Դատապարտյալից «սպարտիվկա» վերցնելու համար ՔԿՀ պետի պաշտոնից ազատված Մանուկ Պողոսյանը նշանակվել է «Կոշ» ՔԿՀ-ի պետի ԺՊ

Վերջերս կաշառք ստանալու կասկածանքով ԱԱԾ-ի կողմից կալանավորվել է «Կոշ» քրեակատարողական հիմնարկի պետ Լյովա Բաղդասարյանը, այժմ նրան փոխարինում է ժամանակավոր պաշտոնակատարը: Tert.am-ի տեղեկություններով՝ Լյովա Բաղդասարյանին Արդարադատության նախարար Ռուստամ Բադասյանի հրամանով փոխարինում է Մանուկ Պողոսյանը, ով հայտնի է դատապարտյալից «սպարտիվկա» կաշառք ստանալու պատմությամբ:

Հիշեցնենք, որ 2015թ․ Մանուկ Պողոսյանը զբաղեցնում էր «Վարդաշեն» ՔԿՀ պետի պաշտոնը, ով նույն ՔԿՀ-ում պատիժը կրող Արթուր Քանանյանից սպորտային համազգեստ էր ուզել, ինչը պարզվել էր դատապարտյալի ու նրա եղբոր հեռախոսային զրույցի վերծանումից: Արթուր Քանանյանն իր եղբորը, մասնավորապես, ասել էր, որ հրահանգում է 30 հազար դրամանոց «սպարտիվկա» տալ «Վարդաշեն» ՔԿՀ պետին, ինչը և արվել էր:

Փաստի առթիվ 2015թ․ Հատուկ քննչական ծառայությունում հարուցվել էր քրեական գործ՝ ՔՕ-ի 311-րդ հոդվածի հատկանիշներով (կաշառք ստանալը): Այդ ժամանակ էլ նրա լիազորությունները նախաքննական մարմնի միջնորդությամբ ժամանակավորապես դադարեցվել էին: Սակայն այժմ այդ քրեական գործի մասին Դատական տեղեկատվական համակարգում որևէ տեղեկություն չկա, ինչը ենթադրում է, որ գործը կարճվել է նախաքննության փուլում, իսկ Արտակ Պողոսյանը կրկին պաշտոնյա է: