«Տեր Աստված, աղաչում եմ, թող էղնի». գյումրեցի թոշակառուների հերթը բանկոմատների մոտ

ՀՀ աշխատանքի եւ սոցիալական հարցերի նախարարության սոցիալական ապահովության պետական ծառայությունը պաշտոնական հաղորդագրություն էր տարածել, որ մայիս ամսվա կենսաթոշակների բաշխումը սկսվելու է ընթացիկ ամսվա 4-ից: Սակայն, սոցիալապես ծանր կացության մեջ ապրող գյումրեցիները կամ չէին լսել հայտարարությունը կամ անտեսել էին:

Յուրաքանչյուր ամսվա նման նրանք մայիսի 2-ից բանկոմատների մոտից այն կողմ չէին գնում: Այսօր Գյումրիում նկատեցինք, որ մարդիկ եկել եւ բանկոմատներին հարակից վայրերում հերթ էին կանգնել, որպեսզի թոշակները լինելուն պես ստանան:
Ստացվել էր այնպես, որ թոշակառուներից ոմանց հաշվին փոխանցվել էր գումարը, ոմանց հաշվին՝ ոչ: Գյումրեցի թոշակառու կանանցից մեկը, վախենալով մոտեցավ բանկոմատին, երեք անգամ խաչակնքեց, հետո՝ «Տեր Աստված, աղաչում եմ, թող էղնի»,- ասելով ստուգեց հաշիվը: Այնուհետև մյուս կանգնածները, տեսնելով, որ իրենց հաշիվը դատարկ է, դժգոհեցին:
«Էդ մի թոշակն է, որ պտի յոլա գնանք, էն էլ ուշացրել են: Քանի օր է կսպասենք, բայց հլը չկա: Տիա էկել բանկոմատի մոտ կանգնել եմ, որ թոշակը գա, ստանամ, հաց առնիմ, տուն գնամ: 47 հազար եմ ստանում, դրանով ի՞նչ էնեմ, հազիվ հաց ենք առնում: Կոմունալները որ կվճարենք, տակը վաբշե էլ բան չի մնա: Մե անգամ չի էղնի, որ հալալ ժամանակին տան»,- ասաց 75 ամյա Սամվել Գեւորգյանը:

«Ի՞նչ անենք, որ ուշանում է, մեր կարծիքները ո՞վ է հաշվի առնողը: Մենք թոշակով առաջինը հաց ենք առնում, հետո կոմունալներն ենք վճարում: Էլ ուրիշ բանի հնարավորություն չի մնում: Խայտառակ վիճակով ենք ապրում: Պրեզիդենտն էլ, վարչապետն էլ մեզի շան օրի են գցել: Մենք 16 հազար թոշակ կստանանք, իրանք մե կես ժամվա ըդքանը կծախսեն»,- նշեց ներկա կանանցից մեկը:

«Չգիտեն, որ սաղիս հույսը էս թոշակն է: Ընչի՞ են ուշացնում, սրա վերջը ի՞նչ պտի էղնի»,- ասաց մեկ այլ թոշակառու:

Ներկաներից հետաքրքվեցինք, եթե դժգոհ են իշխանություններից, որոնց աշխատանքի արդյունքում էլ, օրինակ, ուշանում է կենսաթոշակի բաշխումը, ապա ինչպե՞ս է ստացվում, որ նույն իշխանությունը ամեն անգամ հաղթում է:

«Էս քաղաքի վիճակին որ կնայես՝ վախենալդ գուկա: Ցենտրալնի փողոցներով ջուրը կերտա, բայց նայող, սարքող չկա: Իրանք իրանց դզում, փչում, անցնում են: Էդ ու՞մ համար պարզ չէ»,- ասաց Սամվել Գեւորգյանը:

«Հանրապետականը անցնում է, որովհետեւ բժշկուհիներին, ուսուցչուհիներին, քաղաքապետարանի աշխատողներին ստիպել են, որ իրանց ընտրեն: Չէիք տեսնում՝ ինչ էին ցույց տալիս, ի՞նչ ժողովներ են արել, մարդկանց հավաքել են ու ստիպել, որ իրենց ընտրեն»,- միմյանց հերթ չտալով ասում էին գյումրեցի թոշակառու կանայք:

Խորհրդարանական ընտրություններից անցել է ընդամենը մեկ ամիս, բայց վերարտադրված ՀՀԿ-ն չի փորձում ձեւական առաջընթաց ապահովել նույնիսկ այն դեպքում, երբ առաջիկայում տեղի են ունենալու Երեւանի քաղաքապետի ընտրությունները:

Դավիթ Գասպարյան

Գյումրի