Մեղավորներն իրենց պատիժը կստանան. Դավիթ Տոնոյանը՝ Վայոց Ձորի միջադեպի մասին

Սեպտեմբերի 21-ին լրագրողների հետ ՀՀ պաշտպանության նախարար Դավիթ Տոնոյանն անդրադարձավ Վայոց Ձորում տեղի ունեցած աղմկահարույց ծեծկռտուքին: Նրա խոսքով՝ փոխգնդապետի առողջական վիճակը հույսեր շատ չի տալիս, նա գտնվում է ՊՆ-ի հոսպիտալում, մեր վերահսկողության տակ է:

Հարցին, թե հետևողական լինելո՞ւ եք, որ կոծկումներ չլինեն, նա արձագանքեց.

«Անգամ փոքր կասկած թող չլինի: Ես կարծում եմ, որ ոչ միայն ես եմ հետողական լինելու, այլև կառավարության բոլոր անդամները:

Ռազմական ոստիկանությունը քաղաքացիական ոստիկանության հետ միասին օպերատիվ հետախուզական աշխատանքներն իրականացնում է՝ ամեն ինչ ազնիվ ու արդար եղանակով: Մեղավորներն իրենց պատիժը կստանան»:

Հիշեցնենք, որ սեպտեմբերի 17-ին՝ ժամը 23:40-ի սահմաններում, Եղեգնաձոր քաղաքի շենքերից մեկի բակում փոխգնդապետ Արա Մխիթարյանի և Վայոց Ձորի մարզպետի օգնական Հարություն Գրիգորյանի մասնակցությամբ ծեծկռտուք է տեղի ունեցել: Ենթադրյալ հանցագործություն կատարած անձը, ով Եղեգնաձոր քաղաքի 28-ամյա բնակիչ է, զանգով նրան աջակցելու համար այնտեղ եկած 3-4 անձ փորձել են պարզաբանումներ ստանալ, որից հետո նրանց միջեւ սկսած ծեծկռտուքի ժամանակ ծեծի են ենթարկել սպաներին: Ենթադրյալ հանցագործը բռունցքով մեկ անգամ հարվածել է սպայի գլխին, որի հետեւանքով վերջինս վայր է ընկել: 28-ամյա երիտասարդը ձերբակալվել է, նրան մեղադրանք է առաջադրվել:

Կան տեղեկություններ, որ միջադեպին մասնակցել է նաեւ Վայոց Ձորի մարզպետ Տրդատ Սարգսյանը: Միջադեպին մարզպետի հնարավոր մասնակցությունը ստուգվում է: