Ընտրակաշառքից հետո՝ եկեղեցի. Մեծ Պահքը ավարտվեց

Վաղը Հայ Առաքելական Եկեղեցին տոնելու է հերթական տաղավար տոնը՝ Քրիստոսի Հարության տոնը: Սուրբ Զատիկին նախորդող 48 օրը համարվում է Մեծ պահոց շրջան, սակայն կարեւորվում է վերջին մեկ շաբաթը, որի բոլոր օրերը կոչվում են Ավագ օրեր եւ ունեն իրենց խորհուրդը:

Փոխադարձ հարգանք, հանդուրժողականություն, սեր, զսպվածություն՝ մարմնական ցանկություններում, եւ լավատեսություն: Մեծ Պահքի օրերի նպատակն է այս եւ այլ պահանջներին հետեւելը:

Այս տարի պահոց շրջանը զուգադիպեց հերթական խորհրդարանական ընտրությունների հետ: Բնականաբար պահոց շրջանը իր տեղը զիջեց ակտիվ նախընտրական քարոզարշավին: Նույն Պահքի շրջանում ակտիվորեն բաժանվեց ընտրակաշառք եւ վաճառվեցին հազարավոր ձայներ: Ասում են, հազարավորներ էլ ընդգրկվեցին շրջիկ խմբերում եւ արեցին իրենց չար գործը:

Հայերից շատերը պատեհ-անպատեհ հայտարարում են, որ առաջինը քրիստոնեություն ընդունած երկիրն ենք, բայց հենց առաջինն է խախտում եւ չի հետեւում Քրիստոսի ուսմունքին: Մեծ Պահքի վերջին շաբաթվա Ավագ օրերին Հայ Առաքելական Եկեղեցիներում երեկոյան ժամերգության ժամանակ ասեղ գցելու տեղ չկար, համոզված ենք, որ վաղն էլ՝ Սբ. Զատիկի պատարագին կրկին եկեղեցին մարդաշատ է լինելու, բայց մի բան է զարմանալի. ովքե՞ր են եկեղեցի գնացողները, աղոթողները, արդյո՞ք նրանց թվում կան ընտրակաշառք բաժանողներ եւ վերցնողներ:

Գյումրու Սուրբ Աստվածածին (Յոթ Վերք) եկեղեցու տարածքում Ավագ Ուրբաթ օրը փորձեցինք եկեղեցի եկած գյումրեցիների հետ զրուցել քրիստոնեության, հավատքի եւ ընտրակաշառքի մասին: Որքան էլ որ զարմանալի է, բայց պարզվեց, որ եկեղեցի են գալիս եւ Քրիստոսի թաղման խորհրդանշական թափորին ամենից շատ են ուզում դիպչել նրանք, ովքեր ներգրավված են եղել ընտրակաշառք վերցնելու գործընթացներում:

«Հա, ինչ անենք, որ ընտրակաշառք եմ վերցրել, ուրեմն դրանից հետո իմ Աստծուն պտի մոռանա՞մ: Փող է՝ տվել են, վերցրել եմ, բայց էդ չի նշանակե, որ եկեղեցի չպտի գամ ու չաղոթեմ»,- մեզ հետ զրույցում մեծ դժվարությամբ անկեղծացավ գյումրեցի տղամարդկանցից մեկը, ով ընտրակաշառք էր վերցրել,իսկ այդ օրն էլ հուսալով որ դիպչելով խորհրդանշական թաղման թափորին, գործերը կարգի կընկնեն, չհասկանալով, որ ընտրակաշառք վերցնողների գործերը երբեք չեն կարող կարգավորվածլինել::

«Ըդպես որ էղնի, քաղաքի 80 տոկոսը եկեղեցի չպտի մտնի: Էս ընտրություններին սաղ էլ փող են վերցրել»,- այսպիսի կարծիք հայտնեց մեկ այլ գյումրեցի, ով այդպես էլ չցանկացավ ասել՝ ընտրակաշառք վերցրել է, թե՝ ոչ:

Հանդիպեցինք նաեւ այնպիսի գյումրեցիների, ովքեր միշտ վերցրել են ընտրակաշառք, սակայն այս տարի հրաժարվել են:

«Ես դպրոցում եմ աշխատում արդեն 20 տարի: Ամեն ընտրության ժամանակ վերցրել եմ ու ընտրել եմ այն թեկնածուին, ում տնօրենն է ասել: Այս տարի էլ եմ ընտրել իրենց ուզածին, բայց փողը չեմ վերցրել, պասի մեջ եմ»,- նշեց գյումրեցի մանկավարժներից մեկը:

Գյումրեցիներից նաեւ հետաքրքվեցինք, թե արդյոք չեն կարծում, որ ընտրակաշառք վերցնելով կամ բաժանելով դեմ են գնում քրիստոնեությանը, կամ միթե իրենք ընտրակաշառք վերցնելով չեն կրկնում Հուդայի վարքը, որը երեսուն արծաթով վաճառեց Տիրոջը: 

Մեր այս հարցը հունից հանում, զայրացնում էր գյումրեցիներին: Ավելին, նրանք սկսեցին թույլ չտալ, որ շարունակենք մեր զրույցը եկեղեցի այցելածների հետ: Քիչ չէին նրանք, ովքեր արդարացնում էին իրենց քայլը:  

«Հուդան էլ փողը վերցրեց, բայց հետո փոշմանեց: Հիմա էլ մենք ենք վերցնում, բայց էլի զղջում ենք, գալիս ենք եկեղեցի, որ գոնե մի քիչ հանգիստ լինենք, աղոթենք, որ ամեն ինչ լավ լինի», - եզրափակեց գյումրեցիներից մեկը, որը հեշտությամբ գտել էր խնդրի լուծման իր տարբերակը:

Ստացվում է, որ ընտրակաշառք վերցնելուց հետո գյումրեցիներն այցելում են եկեղեցի: Մի պահ թվում է, որ դեռ հույս կա, գիտակցում են, որ ընտրակաշառք վերցնողներ չեն լինի, բայց մեկ այլ դիտարկմամբ էլ, եթե գյումրեցիները մտածում են, ու եկեղեցի գալուց, աղոթելուց հետո ընտրակաշառքի մեղքը այլեւս իրենցը չէ, ապա կարող են յուրաքանչյուր ընտրության էլ գումար վերցնել եւ անմիջապես մտնել եկեղեցի:

Դավիթ Գասպարյան

Գյումրի

Այս թեմայով Վարդան Ղուկասյանը երկու ամսով կալանավորվեց Գյումրիի քաղաքապետարանը քաղաքացիներին հորդորում է չտրվել սադրանքների Կարմիր ու սեւ բերետավորները բիրտ ուժի կիրառմամբ բերման են ենթարկում քաղաքացիներին. լսվում են հայհոյանքներ (տեսանյութ) Գյումորւ քաղաքապետ Վարդան Ղուկասյանին տեղափոխում են Երևան՝ Հակակոռուպցիոն կոմիտե Ինչպես են կարմիր բերետավորները մուտք գործում Գյումրիի քաղաքապետարանի շենք (տեսանյութ)