջ անկեղծ, այս ամենի մեղավորը բազմափորձ եւ հմուտ դիվանագետը չէ։ Այլ մեղավորներ փնտրեք։

Ավելի անկեղծ լինենք․ հարզազրույց տվողն ինքը չէր։ Մնացականյանի նման հմուտ դիվանագետը չէր կարող չհասկանալ, որ նման ազդեցիկ լրատվամիջոցին հարցազրույց տալիս չի կարելի, անգամ ամոթ է խոսել ասֆալտապատման, ծառատունկի, փողի ճամպրուկների մասին։

Զոհրաբ Մնացականյանը լինելով լավ կրթություն ստացած դիվանագետ, ունենալով աշխատանքային հարուստ փորձ, հաստատ Արցախին, Արցախի ինքնորոշմանը վերաբերող հարցերին շատ ավելի գրագետ, լուրջ եւ բարձր մակարդակի, եւ որ ամենակարեւորն է՝ բարձր մակարդակի պատասխան կտար։

Հարցազրույցին հետեւելն այնքան ծանր էր, որքան Ֆինլանդիա-Հայաստան խայտառակ հանդիպմանը, որի ժամանակ միայն մտածում ես՝ այս երբ պետք է ավարտվի։

Տպավարություն էր, որ Զոհրաբյանն ամեն կերպ ուզում է ասել, բղավել, որ այն ամենի հետ ինչ ես ասում եմ, իրականում համաձայն չեմ կամ ես այլ տեսակետ եւ մոտեցումներ ունեմ։ 

Ու այստեղ հարց է առաջանում, եւ չի կարող չառաջանալ․ իսկ ի՞նչ անի Զոհրաբյանը։ Ոմանք կպնդեն, թե նման դեպքերում դիմում են գրում եւ հեռանում։ Իսկ եթե գործող ԱԳ նախարարը մտավախություն ունի, որ իրեն կփոխարինի 25 կամ 26-ամյա մի իմքայլական։

Այնպես որ, Մնացականյանին քննադատելու փոխարեն, քննադատության սլաքներն այլ ուղղությամբ դրեք։ Այդպես ավելի ճիշտ կլինի եւ մտածենք այն մասին, որ երկիրը վերջնականապես վերածվում է մի հոգու բացարձակ իշխանություն ունեցող տարածքի՝ դրանից բխող բոլոր հետեւանքներով։ Դեռ գոհ լինենք, որ ԱԳ նախարարին չէին պարտադրել խոսել այն մասին, որ շուտով իրավագիտակից քաղաքացիները կարող են տեսանկարահանել խախտում անող ավտոմեքենաներին եւ տեսանյութն ուղարկել ոստիկանություն։ 

Հարցազրույթը առիթ կամ պատճառ չպետք է ծառայի արտգործնախարարին քննադատելու համար, այլ մեզ պետք է սթափության կոչ անի, որ հասկանանք, թե իրականում ինչ է կատարվում եւ որտեղ ենք հայտնվել։

Ի դեպ, նրանք էլ, ովքեր գիշեր, թե ցերեկ կոչ են անում ազատվել ռուսական լծից եւ նետվել բարի Արեւմուտքի գիրկը, թող միշտ հիշեն այս հարցազրույցը եւ Արեւմուտքի լրագրողի տված նենք եւ մեղմ ասած ոչ հայամետ հարցերը։

Հանրությունը, քաղաքական էլիտան պետք է ուշքի գա, հասկանա, որ այսպես երկար չի կարող շարունակվել։ Միայն լսելով, թե Արցախի հարցի վերաբերյալ ինչեր էր ասում մնացականյանը, այլ կերպ ասած, ինչպես էր Փաշինյանի տեսակետները ներկայացնում, պետք է հասկանալ, որ իրոք վաղուց արդեն կանգ առնելու, սթափվելու, մեզ թափ տալու եւ առաջ շարժվելու ժամանակն է։

Top-News.am