Խոսքը ոչ թե ոսկի ստանալու մասին է, այլ հարստացված և ռադիոակտիվ ուրան. Ջերմուկի բնակիչը` Ամուլսարը շահագործելու մասին

Մեր բնակչությունը ոչնչից տեղյակ չէ, ժողովրդից անկախ` վերևում հանքը փորձել են բացել ու չեն ներկայացրել բաղադրությունը, թե այնտեղից ինչ են հանելու. Tert.am-ի հետ զրույցում այս մասին ասաց Ջերմուկի բնակիչ Գևորգ Սարգսյանը:

Նրա խոսքով` հետագայում իմացել են, որ սարում հսկայական քանակի ուրան կա և խոսքը հարստացված և ռադիոակտիվ ուրան ստանալու մասին է, այլ ոչ թե ոսկի, ինչպես որ ներկայացնում է «Լիդիան Արմենիան»:

«Ես դեմ եմ, որ հանքը բացվի: Ջերմուկն առանց այն էլ շատ մեծ ապագա ունի այսօր: Հայաստանի և աշխարհի մասշտաբով այսօր ամենաթանկ բանը քաղցրահամ ջուրն է: Եթե հանքը բացեն, մեր քաղցրահամ ջրերին մեծ վտանգ է սպառնում»:

Ինչ վերաբերում է տնտեսական շահին, նա հաստատեց՝ պետք է հաշվի առնել դա, սակայն բացասական կողմերն էլ պետք է նկատել: Սարգսյանը նկատեց՝ հանքը աշխատեցնելու դեպքում պետությունը կունենա տնտեսական որոշակի շահ, սակայն կկորցնենք Վայոց Ձորի մի մեծ հատվածը: Քիմիական աղտոտվածությունը կազդի նաև ծնելիության վրա:

«Եթե տնտեսական շահ եք ուզում, թող պետությունը որոշակի գումար բերի, ներդնի Ջերմուկի զարգացման ծրագրում, դա ավելի եկամտաբեր է, քան հանքը, որ մի քանի տարի աշխատի: Մեր կուրորտը մշտական է, իսկ հանքը՝ ժամանակավոր: Այնտեղ նաև շատ մեծ քանակությամբ սնդիկ կա, որը հանված թափոնների մեջ է լինելու, իսկ սնդիկը ջրից անջատել չի լինի: Հաջորդ կետը. քամին այս պահին գալիս է Ամուլսարից: «Լիդիանն» ասել է, որ քամու բերած փոշու հատիկները վերահսկելու են: Դա ֆանտազիայի ժանրից է: Հիմա շինարարություն չկա, բայց այն ժամանակ, երբ կար, սպիտակ մեքենաների վրա ավելի շատ նկատելի էր մի քանի սանտիմետրանոց փոշին»,-ընդգծեց Գևորգ Սարգսյանը:

Նա նաև ասաց, որ իրենց քաղաքում հիվանդ երեխաներ շատ քիչ կան: Բոլորի առողջական վիճակի մասին պատմող համապատասխան փաստաթղթերը հիվանդանոցում են, եթե որոշեն հանքը շահագործել, ապա թող կառավարությունը հետո ստուգի այդ թղթերը, տեսնի, թե երեխաներն ինչ առողջական խնդիրներ ունեն: