«Հոկտեմբերի 2-ի» հետեւանքները կամ ՀՅԴ-ն լուրջ մեղադրանք է ներկայացնում
Մոտ երկու շաբաթ առաջ Հրայր Թովմասյանի գլխավորած ՀՀ ՍԴ-ն սահմանադրական ճանաչեց 2018թ. հոկտեմբերի 2-ին «ԱԺ կանոնակարգ» սահմանադրական օրենքում փոփոխությունների նախագիծը:
Խոսքն այն օրինագծի մասին է, որը առիթ դարձավ, որ Նիկոլ Փաշինյանն օգտվելով դեռ պահպանվող հուզական վիճակից, ժողովրդին կոչ անի դուրս գալ փողոց եւ ճնշում գործադրել այն ուժերի դեմ, որոնք կողմ էին այդ փոփոխությանը: Նա այս քայլով արագացրեց նաեւ արտահերթ ընտրությունների անցկացումը:
Եվ հիմա, երբ արդեն իսկ Սահմանադրական դատարանը համապատասխան որոշում է կայացրել, պնդելով, որ այդ փոփոխությունները սահմանադրական են, ՀՅԴ բյուրոյի ներկայացուցիչ Արմեն Ռուստամյանը հանդես է եկել հայտարարությամբ` ասելով. «Այն, ինչ եղավ հոկտեմբերի 2-ին, ոչ այլ ինչ էր, քան սահմանադրական կարգի տապալման փորձ: Քննությունն էլ ժամանակի ընթացքում տեղի կունենա, ժամանակը կգա եւ բոլոր հարցերը կդնի իր տեղը»:
Այսպիսով, պարզվեց, որ այն ժամանակ վարչապետը թյուրիմացության մեջ է գցել ժողովրդին եւ սահմանադրական հիմք ունեցող փոփոխությունները ներկայացնելով հակաօրինական գործողություն ժողովրդին դուրս է բերել փողոց: Պարզվեց, որ ոչ մի հակաօրինական, հակապետական եւ հակահեղափոխական գործողություններ չեն եղել:
Պատահական չէ, որ ՀՅԴ-ական Արմեն Ռուստամյանի հայտարարությանը շատ արագ արձագանքեց ԱԺ նախագահի տեղակալ Լենա Նազարյանը, եւ ասաց, թե Ռուստամյանը հույս ունի որ մենք չենք հիշեցնի, թե իրենք ինչ արեցին հոկտեմբերի 2-ին:
Հետաքրքիրն այն է, որ նույնիսկ Սահմանադրական դատարանի որոշումից հետո Լենա Նազարյանը ՀՅԴ-ին եւ մյուս քաղաքական ուժերին, որոնք կողմ են քվեարկել փոփոխություններին, մեղադրում է «վատ բան» անելու մեջ:
Ի դեպ, Լենա Նազարյանն արդեն մոռացել է, թե մութ երեկոյան ինչ ճնշում է գործադրվել խորհրդարանական խմբակցությունների վրա, եւ թե ով կամ ովքեր են գործադրել այդ ճնշումը: «Ես էլ չգիտեմ՝ այդ ի՞նչ ճնշման մասին են խոսում ՀՅԴ-ից: Այդ ե՞րբ ու ինչպե՞ս են ճնշվել, որ հոկտեմբերի 2-ին իրենց ուզած նախագծին կողմ են քվեարկել»,- ասել է Լենա Նազարյանը:
Ի դեպ, նա ՀՅԴ-ին, ՀՀԿ-ին, ինչպես նաեւ ԲՀԿ-ին մեղադրել է անզանվության մեջ: «Հոկտեմբերի 2-ի նախագիծն ընդամենը խթան եղավ, որ գործընթացն արագանա: Այն ընդամենը ազդակ էր, որ խորհրդարանական ուժերը՝ ՀՀԿ-ՀՅԴ-ԲՀԿ, ազնիվ չեն»,- շեշտել է նա:
Լենա Նազարյանը եւ իր կուսակիցները վստահ են, որ ՍԴ այս որոշումը չի կարող որեւէ քաղաքական կամ իրավական գործընթացի հիմք լինել:
Քաղաքական այլ ուժեր, այդ թվում ՀՅԴ-ն այլ կարծիքի են եւ արդեն մոտ ապագան ցույց կտա, թե իրականում քաղաքական դաշտի վրա ինչ ազդեցություն կունենա ՍԴ որոշումը, բայց այն, որ կառավարող ուժը անհարմարություններ է զգում՝ արդեն իսկ ակնհայտ է:
Իսկ վերջում կրկին անդրադառնալով այն ճնշումներին, որի մասին մոռացել է Լենա նազարյանը, հիշեցնենք իր իսկ խոսքերը, որն ասել էր անցած տարվա հոկտեմբերին: «Նրանք (ՀՅԴ-ն, ԲՀԿ-ն եւ ՀՀԿ-ն) պայմանավորվել են եւ մտածել, որ հնարավոր է միասին նախագիծ հեղինակել, ընդունել` մոռանալով, որ դրսում մարդիկ դա նկատում են, եւ դա անհետևանք չի մնա»:
Հակոբ Ասատրյան
Top-News.am