«Տասովշչիկի» անկեղծության պահը
Հարցազրույց արմավիրցի «Տասովշչիկի» հետ:
«Տասովշչիկը» Հայաստանում բոլորովին այլ գործառույթ ունի, քան Ռուսաստանում: Բառը ռուսերեն է, բայց արտահայտում է բոլորովին այլ գործառույթ: «Տոսովշչիկները» հայաստանյան մեծ ու փոքր քաղաքներում հլու եւ կամակատար զանգվածին վերահսկելու եւ ուղղորդելու գործառույթ ունեն, իսկ մընտրությունների ժամանակ էլ հենց նրանք են բաժանում ֆեոդալների տրամադրած ընտրակաշառքը:
Այս օրերին նրանց տրամադրությունը բարձր է: Ավելին, շատ բարձր է: Մեր թղթակիցը զրուցեց արմավիրցի «տասովշչիկներից» մեկի հետ:
- Տրամադրությունդ ակնհայտորեն բարձր է, որն է պատճառը:
- Մեծ փողեր ենք կպցրել, ինչպես բարձր չլինի:
- Ինչպե՞ս:
- Շատ պարզ: Թեկնածուները մեզ տալիս են X գումար, որ, ասենք, բաժանենք 10 հազար հոգու, յուրաքանչյուրին՝ տասը հազարական: Մենք, բնականաբար, հարիֆ չենք, որ բոլորին բաժանենք: 10 հազարից տալիս ենք 3 հազարին կամ 4 հազարին, ընդ որում, ոչ բոլորին տասը հազար: Դե հիմա հաշվեք, թե մեզ որքան գումար է մնում: Հիմա ոնց գոհ ու ուրախ չլինենք:
- Իսկ հիմա ձեզ չեն ասում, թե ինչու 10 հազար ձայն չստացանք, այլ 3 կամ 4:
- Ասում են, ոնց չեն ասում: Քանի օր է արդեն էդ բազառների մեջ ենք: Ասում ենք տվել ենք, մեզ խաբել են: Ձեւ չունեն հակառակն ապացուցելու:
- Չեք մտածում, որ վատ բան եք անում: Ընտրակաշառքով ընտրություն չեն կազմակերպում:
- Ժողովրդի փողերը վերադառնում է ժողովրդին: Մի՞թե վատ է:
- Բայց, կարծես, ժողովրդին չի վերադառնում, այլ հիմնականում ձեզ:
- Իսկ մենք ժողովուրդ չե՞նք:
- Իսկ ժողովրդին ինչպե՞ս եք պարտադրում փողը վերցնելուց հետո քվեարկեն հենց ձեր ասած թեկնածուի օգտին:
- Սրանք հարիֆներ են: Ոչխարի հոտին ավելի բարդ է կառավարելը, քան սրանց: Փողը վերցնում են ու ինչ ասես՝ կանեն: Կվախեն ուրիշին քվեարկեն: Սրանք ստրուկից էլ բեթար են:
- Շատ էին ձեզ նման «փող կպցրածները»:
- Դե շատ չենք, բայց կան էլի: Ով շատ, ով մի քիչ քիչ, բայց լավ կպցրել ենք: Մենք գոհ ենք:
Top-News.am